رەسپۋبليكالىق «قازاق ادەبيەتى» جانە «انا ءتىلى» گازەتتەرىنە جاڭا باس رەداكتورلار تاعايىندالدى

بۇل حاباردى قازاقستان جازۋشىلار وداعى مەن «قازاق گازەتتەرى» ج ش س راستادى.

قازاقستان جازۋشىلار وداعىنا قارايتىن «قازاق ادەبيەتى» گازەتىنە بەلگىلى جۋرناليست، جازۋشى داۋرەن قۋات باس رەداكتور بولىپ تاعايىندالسا، «انا ءتىلى» گازەتىنە - جۋرناليست، اقىن، «قالامگەر- مەديا» ورتالىعىنىڭ ديرەكتورى بولعان جاناربەك ءاشىمجان كەلدى.

«قازاق ادەبيەتى» گازەتى قازاقستان جازۋشىلار وداعىنىڭ ورگانى رەتىندە 1934 -جىلدىڭ قاڭتارىندا جارىق كوردى. گازەت بەتتەرىندە قازاق اقىن- جازۋشىلارىنىڭ ولەڭ، جىر، داستاندارى، اڭگىمە- وچەركتەرى، رومان، پوۆەستەرىنەن ۇزىندىلەر، قازاق ادەبيەتىنىڭ وتكەنى مەن بۇگىنى جانە كەلەشەگى جايلى بايىپتى ادەبي- سىن ماقالالار، دۇنيە ءجۇزى كلاسسيكتەرىنىڭ ۇزدىك تۋىندىلارىنان اۋدارمالار جاريالانادى. «انا ءتىلى» گازەتىنىڭ العاشقى ءنومىرى 1990 -جىلى 22 - ناۋرىزدا جارىققا شىقتى. «انا ءتىلى» تەك مەملەكەتتىك ءتىل عانا ەمەس، ۇلتقا قاتىستى كەز كەلگەن كۇرمەۋلى ماسەلەلەردى كوتەرىپ كەلەدى. قازاقتىڭ ءتىلى، قازاقتىڭ اۋىلى، قازاق مەكتەبى، بالاباقشاسى، قازاق جاستارى، قازاق عىلىمى، ت. ب. كوپتەگەن تاقىرىپتار باسىلىم بەتتەرىنەن ءتۇسىپ كورگەن ەمەس.

داۋرەن قۋات - 1973 -جىلى بۇرىنعى تالدىقورعان وبلىسى قاپال اۋدانىندا دۇنيەگە كەلگەن. م. قاشقاري اتىنداعى جانە ع. مۇسىرەپوۆ اتىنداعى سىيلىقتاردىڭ لاۋرەاتى. «ءداستۇر» باسپاسىنان «ءالقيسسا» اتتى پروزالىق كىتابى جارىق كورگەن. «Abai.kz»  اقپاراتتىق پورتالىنىڭ نەگىزىن قالاعان.

جاناربەك ءاشىمجان -  1976 -جىلى الماتى وبلىسى كەگەن اۋدانىندا تۋعان. 1999 -جىلى ءال- فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن بىتىرگەن. 1996-1999 -جىلدارى قالالىق «الماتى اقشامى» گازەتىندە ءتىلشى، 2000 -جىلى «قازاقستان» جۋرنالىندا ءبولىم رەداكتورى قىزمەتتەرىن اتقارعان. 2000-2005 -جىلدارى رەسپۋبليكالىق «جاس الاش» گازەتىندە ءبولىم مەڭگەرۋشىسى، 2005 - 2008 -جىلدارى رەسپۋبليكالىق «جاس قازاق» ۇلتتىق اپتالىعىندا باس رەداكتوردىڭ ورىنباسارى بولىپ قىزمەت ەتكەن. 2008 -جىلدان باستاپ قازاقستان جازۋشىلار وداعىنا قاراستى «جۇلدىز» ، «پروستور» ، «سىن» جۋرنالدارى مەن «قازاق ادەبيەتى» گازەتتەرىن بىرىكتىرگەن «قالامگەر- مەديا» ورتالىعىنىڭ ديرەكتورى بولدى.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى