سارايشىق جاعالاۋىن بەكىتۋ جۇمىستارى اياقتالدى
بۇگىن ماحامبەت اۋدانىنداعى جايىق وزەنىنەن «قازاقستاننىڭ كيەلى جەرلەرى گەوگرافياسى» جوباسىنا ەنگەن سىرلى سارايشىقتىڭ ەجەلگى جەرىن قورعاۋعا ارنالعان قورعانىس بوگەتىنىڭ قۇرىلىسى سالتاناتتى تۇردە اشىلدى.
سالتاناتتى شارادا وبلىس اكىمىنىڭ ورىنباسارى الىبەك ناۋتيەۆ وبلىس تۇرعىندارىن اتاۋلى كۇنمەن قۇتتىقتادى.
«سارايشىق - تاريحي ورىن. جىبەك جولى بويىندا ورنالاسقان بۇل كونە شاھار ەندى تۋريستىك ورتالىققا اينالادى. 2015 -جىلى قالاشىق ورنىن جايىقتىڭ تاسقىن سۋىنان ساقتاپ قالۋ ءۇشىن قاراجات ءبولىندى. قازاقستاندىقتار ءۇشىن ماڭىزدى مەرەكە استانانىڭ 20 جىلدىعىندا جۇمىستىڭ اياقتالعانى دا جاقسىلىقتىڭ نىشانى. مەملەكەت باسشىسى ەلىمىزدەگى كيەلى ورىندارعا اركەز كوڭىل ءبولىپ كەلەدى. بولاشاقتا تۋريستىك ورتالىق سالۋدى جوسپارلاپ وتىرمىز»، - دەدى الىبەك ناۋتييەۆ.
ايتا كەتەيىك، ەكى جىل ىشىندە قۇرىلىسشىلار بيىكتىگى 3,6 م، ۇزىندىعى 1,5 ك م قورعانىس بوگەتىن سالدى. بۇل جۇمىستارعا 1 ميلليارد 700 ميلليون تەڭگە ءبولىندى.
اۆتور: اباي ابىلاي ۇلى
