ق ر پرەزيدەنتى: ا ح ق و - تاۋەلسىز قازاقستاننىڭ جاڭا پاراعى
«استانا» حالىقارالىق قارجى ورتالىعى - تاۋەلسىز قازاقستاننىڭ جاڭا پاراعى. ونىڭ اشىلۋى ماڭىزدى قادام، ءبىزدىڭ ەكونوميكانىڭ بەكەم تۇردە دامۋىنىڭ جالعاسى بولىپ تابىلادى. جاھاندىق سىن-تەگەۋرىندەرگە جاۋاپ رەتىندە ا ح ق و- نى قۇرۋ تۋرالى يدەيانى ەڭ العاش رەت 2015-جىلى ايتقان ەدىم»، - دەدى نۇرسۇلتان نازاربايەۆ.
پرەزيدەنت اتاپ وتكەندەي، احقو قاتىسۋشىلارىنا سالىق بويىنشا 50 جىلعا دەيىن، سونداي-اق ۆيزالىق جانە ەڭبەك بويىنشا جەڭىلدىكتەر قاراستىرىلعان.
«بۇل، جۇمىسى اعىلشىن قۇقىعىنا نەگىزدەلگەن ايماقتاعى بىردەن- ءبىر قارجى ورتالىعى. تاۋەلسىز سوت، حالىقارالىق اربيتراجدى ورتالىق تاراپتاردىڭ قۇقىقتارىنىڭ ادىلەتتى قارالۋىن قامتاماسىز ەتەدى. ا ح ق و سۋديالارى رەتىندە مەنىڭ شەشىمىممەن انگليا مەن ۋەەلستەن كەلگەن 9 ابىرويلى سۋديا تاعايىندالدى. ولاردى لورد ۆۋلف مىرزا - انگليانىڭ بۇرىنعى جوعارعى سۋدياسى باسقارادى. اربيتراجدى ورتالىققا سونىمەن بىرگە تاعى 23 حالىقارالىق اربيتراج ەندى»، - دەدى نۇرسۇلتان نازاربايەۆ.
مەملەكەت باسشىسى تىلگە تيەك ەتكەندەي، ا ح ق و- نى ءتيىمدى باسقارۋدىڭ قاعيداتتارى مەن پراگماتيزمى ساقتالىپ، بارلىق ينۆەستورلاردىڭ مۇددەلەرى قورعالاتىن بولادى.
«قور نارىعىن دامىتاتىن قاتىسۋشىلاردىڭ ىڭعايى ءۇشىن احقو بيرجاسى - جوعارى تەحنولوگيالىق ينفراقۇرىلىم قۇرىلدى. بۇگىن سىزدەرمەن وسى بيرجانىڭ جۇمىسىن باستايمىز. ونىڭ جۇمىسىنا امەريكالىق Nasdaq بيرجاسى جانە شاڭحاي قور بيرجاسى قاتىسادى»، - دەدى مەملەكەت باسشىسى.
ەسكە سالا كەتسەك، ەلورداداعى كونگرەسس حولل ورتالىعىندا ەلباسى نۇرسۇلتان نازاربايەۆتىڭ قاتىسۋىمەن «استانا» حالىقارالىق قارجى ورتالىعىنىڭ رەسمي اشىلۋ ءراسىمى ءوتتى.
