استاناداعى پەرزەنتحانا ورتالىعى جۇكتى انالاردى قابىلداۋدى توقتاتتى
استانا قالالىق دەنساۋلىق ساقتاۋ باسقارماسىنىڭ باسشىسى كامالجان نادىروۆ اتاپ وتكەندەي، ءار جاعداي بويىنشا تاۋەلسىز كوميسسيا قۇرىلعان. سوندىقتان، قازىر ادام ءولىمىنىڭ سەبەبى مەن قاتەلىكتەر تۋرالى ايتۋعا ەرتە.
«№1 -پەريناتالدىق ورتالىق شتاتتىق رەجىمدە جۇمىس ىستەپ جاتىر. ءبىز قازىر بوسانۋ بولىمىنە ادامدار قابىلداپ جاتقان جوقپىز. ورتالىقتا بوساندىرۋدى ۋاقىتشا توقتاتا تۇرۋ جونىندە شەشىم قابىلدادىق. ءبىز مۇنى تولىقتاي تەكسەرۋ جۇرگىزىپ، دياگنوستيكا مەن ەمدەۋدىڭ ساپاسىنا ىقپال ەتۋى مۇمكىن فاكتورلاردى انىقتاۋ ءۇشىن جاساپ وتىرمىز. قالادا ايەلدەردى بوساندىرۋعا دايىن ءۇش مەكەمە جۇمىس ىستەپ جاتىر. №1-پەريناتالدىق ورتالىقتىڭ ناۋقاستارى سوندا اۋىستىرىلدى»، - دەپ حابارلادى نادىروۆ.
قوعامدىق دەنساۋلىق ساقتاۋ دەپارتامەنتى باسشىسىنىڭ ورىنباسارى سارحات بەيسەنوۆا پەريناتالدىق ورتالىقتا اۋرۋحاناىشىلىك جۇقپانىڭ الدىن الۋ ءۇشىن دەپارتامەنت ماماندارىنىڭ جۇمىس ىستەپ جاتقانىن اتاپ ءوتتى. قازىرگى تاڭدا زەرتحانالىق زەرتتەۋدى قولدانا وتىرىپ، ەپيدەميولوگيالىق تەرگەۋ ءجۇرىپ جاتىر.
ايتا كەتەيىك، استانادا ەكى اپتا ىشىندە ءۇش جاس انا ءولىمى تىركەلگەن.
«№1-پەريناتالدىق ورتالىق جىل سايىن 12 مىڭ ايەلدى بوساندىرىپ كەلەدى. سوڭعى ەكى جىلدا ەشقانداي انا ءولىمى تىركەلگەن جوق. سونداي-اق، ورتالىقتا 5 مىڭ كۇردەلى وتا جۇرگىزىلۋدە. وسىنداي قىسقا ۋاقىت ىشىندە ءۇش ايەلدىڭ باقيلىق بولۋى - ۇلكەن قايعى. ايەل ادام 2 -شىلدەدە 18:25-تە قايتىس بولدى»، - دەدى نادىروۆ.
№1 -پەريناتالدىق ورتالىعى باس دارىگەرىنىڭ ورىنباسارى ەربول اۋباكىروۆ ءۇشىنشى جاعدايدىڭ اكۋشەرلىك اسقىنۋعا قاتىستى ەكەنىن اتاپ ءوتتى.
«جۇكتى ايەلدەن قان كەتىپ، اۋرۋحاناعا ءتۇستى. العاشقى ساعاتتاردا ارنايى كومەك كورسەتىلىپ، كەسار تىلىگىمەن بوساندىرىپ الدىق. بالاسى امان. ءسابي 1800 گرامم سالماقپەن مەرزىمىنە جەتىپ دۇنيەگە كەلدى. بۇل فاكتور مەرزىمىنە جەتكەن جۇكتىلىك كەزىندە بالانىڭ قۇرساقتا كەش دامۋى دەپ باعالانۋدا.
جۇكتى ايەلدىڭ مەديتسينالىق قۇجاتتارىن تەكسەرۋ كەزىندە ونىڭ دەنساۋلىعىندا دىمكاسى بولعانى انىقتالدى. ول كىشكەنتاي كەزىنەن سوزىلمالى انەميامەن اۋىرعان. جۇكتى كەزىندە ءۇش دارىمەن ەمدەگەن، الايدا ول دارىلەر كومەكتەسپەگەن. وعان قوسا، الەۋمەتتىك فاكتور دا ىقپال ەتكەن. ناۋقاس ايەل 19 جاسىنان باستاپ زياندى ادەتتەرگە بوي الدىرىپ، كۇنىنە 20-30 رەت تەمەكى شەككەن. ياعني، نيكوتينگە تاۋەلدى بولعان. وسى اسپەكتىلەردىڭ بارلىعى تەرىس اسەر ەتكەن»، - دەدى اۋباكىروۆ.
