دوتسەنت مەيرامبەك بەسبايەۆقا جاۋاپ بەردى
مۇنداي پىكىردى فيلولوگيا عىلىمدارىنىڭ كانديداتى، ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ تەلەراديو جانە قوعاممەن بايلانىس كافەدراسىنىڭ دوتسەنتى مىرزانتاي جاقىپ ءبىلدىردى، دەپ حابارلايدى قازاقپارات ءتىلشىسى.
ايتا كەتەيىك، بۇعان دەيىن «مادەنيەت تانۋ» ماماندىعى بويىنشا ماگيستر ديپلومىن قورعاعان مەيرامبەك بەسبايەۆ الەۋمەتتىك جەلىدە ءوز اتىنا ايتىلىپ جاتقان سىندارعا جاۋاپ بەرگەن بولاتىن. ول قازاقپارات اگەنتتىگىندە «مەيرامبەك بەسبايەۆ: ەشكىمنىڭ جولىنا دا، قىزمەتىنە دە تالاسقان ەمەسپىن» تاقىرىبىمەن دە شىقتى.
ءبىرشاما ۋاقىتتان كەيىن مەيرامبەك بەسبايەۆ ءوز پوستىندا اتاپ كورسەتكەن مىرزانتاي جاقىپ قازاقپاراتقا پىكىرىن جولداپ، ونى جاريالاۋىمىزدى ءوتىندى.
«ەشكىمنىڭ ناقتى اتىن اتاپ، ءتۇسىن تۇستەمەسەم دە، قارا حالىقتىڭ ەسەبىنەن ابدەن بايىپ العان «ءانشى- جۋرناليست- جۇلدىزدار» ەندى مەملەكەتتىك ءبىلىم گرانتتارى ارقىلى تەگىن «وقىپ» ، «ءانشى- ماگيستر- دوكتورلارعا» اينالا باستاعانى تۋرالى الەۋمەتتىك جەلىدە جاريالانعان جازبامدى كەيبىر ازاماتتار تىكەلەي وزدەرىنىڭ اتتارىنا قابىلداپ، «قىزعانىپ، كورە الماي جاتىر» ، «قۋانىشقا ورتاقتاسا المايتىن، ءىشتارلىعى بار ادام» دەپ مەنىڭ اتىما ءبىراز اۋىر- اۋىر سوزدەر جازىپ تاستاعان. ونى قالىڭ كوپشىلىككە تاراتىپ جاتىر ەكەن. ءبىز سياقتى قاتارداعى قاۋىمداستىرىلعان پروفەسسوردىڭ ءبىر اۋىز سوزىنە وسىنشالىقتى دەڭگەيدە ەرەكشە ءمان بەرىپ، قىزۋ تالقىعا سالىپ جاتقان كوپشىلىك قاۋىمعا شەكسىز العىسىمدى بىلدىرەمىن!» ، - دەپ جازادى عالىم.
ونىڭ پايىمىنشا، كوپشىلىكتىڭ الدىندا جۇرگەن ونەر ادامدارى اعىلشىن نەمەسە باسقا دا شەتەل تىلدەرىن جەتىك مەڭگەرىپ، ءتىپتى عارىشتىق تەحنيكا عىلىمدارى سالاسى بويىنشا اكادەميك اتانىپ جاتسا دا، وزدەرى بىلەدى. وعان ەشكىمنىڭ دە قارسىلىعى جوق.
«ەگەر انشىلەر وزدەرىنىڭ شىنايى بىلىمدەرىمەن سونداي دارەجەگە جەتىپ جاتسا، ءوز باسىم وعان تەك قانا قۋانامىن! الايدا كەيبىر «تەلەجۇلدىزداردىڭ» ساحناداعى اتاقتارىن پايدالانىپ، ونەر سالاسىنا مۇلدەم قاتىسى جوق ۇلتتىق جوعارى وقۋ ورىندارىنىڭ ماگيستراتۋرالارى مەن PhD دوكتورانتۋرالارىنا قاراي جاپپاي لاپ قويىپ، مەملەكەتتىك ءبىلىم گرانتتارى ەسەبىنەن «وقۋ ءبىتىرىپ» ، ديسسەرتاتسيالار «قورعاۋعا» كىرىسۋى جالپى سيپات الا باستاۋىن؛ ۇلتتىق ۋنيۆەرسيتەتتەردى باسقاراتىن كەيبىر رەكتورلاردىڭ ءوز قاراماعىنداعى ستۋدەنتتەرى مەن پروفەسسور- وقىتۋشىلارىن تىرپ ەتكىزبەي، ۋىسىندا قىسىپ ۇستاپ وتىرىپ، كەرىسىنشە، ءارتۇرلى «جۇلدىزداردىڭ» الدىندا قۇرداي جورعالاپ، جاس بالاشا جۇگىرۋىن ءوز باسىم مۇلدەم تۇسىنە المايمىن! بايلاردىڭ استا- توك توي- تومالاقتارىنان كوپ قارجى تاباتىن انشىلەر مەن «تەلەجۇلدىزدار» ەگەر اكادەميالىق جانە عىلىمي اتاق- دارەجەلەر العىسى كەلىپ جاتسا، جوعارى وقۋ ورىندارىنىڭ ماگيستراتۋرالارى مەن PhD دوكتورانتۋرالارىنىڭ اقىلى بولىمدەرىنە وزدەرىنىڭ جەكە اقشالارىن تولەپ وقىعانى، شىن دارىندى جاستارعا ارنالعان مەملەكەتتىك ءبىلىم گرانتتارىنا جارماسپاعاندارى ءجون. توقسان اۋىز ءسوزدىڭ توبىقتاي ءتۇيىنى - وسى» ، - دەيدى مىرزانتاي جاقىپ.
