ۇلتتىق دومبىرا كۇنى: قازاقتىڭ كۇيلەرى مەترودا كۇمبىرلەدى
كۇمبىرلەگەن كۇي شارشاۋلى مەترو جولاۋشىلارىنىڭ كوڭىلىن ءبىر سەرپىلتىپ تاستادى. جۇرتشىلىق فلەشموبتى جاپپاي سۋرەتكە، ۆيدەوعا تۇسىرە باستادى.
ۇلتتىق كيىم كيگەن كۇيشىلەر «مۇحتار اۋەزوۆ اتىنداعى تەاتر» بەكەتىنەن رايىمبەك بەكەتىنە دەيىن كەلدى.
ۇيىمداستىرۋشىلار ەلباسى ن. ءا. نازاربايەۆتىڭ باستاماسىمەن 1- شىلدە كۇنى العاش رەت وتكىزىلەتىن «ۇلتتىق دومبىرا كۇنى» مەرەكەسىن ناسيحاتتاپ، قازاقتىڭ ۇلتتىق اسپابى - دومبىرانى دارىپتەۋ مەن مادەني ۇلتتىق بىرلىكتى نىعايتۋدى ماقسات تۇتقان.
«قۇرمانعازى اتىنداعى قازاق مەملەكەتتىك اكادەميالىق حالىق وركەسترى ۇجىمىنىڭ اتىنان ەلباسىمىزعا العىس ايتامىز. كۇي مەرەكەسى - بارشا دومبىراشىلار مەن ونەرپازدار ءۇشىن ۇلكەن سەرپىلىس بولماق. دومبىرا كۇنى اياسىندا قۇرمانعازى اتىنداعى وركەستر ءوزىنىڭ اۋقىمدى ءىس-شارالارىن قولعا الىپ وتىر. باستى شارا - قازاق ەلى الاڭىندا وتەتىن «دومبىرا - اسىل مۇرا» اتتى ۇلكەن كونسەرتتىك ءىس-شارا. الماتى مەتروپوليتەنىندە قۇرمانعازى وركەسترىنىڭ دومبىراشىلارى قۇرمانعازىنىڭ «اداي»، «بالبىراۋىن»، «سارىارقا»، «اقساق كيىك»، داۋلەتكەرەيدىڭ «كوروعلى»، «قوس القا»، «جىگەر» «توپان» كۇيلەرىن ورىندادى. ال 1- شىلدە كۇنى وتەتىن كۇي شەرۋىندە اتالعان شىعارمالاردى 3 مىڭ ونەرپازدىڭ ورىنداۋىندا تىڭداي الاسىزدار»، - دەيدى قازاقستاننىڭ ەڭبەك سىڭىرگەن قايراتكەرى، قۇرمانعازى وركەسترىنىڭ ديرەكتورى نۇرعيسا داۋەشوۆ.
قۇرمانعازى اتىنداعى وكرەستردىڭ قۇرىلعانىنا بيىل 85 جىل تولۋىنا وراي شىعارماشىلىق ۇجىم اعىمداعى جىلى الەمنىڭ باسقا دا مەترولارىندا قازاقتىڭ قارا دومبىراسىنان كۇي توكپەك.
