ەندى رەنجىتپەيمىن: تورەعالي داۋلى وقيعادان كەيىن قاتتى وزگەرىپ كەتكەنىن ايتتى
ءۇشىنشى رەت قىزدى بولعان تورەش ءبىراز ۋاقىت شەتەلدە بولىپ كەلدى. بىرنەشە ءانىن حالىققا ۇسىنىپ، ەندىگى كينو تۇسىرۋگە كىرىسىپ كەتتى.
تورەش 31 ارنانىڭ «ايتا بەرسىن» باعدارلاماسىنا سۇحبات بەرىپ، پاۆلودارداعى داۋلى وقيعادان كەيىن ءوزىنىڭ قاتتى وزگەرگەنىن مويىندادى، دەپ جازادى Stan.kz اقپاراتتىق اگەنتتىگىنىڭ ءتىلشىسى.
ءانشى الداعى ارمان- ماقساتتارى جايلى اشىق ايتتى.
«مەندە ارمان، ماقسات كوپ. يدەيا دا كوپ. ءبىراق ءبىر نارسەگە قاتىپ قالعان كەزىم بولعان ەمەس. مەن جالپى تانىمالدىلىققا يە بولامىن دەپ ويلاعان ادام ەمەسپىن. Instagram دا وقىرمانىم كوپ بولىپ كەتەدى دەپ تە ويلاماعام. تەك وسسەم حالىقپەن بىرگە ءوسىپ، ەلمەن بىرگە كۇن كورگەندى جاقسى كورەمىن. حالقىم قانداي كۇي كەشىپ جاتىر، سول ءومىر جەتەدى ماعان. ەڭ باستىسى، ولارعا كوڭىل- كۇي سىيلاۋ. جامانداسا دا، اڭگىمە قىلسا دا، مەنى قىلا بەرسە ەكەن. ءبىز سونىڭ قۇربانى بولا بەرسەك. ونەردەگى جالپى ماقسات - كورەرمەننىڭ كوڭىلىن قالدىرىپ الماۋ. حالىق دەگەن ءسوز، ءال- حالىق دەگەن اللانىڭ ءبىر ەسىمى ەكەن. حالىقتىڭ رازىلىعى - اللانىڭ دا رازىلىعى شىعار. كەشىرىم سۇرايمىن، ەندى رەنجىتپەيمىن بۇيىرسا»، - دەپ اعىنان جارىلدى تورەعالي.
سۇحبات بارىسىندا تورەعاليدىڭ قاتتى وزگەرگەنى بايقالىپ تۇردى. كوزى مۇڭعا تولعان ونەر يەسى شىن پەيىلىمەن ەلدەن كەشىرىم سۇراپ، اق نيەتىن ءبىلدىردى. پاۆلودارداعى وقيعادان كەيىن ءار ءساتىن باعالاي باستاعانىن دا جاسىرمادى.
«ءبارىن جاقسى كورىپ كەتتىم، بۇرىن دا جاقسى كورگەم، ودان سايىن ارتا ءتۇستى. ءاربىر ءساتىمدى باعالاي باستادىم. بۇرىن جيىن، كونسەرتتەر، كەشتەر وتەتىن- كەتەتىن. ەستە دە قالمايدى. ال قازىر ءار سەكۋندىن سەزىنىپ، اۋاسىن جۇتىپ، دالادا ءجۇرمىن. ەندى مەن قاندايمىن، حالىق مەنى سولاي كورۋى كەرەك ەمەس ەكەن. حالىق قالاي قالاسا، حان تۇيەسىن سويادى دەگەندەي، مەن سولاي بولۋىم كەرەك ەكەن. سونى ءتۇسىندىم. ءبىر جاعىنان، ەركەلىك شىعار. مەن اجەمنىڭ بالاسى بولدىم. اجەم نەمەرە- شوبەرەلەرىنىڭ ىشىنەن مەنى قاتتى جاقسى كوردى. مۇمكىن بالالىق، مۇمكىن شالالىق. پەندە بولعان سوڭ، نەشە ءتۇرلى بولادى عوي»، - دەدى تورەعالي.
