ماعجان تانۋشىلار سانى جىل سايىن ارتىپ كەلەدى - عالىم
م. قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە ءوتىپ جاتقان كونفەرەنسياعا وبلىس اكىمى قۇمار اقساقالوۆ، تۇركسوي باس حاتشىسى دۇيسەن قاسەيىنوۆ، جازۋشىلار وداعىنىڭ ءتوراعاسى ۇلىقبەك ەسداۋلەت، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ دوكتورى سەرىك نەگىموۆ، گازي حۋليا اتىنداعى تۇركيا ۋنيۆەرسيتەتىنىڭ پروفەسسورى كاساپوگلۋ چەنگەل جانە باسقا دا ءتۇرلى ەلدەردىڭ عالىمدارى قاتىستى.
وبلىس اكىمى كونفەرەنسيانى اشا وتىرىپ، ماعجان جۇمابايەۆتىڭ ەلىنىڭ جارقىن بولاشاعىن ارمانداعانىن اتاپ ءوتتى.
«ول حالىقتىڭ تاعدىرى، ەرتەڭى تۋرالى جازدى. بالالاردى وقىتىپ، مۇعالىمدەردى دايىندادى. ولار ءۇشىن كىتاپتار جازىپ، الەم ادەبيەتىن اۋداردى. م. جۇمابايەۆ حالىقتىڭ بولاشاعى ءۇشىن كۇرەسەتىن كۇشتىڭ جاستار ەكەنىن ايتتى» ، - دەدى ق. اقساقالوۆ.
تاريح عىلىمدارىنىڭ كانديداتى، وبلىستىق ءارحيۆتىڭ ديرەكتورى ساۋلە ماليكوۆا رەسمي قۇجاتتاردا م. جۇمابايەۆتىڭ تۋعان كۇنى 1893 -جىلدىڭ 25 ماۋسىمى دەپ كورسەتىلگەنىن اتاپ ءوتتى.
«جىل سايىن ۇلى قازاق اقىنىنىڭ شىعارماشىلىعىن زەرتتەۋمەن اينالىساتىن ادامدار سانى ارتىپ جاتىر. بۇعان ماعجان جۇمابايەۆتىڭ ءومىرى تۋرالى جاڭا دەرەكتەردىڭ پايدا بولۋى ىقپال ەتۋدە» ، - دەدى ساۋلە ماليكوۆا.
كونفەرەنسيادا وبلىس اكىمى ماعجان جۇمابايەۆتىڭ 125 جىلدىعىنا وراي، قۇرمەتتى قوناقتار مەن اقىننىڭ ءومىرى مەن شىعارماشىلىعىن زەرتتەۋگە ۇلەس قوسقان ءىس- شاراعا قاتىسۋشىلارعا ءتوس بەلگىلەرى تابىس ەتتى.
