توقايەۆ الەۋمەتتىك جەلىلەردەگى جالعان اقپاراتتار تۋرالى ايتتى
بۇل تۋرالى بۇگىن پارلامەنت سەناتىنىڭ ءتوراعاسى قاسىم-جومارت توقايەۆ ايتتى، دەپ حابارلايدى قازاقپارات.
«ءتورتىنشى ونەركاسىپتىك ريەۆوليۋتسيا ءداۋىرى قوعام مەن ب ا ق الدىنا بيىك مىندەتتەر قويىپ وتىر. تەحنولوگيالىق، ەكونوميكالىق جانە الەۋمەتتىك اۋقىمدى وزگەرىستەر بۇرىنعى ادەتتەر مەن تاپتاۋرىن كوزقاراستاردان ارىلىپ، جاڭاشا ويلاۋدى تالاپ ەتەدى. پرەزيدەنت ءوزىنىڭ جولداۋىندا سيفرلىق تەحنولوگيالاردىڭ دەندەپ ەنۋىنە بايلانىستى قازاقستاندىقتاردى جاھاندىق وزگەرىستەر مەن قاتەرلەرگە دايىن بولۋعا شاقىردى. سوندىقتان سيفرلاندىرۋ يدەياسىنىڭ ءمان-ماڭىزىن قالىڭ بۇقاراعا جەتكىزۋدە جۋرناليستەرگە اسا جاۋاپتى مىندەت جۇكتەلىپ وتىر. تەحنولوگيالىق تۇرعىدان جاڭارۋ بۇقارالىق اقپارات قۇرالدارىنا دا اسەر ەتۋدە»، - دەدى ق. توقايەۆ سەناتتا بايلانىس جانە اقپارات سالاسى قىزمەتكەرلەرىنىڭ مەركەسىنە وراي وتكەن سالتاناتتى جيىندا.
ونىڭ سوزىنە قاراعاندا، بۇگىنگى كۇنى ءداستۇرلى ب ا ق- تى الەۋمەتتىك جەلىلەردەن ءبولىپ تاستايتىن شەكارالار دا ازايىپ بارادى. قازىرگى كەزدە گازەتتەردىڭ، تەلەارنالار مەن راديو ستانسالاردىڭ ەلەكتروندى نۇسقاسىنىڭ بولۋى زاڭدى. ولار ءتىپتى، ءداستۇرلى اقپارات قۇرالدارىنان دا تانىمال بولۋدا.
«قازىرگى كەزدە اقپارات اعىمدارى ءۇشىن مەملەكەتتىك شەكارا ۇعىمى جوق. جاڭا جاعدايدا جاعىمسىز قۇبىلىستاردى ايلا-شارعىمەن جاعىمدى ەتىپ كورسەتىپ، قوعامدىق وڭ پىكىر قالىپتاستىرۋ قاۋپى كۇرت ءوسىپ بارادى. ساراپشىلار باقىلانبايتىن الەۋمەتتىك جەلىلەردە جالعان جاڭالىقتار مەن تەرىس ناسيحاتتىڭ دەندەپ كەتۋى تۋرالى ەسكەرتىپ وتىر. ازعىرۋ مەن ارباۋعا نەگىزدەلگەن مۇنداي اقپارات ساياسي ماقساتتاردا ءجيى قولدانىلادى»، - دەپ توقتالدى توقايەۆ.
ونىڭ پايىمىنشا، بۇگىنگى الەۋمەتتىك جەلىلەر ارقىلى تارايتىن ءجونسىز اقپارات زامانىندا مۇنداي قاۋىپتى قۇبىلىستار ەل ىشىندە بەلەڭ الۋى مۇمكىن.
«مەنىڭ ويىمشا، قازاقستاندىق باق الەمدەگى ەڭ جوعارى ستاندارتتاردى باعدارعا الۋى ءتيىس. ەلباسى ەلىمىزدىڭ ءداستۇرلى قۇندىلىقتارىن ساقتاي جانە ۇلىقتاي وتىرىپ، قوعامنىڭ رۋحاني ءومىرىنىڭ جاڭارۋىنا باعىتتالعان «رۋحاني جاڭعىرۋ» تۇجىرىمداماسىن جاريالادى. وسى تۇجىرىمدامانى ىسكە اسىرۋدا اقپارات قۇرالدارىنىڭ ءرولى ەرەكشە. يدەولوگيالىق كەڭىستىكتى ۇلتتىق الەمدەرگە ءبولۋ ۇردىستەرى تۋىنداپ تۇرعان كەزدە - «رۋحاني جاڭعىرۋ» تۇجىرىمداماسىنىڭ قازاقستان ءۇشىن ماڭىزى زور»، - دەدى سەنات ءتوراعاسى.
وسى ورايدا، ول مەملەكەت باسشىسىنىڭ «ەگەمەن قازاقستان» گازەتىندە جارىق كورگەن باعدارلامالىق ماقالاسىنان كەيىن، ءبىرقاتار جوبالار بويىنشا اۋقىمدى جۇمىستار اتقارىلعانىن ەسكە سالىپ ءوتتى.
«رۋحاني جاڭعىرۋ» قوعامدى قىزۋ قولداۋ تاپتى جانە ونى بەلسەندى تۇردە جالعاستىرۋ ءۇشىن اۋقىمدى ىستەردى اتقارۋىمىز قاجەت»، - دەپ ءتۇيدى قاسىم-جومارت توقايەۆ.
