قازاقستاندىقتاردىڭ كوبى بيىل دەمالىس ءۇشىن ىستىقكولدى ەمەس، الاكولدى تاڭداعان
ايتا كەتەيىك، ءبىر اي بۇرىن الاكول اۋدانىنا مەملەكەت باسشىسى جۇمىس ساپارىمەن باردى. سوندا نۇرسۇلتان نازاربايەۆ «الاكولدىڭ قازاقستانداعى ەڭ ءجيى باراتىن ورىن بولۋى ءتيىس» ەكەندىگىن اتاپ وتكەن ەدى. ول ءۇشىن «نۇرلى جول» باعدارلاماسى اياسىندا رەسپۋبليكالىق جانە جەرگىلىكتى ماڭىزى بار تاسجولدار قۇرىلىسى بەلسەندى ءجۇرىپ جاتىر.
الاكولدىڭ تۋريستىك بازاسىنا جول تارتۋ ءۇشىن اقشى اۋىلىنا دەيىن پويىزبەن بارۋعا بولادى. جول ءجۇرۋ ۋاقىتى ءبىر تاۋلىكتەن از، ءبىراق پويىزدار الماتىدان بەلگىلى ءبىر كۇندەرى قاتىنايدى. تاياۋدا ءۇشارال قالاسىندا اۋەجاي اشىلدى. ەندى الاكول جاعالاۋىنا ءبىر جارىم ساعاتتا ۇشىپ بارۋعا مۇمكىندىك بار.
دەمالىس ايماعى ورنالاسقان جەردە قالتانىڭ قالىڭدىعىنا قاراي ءتۇرلى تۋريستىك بازالار قىزمەت كورسەتەدى. مۇندا 5 مىڭ تەڭگەدەن باستالاتىن ەكونوم كلاسس نومىرلەرى دە، 35-95 مىڭ تەڭگە ارالىعىنداعى ليۋكس قوناقۇيلەر دە بار.
ايتا كەتكەن ءجون، بيىل الاكولدە دەمالىپ جاتقان تۋريستەر ىستىقكولدى ەمەس، جەرگىلىكتى سۋايدىندى تاڭداعان. ولار ءوز تاڭداۋلارىن باعانىڭ قولجەتىمدىلىگى مەن كولدىڭ ەمدىك قاسيەتىمەن ءتۇسىندىردى.
«مۇندا سۋدىڭ ەمدىك قاسيەتى بار. اللەرگيا، سەزىمتال تەرى ماسەلەلەرى بىرنەشە رەت سۋعا تۇسكەننەن كەيىن كەتەدى. ءبىز دوستارىمىزبەن بىرگە كەلدىك. الاكولگە بىردەن عاشىق بولدىق. مۇندا ءۇشىنشى رەت كەلىپ وتىرمىز»، - دەدى تۋريستەر.
قازىرگى تاڭدا 180 دەمالىس ايماعى تۋريستەردى قابىلداۋعا دايىن. مۇنىمەن توقتاپ قالمايمىز، دەپ اتاپ ءوتتى اۋدان اكىمشىلىگىنەن. تۋريستەرگە ارنالعان باسقا دا ورىنداردىڭ قۇرىلىستارى ءجۇرىپ جاتىر.
الاكول اۋدانىندا تۋريستىك قىزمەت كورسەتۋ كولەمى 2017-جىلى 3,5 ميلليارد تەڭگەنى قۇراعان، بۇل 2014-جىلمەن سالىستىرعاندا 8 ەسە كوپ.
