ساق كينوستۋدياسىنىڭ مۋلتفيلمدەرى بالالارعا تەگىن كورسەتىلەدى
ءۇش كۇندىك شارا اياسىندا استانالىق بالعىندارعا وڭتۇستىك قازاقستاننىڭ تاريحي-كيەلى جەرلەرىن ناسيحاتتايتىن مۋلتفيلمدەر كورسەتۋ جوسپارلانعان.
«بيىل استانا اكىمدىگى جىلداعىداي وڭىرلەردى ارنايى شاقىرعان جوق. دەسە دە، و ق و اكىمدىگى باستاما كوتەرىپ، ەلوردا حالقىنا ءۇش كۇن بويى مادەني شارالاردى ۇسىنادى. وقۋشىلار سارايىندا جانە قالاداعى ءبىرقاتار بالاباقشالاردا «ساق» كينوستۋدياسى تۇسىرگەن انيماتسيالىق فيلمدەردىڭ كورسەتىلىمى وتەدى. وتكەن جىلى بۇل ستۋديا «كۇش اتاسى - قاجىمۇقان»، «وتىراردى قورعاۋ»، «كيەلى قازىعۇرت» اتتى 3 انيماتسيالىق فيلم مەن 10 سەريالى «كونە جەتىگەن سىرى» تەلەحيكاياسى تۇسىرگەن بولاتىن. جىل باسىندا بۇل جوبالار وڭتۇستىك قازاقستان وبلىسىنىڭ بارلىق اۋدان-قالالارىندا كورسەتىلدى، ديسكىلەرى تاراتىلدى. ەندى ەلوردالىق بالالارعا تارتۋ رەتىندە اكەلىپ وتىرمىز» ، - دەدى وقو مادەنيەت جانە تىلدەردى دامىتۋ باسقارماسى باسشىسىنىڭ مىندەتىن اتقارۋشى اسىلحان تەمىرحان وقۋشىلار سارايىندا وتكەن انيماتسيالىق فيلمدەر كورسەتىلىمىندە.
«وتىراردى قورعاۋ» فيلمىندە اڭىزعا اينالعان كونە وتىرار قالاسىنىڭ تۇرمىس-تىرشىلىگى مەن مادەنيەتى ەكى بالانىڭ حيكاياسى ارقىلى سۋرەتتەلەدى. ال «كيەلى قازىعۇرت» - نۇق پايعامبار كەمەسىنىڭ قازىعۇرتقا توقتاۋى تۋرالى اڭىزدى باياندايدى. مۋلتفيلمدەردى «بالاپان» تەلەارناسى ارقىلى بارشا رەسپۋبليكا بالالارىنا كورسەتۋ جوسپارلانعان.
بۇدان بولەك، 2018-جىلى وڭتۇستىك قازاقستان وبلىسى اكىمدىگىنىڭ قولداۋىمەن «تولە بي» 10 سەريالى كينوحيكاياسىن، «تۇركىستان»، «وقسىز وقيعاسى»، «ورداباسى - بىرلىكتىڭ تۋى» اتتى انيماتسيالىق فيلمدەر ءتۇسىرىلىپ جاتىر. ءتورت جوبا دا جىل سوڭىنا دەيىن اياقتالىپ، كورەرمەن نازارىنا ۇسىنىلماق.
اكىمدىك وكىلىنىڭ ايتۋىنشا، استاناداعى وقو مادەني كۇندەرى اياسىندا 19- ماۋسىمدا كونگرەسس حولل فويەسىندە ۇلكەن كەشەندى كورمە ۇيىمداستىرىلادى. كەشكى 19:00-دە «اسقاقتاي بەر، استانا» اتتى وڭتۇستىك قازاقستاندىق ونەر شەبەرلەرىنىڭ مەرەكەلىك كونسەرتى وتەدى. سونىمەن بىرگە، 20- ماۋسىم كۇنى ەتنواۋىلدا «شارىقتاي بەر، وڭتۇستىكتىڭ اندەرى-اي» ۇلكەن مەرەكەلىك كونسەرتپەن مادەني شارالار لەگى جابىلادى.
ايتا كەتەيىك، ساق كينوستۋدياسى «تومپاق»، «قالقانقۇلاق» سەريالدارىمەن، «قازاق ەلى»، «تەكە مەن قوشقار» انيماتسيالىق فيلمدەرىمەن تانىمال. بۇگىنگە دەيىن كينوستۋديا 60-قا جۋىق انيماتسيالىق جانە 6 تولىقمەتراجدى فيلم تۇسىرگەن.
