اتىراۋدا «اقىلدى شامدار» ورناتىلۋدا
وڭىرلىك كوممۋنيكاتسيالار قىزمەتىنىڭ حابارلاۋىنشا، وسى كەزدە اتىراۋ قالاسى مەن ونىڭ ماڭىنداعى ەلدى مەكەندەرگە جارىق شامدارىن جۇرگىزۋ جۇمىستارى ءجۇرىپ جاتىر. جىل باسىنان باستاپ LED- شامدارى ىسكە قوسىلۋدا.
«LED- شامدارىنىڭ ەرەكشەلىگى، ونى قۋات كوزىنىڭ تۇسەتىن اۋماعىنا قاراي ازايتىپ نەمەسە كوبەيتۋگە بولادى. سونداي-اق، بۇل شامداردى ارنايى قاداعالايتىن ديسپەتچەرلىك پۋنكت جۇمىس ىستەيدى. ولار ەلەكتروندى جۇيەدە شامداردىڭ جانىپ نەمەسە جانباي تۇرعانىن انىقتاي الادى. جاڭا جوبانىڭ مەرزىمى 10 جىل»، - دەيدى وبلىستىق ەنەرگەتيكا جانە تۇرعىن-ءۇي كوممۋنالدىق شارۋاشىلىعى باسقارماسى باسشىسىنىڭ ورىنباسارى مۇرات يعاليەۆ.
2017-جىلدان باستاپ «اتىراۋ قالاسىنداعى كوشە جارىعى جەلىسىنىڭ قۇرىلىسى جانە پايدالانۋ» جوباسى ىسكە اسىرىلىپ كەلە جاتىر. اتالعان جوبا بويىنشا اتىراۋ قالاسىنىڭ 39 كوشەسىن جارىقتاندىرۋ جوسپارلانعان. قۇرىلىس جۇمىستارى 2 كەزەڭگە بولىنگەن.
«2017-جىلى LED- شامدارى 19 كوشەگە جۇرگىزىلگەن بولسا، بيىلعى جىلى 20 كوشە جارىقتاندىرىلماق. تاعى دا قالانىڭ سىرتىنداعى 7 كوشەگە جارىق شامدارىن ورناتۋ جوسپاردا بار. بۇل جوبالار وسى جىلدىڭ سوڭىندا اياقتالىپ، تاپسىرىلاتىن بولادى»، - دەيدى وبلىستىق ەنەرگەتيكا جانە تۇرعىن-ءۇي كوممۋنالدىق شارۋاشىلىعى باسقارماسى باسشىسىنىڭ ورىنباسارى مۇرات يعاليەۆ.
