ەلوردادا دومبىرا مۋزەيى اشىلادى
بۇل تۋرالى بۇگىن ۇلتتىق دومبىرا كۇنىنە ارنالعان باسپا ءسوز ءماسليحاتىندا استانا قالالىق مادەنيەت باسقارماسىنىڭ باسشىسى بولات ماجاعۇلوۆ ايتتى، دەپ حابارلايدى قازاقپارات ءتىلشىسى.
«ۇلتتىق دومبىرا كۇنى جىل سايىن شىلدە ايىنىڭ ءبىرىنشى جەكسەنبىسىندە اتالىپ وتىلەتىن بولادى. بيىل مەرەكە 1 -شىلدەگە ءتۇسىپ تۇر. بۇل كۇنى قازاق ەلى مونۋمەنتى الدىنداعى الاڭدا حالىقتىق سەرۋەن وتەدى. العاش رەت تويلاناتىن اتاۋلى وقيعا ەلوردامىزدىڭ 20 -جىلدىعىمەن تۇسپا- تۇس كەلىپ وتىر»، - دەدى باسقارما باسشىسى.
ونىڭ ايتۋىنشا، ەلوردامىزدىڭ باستى الاڭىندا ونەر مەن مۋزىكا ساڭلاقتارى جينالادى. شارا اشىق اسپان استىندا وتەدى جانە ۇلكەن- كىشىنىڭ، جاس-كارىنىڭ باسىن قوسادى.
«دومبىرا سەكىلدى باسقا ەشبىر مۋزىكالىق اسپاپ ۇلتىمىزدى وسىلاي بىرىكتىرىپ، رۋحىمىزدى كوتەرە المايدى. ۇلتتىق دومبىرا كۇنىن مەرەكەلەۋ اياسىندا استانادا كيىز ۇيلەر تىگىلىپ، دومبىرانىڭ مۇراجايى اشىلادى. ول جەردە دينا نۇرپەيىسوۆا، قۇرمانعازى، احمەت جۇبانوۆ سىندى تۇلعالاردىڭ دومبىرالارى سەكىلدى مەموريالدى- ەكسپوناتتار كوپشىلىكتىڭ نازارىنا ۇسىنىلادى. ونىڭ ىشىندە شەرتپەلى، ۇرمەلى، ۇرمالى اسپاپتار دا بار. كەلۋشىلەر دومبىرا جاساۋ بويىنشا دارىستەرگە قاتىسا الادى»، - دەدى بولات ماجاعۇلوۆ.
ەستەرىڭىزگە سالا كەتسەك، 13 -ماۋسىم كۇنى مەملەكەت باسشىسى نۇرسۇلتان نازاربايەۆتىڭ جارلىعىمەن شىلدەنىڭ ءبىرىنشى جەكسەنبىسى ۇلتتىق دومبىرا كۇنى بولىپ بەلگىلەندى.
