قالاي ميلليونەر بولماۋ كەرەك؟
ءبىر كۇنى ۇيقىدان ويانا سالا ميلليونەر بولعىڭىز كەلدى. بۇل وي بۇرىننان دا ءجيى مازالايتىن، ءبىراق ءدال وسى كۇنى ءساتى كەلىپ تۇرعانداي كورىندى. سول كەزدە مىناداي ارەكەتتەرگە بارماڭىز.
جۇمىستى بۇرىنعىدان دا كوپ ىستەۋ
تابىسىڭىز بۇرىنعىدان ءسال ارتار، ءبىراق اقشادان دا ماڭىزدى قۇندىلىقتارىڭىز تاسادا قالىپ قويماي ما؟ ەشقانداي بوس ۋاقىتىڭىز بولمايدى، ونىڭ بارلىعىن جۇمىسقا جۇمسايسىز. دەمالىس كۇنىن ۇمىتىپ قالاسىز. وتباسىڭىزعا ءسىزدى كورۋ، سويلەسۋ ارمان بولادى، ال ءوز ءتۇرىڭىزدى ايندان تەك كوز ىسكەن، ءوڭى قاشقان، قالجىراپ بىتكەن كەيىپتە كورەسىز. ۇزدىكسىز جۇمىسقا جەكسە، جىلقى دا ولەدى. مۇمكىن، ازداعان اقشا جينالار، ءبىراق ءومىر سولاي وتە بەرەدى. ءوز دەنساۋلىعىڭىز بەن وتباسىڭىزدى ساقتاڭىز. ارينە، جۇمىس ىستەۋ كەرەك. ءبىراق ول وتباسىڭىز بەن وزىڭىزدەن الدىڭعى ورىنعا شىعىپ كەتپەۋى ءتيىس. ءبىر ىسكە دەگەن اسقان قۇلشىنىس، تولعان ەنەرگيا ۇزاق ۋاقىتقا بارمايدى.
ينتەرنەت بەتتەرىن پاراقتاپ، «ميلليونەر بولۋدىڭ 1001 ءادىسى» دەگەن جازبالار وقۋ
ينتەرنەت - قارىم قاتىناس پەن اقپارات الماسۋعا ارنالعان بۇقارالىق الاڭ. بۇل جەردە «بۇقارالىق» دەگەن سوزگە باسا نازار اۋدارىڭىز. ينتەرنەت قولدانۋشىلاردىڭ 99 پايىزى ءدال ءوزىڭىز سەكىلدى قاراپايىم ادامدار. ولاردىڭ سىزگە ۇيرەتكىسى كەلىپ جازعان اقىلىن ءوزىڭىز دە بىلەسىز. تەگىن اس قاقپاندا عانا بولاتىنىن ەستەن شىعارماڭىز.
ينتەرنەتتە ءارتۇرلى پيراميدالارعا كىرۋ نە ينتەرنەت- كازينو ويناۋ
كەز كەلگەن پيراميدانىڭ تۇپكى ماقساتى ءار جاڭا قاتىسۋشى ەسەبىنەن بايۋ. ەگەر سىزگە باستاپقى سوماعا 100-1000 تەڭگە قۇيۋ ارقىلى ميلليونەر بوپ كەتۋدى ۇسىنسا، ءسىز سەكىلدى 1000 ادام 1000 تەڭگەدەن قوسقاندا عانا ميلليون شىعاتىنىن ەستە ۇستاڭىز. بۇل قۇرىققا تۇسسەڭىز، ارى قاراي ءوزىڭىز سەكىلدى 1000 اقىماقتى الداۋعا ءداتىڭىز جەتەر مە ەدى؟ ال قۇمار ويىنداردىڭ جايى دا تۇسىنىكتى. ومىردەگى ەڭ سوڭعى اقىماق قانا ادال ويىن اۆتوماتىن نە باعدارلاماسىن قويۋى مۇمكىن. كەز كەلگەن «سىڭارقولدى الاياقتىڭ» كوزدەگەنى كەزدەيسوق ۇتىس ەمەس، حالىقتان جىمقىرىپ، ءوزى پايدا تابۋ. ويىن سايتتارى تۋرالى ايتۋدىڭ ءوزى ارتىق. ينتەرنەتتە تاجىريبەمەن كەلگەن ءوز سايتىڭ نە بلوگىڭ بولماسا، وزگە جولمەن اقشا تابۋىڭىز ەكىتالاي. ۆيدەوداعى كورىلىم ارقاسىندا كەلەتىن جارنامادان عانا تيىن- تەبەن ءتۇسۋى مۇمكىن، باسقالارى بوس ءسوز.
الدىڭعى پۋنكتىڭ جالعاسى رەتىندە ءباس تىگۋدى ايتساق بولادى. بۋكمەكەرلىك ورتالىق جۇمىس ىستەپ تۇر ما، دەمەك ءباس قويعانداردىڭ كوپشىلىگى ۇتىلىپ، بۋكمەكەر يەسى تابىسقا كەنەلىپ جاتىر دەگەن ءسوز. ءوز بۋكمەكەرى بار ادامنان باسقا ءباس تىگۋ ارقىلى پايدا تاباتىن بىردە ءبىر ادام جوق شىعار. كەيدە قوماقتى ۇتىسقا كەنەلەتىندەر بار، ءبىراق ولار وعان دەيىن قانشا شىعىنعا ۇشىراعانىن كىم ءبىلسىن؟ ! قالاي بولعاندا دا قۇمار ويىننىڭ اتى قۇمار ويىن، ول ادامدى ودان سايىن قۇردىمعا الىپ كەتپەسە، باسقا پايداسى جوق. ماڭداي تەرمەن كەلمەگەن وڭاي اقشانىڭ بەرەكەسى جوق.
دۇكەنگە جۇگىرىپ، «باي اكە، كەدەي اكە» نە «ميلليوندى تۇسىندە دە كورمەگەندەرگە 1-اي ىشىندە بايۋ» دەگەن سەكىلدى كىتاپتار ساتىپ الۋ «ميلليونەر بولۋ ءۇشىن» دەگەن كىتاپ اۆتورلارى سول تۋىندى مازمۇنىندا ايتىلعان ادىستەر مەن كەڭەستەر ارقىلى ەمەس، وسى كىتاپتاردى ساتۋ ارقىلى بايىعان. مۇنداي كىتاپتى وقىعاندا تەك تەز كەلەتىن ميلليوندار تۋرالى ءتاتتى قيالعا باتاسىز، ناتيجەسىندە تۇك شىقپايدى.
ەشقانداي تاجىريبەسىز، جوعارى ءبىلىمسىز ۇيدە وتىرىپ اقشا تابۋ
ماماندىقتىڭ ءتۇر- ءتۇرى بولادى. ۇيدە وتىرىپ- اق جاقسى تابىس تاباتىندار دا بار. ءبىراق مۇنداي جارناما بەرۋشىلەر ادەتتە جۇمىستىڭ ءوزى تۋرالى ءتىس جارىپ ەشتەڭە جازبايدى - بۇل دا كەزەكتى وتىرىك.
قانداي ىسپەن اينالىساتىنىن كورسەتپەي جاتىپ، قوماقتى جالاقى ۇسىنىپ قىزمەتكەر ىزدەۋدىڭ نە ءمانى بار؟ ولاردىڭ بار ماقساتى - ادامنىڭ سەنىمىنە كىرىپ، وزىنە جۇمىس ىستەتۋ.
بيزنەس باستاۋعا نەسيە الۋ نە قارىزعا اقشا سۇراۋ
باستاپقى كاپيتالسىز ءىس باستاۋ قيىن، ارينە. ءبىراق ەگەر يدەيا جاقسى بولسا، ول ونسىزدا جۇزەگە اسادى. ال يدەيا ناشار بولسا، العان نەسيەڭىز جەلگە ۇشىپ كەتەدى. اقشانى جيناپ، بيزنەسكە ينۆەستيتسيا جاساۋ كەرەك، ءبىراق بۇل قارىزعا الىنعان نە سوڭعى اقشا ەمەس، ارتىق مولشەردە جينالعان، تاۋەكەلگە بەل بۋۋعا تۇرارلىق قاراجات بولۋى ءتيىس.
ءوزىڭىز سەكىلدى جاقىنىڭىزدى جۇمىسقا تارتۋ
ءبىر نارسەنى باستاۋ جالعىز وزىڭىزگە قيىن كورىنۋى مۇمكىن. مۇنداي جاعدايدا جاقىن دوسىڭىزدىڭ نە تۋىسىڭىزدىڭ قولداۋىن قاجەت ەتىپ، ونىمەن سەرىكتەس بولۋدى قالايسىز. ول قازىر ءسىزدىڭ جاقىن دوسىڭىز. ەگەر شىنىندا دا ميلليونەر بوپ كەتسەڭىز، ول باسەكەلەسىڭىزگە، دۇشپانىڭىزعا دا اينالىپ كەتۋى ىقتيمال. جاقىن قارىم- قاتىناستى بۇزعىڭىز كەلمەسە، بارلىعىن ءوزىڭىز باستاۋعا تۋرا كەلەدى.
يدەياڭىزدى بىرەۋمەن ءبولىسۋ
الەمدە كوپ اقشا ونەركاسىپتىك تىڭشىلىقپەن بايلانىستى. باسەكەلەستەر ءبىر- ءبىرىنىڭ جوسپارىنىڭ سىرىن اشقىسى كەلەدى. ەگەر جاي عانا اڭگىمە اراسىندا وزگە بىرەۋگە يدەياڭىزدى ايتىپ قويساڭىز، كۇندەردىڭ كۇنىندە ونى بىرەۋدىڭ جۇزەگە اسىرعانىنا كۋا بولاسىز. تاعى ءبىر ءادىس، ماقالانى وقىعاننان كەيىن وسى كەڭەستەردى تىڭداماۋ. ساتتىلىك تىلەيمىز!
Massaget.kz
