قازاقستاندا مال وسىرەتىن فەرمەرلىك شارۋاشىلىقتاردىڭ سانىن بەس ەسەگە ارتتىرۋ كوزدەلىپ وتىر
بۇل تۋرالى حالىققا ەسەپ بەرۋ كەزدەسۋىندە ق ر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى ءومىرزاق شوكەيەۆ ءمالىم ەتتى، دەپ حابارلايدى قازاقپارات ءتىلشىسى.
«اۋىل شارۋاشىلىعى باعىتىندا قازاقستاننىڭ ەكسپورتتىق الەۋەتى بار پوزيتسيالاردى ايقىنداپ الدىق. وسىنى باعدامداپ وتىرساق، قازاقستاننىڭ ەكسپورتتىق الەۋەتىنىڭ ەڭ جوعارىسى - ەتتى مال شارۋاشىلىعى. قازىرگى تاڭدا اۋىل شارۋاشىلىعىنىڭ جانە وڭدەلگەن ازىق-تۇلىكتىڭ بارلىق ەكسپورتى 1,4 ميلليارد تەڭگەنى قۇراپ وتىر. ال ەتتى مال شارۋاشىلىعى تۇرعىسىنان بىزدەگى الەۋەت 2,6 ميلليارد تەڭگەنى جەتەدى»، - دەيدى مينيستر.
ءومىرزاق شوكەيەۆىڭ ايتۋىنا قاراعاندا، ەتتى مال شارۋاشىلىعىن دامىتۋدىڭ نەگىزىن شاعىن وتباسىلىق، شارۋاشىلىق - وتباسىلىق فەرمالار قۇرايدى.
«باعدارلاما ۇلكەن كومپانيالارعا قاتىستى دەسەڭىز، بۇل شىندىققا سايكەس كەلمەيدى. بۇل - وتباسىلىق فەرمالار تۋرالى باعدارلاما. ءدال وسى رەتتە ءبىزدىڭ باعىت ولارعا كومەك قولىن سوزۋدان تۇرادى. ا ق ش، كانادا، اۆستراليا، ارگەنتينا، ۋرۋگۆاي سەكىلدى دامىعان ەلدەردە ءوزىنىڭ تيىمدىلىگىن ايقىن دالەلدەگەن مودەلدى ۇستانىپ وتىرمىز. ءبىراق، دەسە دە ءقازىر قازاقستاندا 150 اسىل تۇقىمدى شارۋاشىلىق بار. ءبىزدىڭ مىندەت - ولاردىڭ سانىن ون جىلدىڭ ىشىندە 310 عا دەيىن ارتتىرۋ بولىپ تابىلادى. بولا ما، بولادى. ءىرى قارا مالدى ۇستايتىن 16 مىڭ فەرمەرلىك شارۋاشىلىق، ۇساق مال ۇستايتىن 4 مىڭ فەرمەرلىك شارۋاشىلىق بار. بارلىعى - 20 مىڭ. ءبىزدىڭ تاپسىرما - ولاردىڭ سانىن 10 جىلدا 100 مىڭعا دەيىن جەتكىزۋ»، - دەيدى مينيستر.
ءومىرزاق شوكەيەۆ بۇگىنگى كۇنى قولدا بارىمىزدى دامىتۋمەن اينالىسىپ جاتقانىن تىلگە تيەك ەتتى. سونىمەن قاتار، ءمينيستردىڭ ايتۋىنشا، مال بورداقىلاۋ الاڭىن سوڭعى 10 جىلدا 30 مىڭنان 50 مىڭعا دەيىن جەتكىزۋ جوسپارلانىپ وتىر.
