شەكتەن شىققان شىعارماشىلىق داعدىلار
جازۋ جۇرەك تۇيسىنگەن سەزىم مەن ويلاردىڭ قاعازعا قۇيىلۋى دەيدى.
الايدا وسى ءۇردىستىڭ ءوزى دە ءارتۇرلى قالامگەردە ءار الۋان ءتۇس الىپ جاتادى ەكەن. جازۋعا دەگەن جان قالاۋى بىرەۋدە اۋا- رايىنا، مەرزىمگە بايلانىستى بولسا، ەندى بىرەۋدە اۆتوردىڭ ايرىقشا ورتا مەن جاعدايدى قاجەت ەتۋىنەن كورىنەدى.
ال تاعى ءبىر جازۋشىلار ءوز ويىنداعى شىعارماسىن جازۋدا مۇلدەم بايىبىنا بارماس ەرسى ارەكەتتەرگە دە بارىپ جاتادى ەكەن. بارىنە بىردەي ءتان بولماعانىمەن، باسىم كوپ ساندى شىعارماشىلىق يەسىنىڭ وزىندىك جازۋ قالپى مەن ادەت-داعدىلارى بار بولسا كەرەك. وسى ەرەكشەلىكتەر جازۋشىنىڭ مىنەز- بولمىس جانە باسقا دا قاسيەتتەرىنەن حابار بەرىپ تۇرعانداي. تومەندە كەيبىر قالامگەرلەردىڭ تانىس تا بەيتانىس شىعارماشىلىق داعدىلارىن اتاپ وتكىم كەلەدى.
تاعامنىڭ تاڭعاجايىپ اسەرى
كەيبىر قالامگەرلەردىڭ شىعارماشىلىعىنا ءدامدى تاعامدار مەن ءيىستىڭ ىقپالى از ەمەس. اگاتا كريستي وسى ايتقانىمىزدىڭ ايقىن مىسالى بولا الار ەدى. ايتالىق، ونىڭ شىعارمالارىنداعى كەيىپكەرلەر - مارپل بيكەش پەن ىزكەسەر پۋارو مىرزانىڭ شاي مازىرىنەن كورىنىس تاباتىن كرەمدى توقاشى، شىنتۋايتىندا، اگاتا كريستيدىڭ ءوزىنىڭ ءسۇيىپ جەيتىن دەسسەرتى بولاتىن.
جازۋشى اگاتا كريستي جۇمىس ۇستىندە
ول جازۋمەن اينالىسقاندا ۇنەمى كرەم قوسىلعان توقاشتى جازۋ ماشينكاسىنىڭ جانىنا قويىپ، سونىڭ ءتاتتى دامىنەن شابىت العان دەسەدى.
قالامگەردىڭ نەمەرەسى ءبىر ەستەلىگىندە اگاتا كريستيدىڭ ۇلكەن كەسەدەن كرەم جەيتىنىن ايتادى. ءوزىنىڭ شامادان تىس كوپ جەۋىن تەجەۋ ءۇشىن كەسەنىڭ سىرتىنا «اشقاراقتانۋعا بولمايدى!» دەپ جازىپ قوياتىنىن ەسكە الادى نەمەرەسى.
كرەمنەن بولەك، اگاتانىڭ شىعارماشىلىقتاعى تاعى ءبىر داعدىسى - ۆاننادا جاتىپ الما جەۋ. ول ءبىر جاعى الما جەي وتىرىپ، دەتەكتيۆتەرىنىڭ شىتىرمان سيۋجەتتەرىن ويلاستىرادى ەكەن. جازۋشى ءوزىنىڭ بۇل ادەتىن سونداي-اق شىعارماسىنداعى ىزكەسەر پۋارونىڭ قاسىندا بىرگە ءىس جۇرگىزەتىن وليۆەر حانىمنىڭ بويىنان دا كورسەتەدى (بالكىم اۆتور بۇل كەيىپكەردى ءوزىنىڭ پروتوتيپى رەتىندە سومداپ، سول ارقىلى ءوز بولمىستارىن سىڭىرگەن دە بولار).
تۋىندىلارىنىڭ دۇنيەگە كەلۋىن تاعام جانە يىسپەن بايلانىستىرعان اگاتا دەتەكتيۆ اڭگىمەلەرىن جازۋدى اس ازىرلەۋمەن ۇقساتادى. ونىڭ ويىنشا، «دەتەكتيۆ جازۋ - سوۋس ازىرلەۋمەن بىردەي. بارلىق كەرەكتى ماتەريالداردىڭ بابىن كەلتىرىپ ارالاستىرساڭ بولعانى».
قاعازعا دەگەن ايرىقشا تالاپ
جازۋمەن، شىعارماشىلىقپەن اينالىساتىن قالامگەرلەر ءۇشىن قاعاز ەڭ قاجەتتى قۇرال. سوندىقتان وعان دەگەن تالاپ تا الابوتەن. ءتىپتى بۇل تۇرعىدا كەيبىر جازۋشىلاردى كىرپياز دەگەن سيپاتپەن دە بايلانىستىرۋعا بولاتىن ءتارىزدى. مىسالى، «لۋجين قورعانىسى»، «وشكەن الاۋ» قاتارلى كلاسسيكالىق تۋىندىلاردى ومىرگە اكەلگەن ۆلاديمير نابوكوۆتى وسى ساناتقا جاتقىزۋعا بولار ەدى. ول جازباسىن ءتورتبۇرىش كارتوتەكالارعا جازاتىن بولعان. بۇل وعان كەيبىر وقيعالار مەن سۋرەتتەۋلەردى حرونولوگيالىق رەتىن ساقتاماي- اق جازىپ قالدىرا بەرۋگە كوپ مۇمكىندىكتەر بەرەتىن. ال سوڭىنان جازبالاردى ءوزىنىڭ ەركى بويىنشا قايتادان تارتىپتەي الاتىن- دى. ۆلاديمير نابوكوۆ سونىمەن بىرگە كولىك ىشىندە وتىرىپ جازعاندى ۇناتىپتى. قاڭتارۋلى تۇرعان ماشينا ىشىندە كىتاپ وقۋ نەمەسە قالام ءتۇرتۋ ونى وزگە ورتادان الشاقتاتىپ، جانىنا جايلىلىق سىيلايتىن ءتارىزدى.
ۆلاديمير نابوكوۆ كەزەكتى شەديەۆرىن جازۋ ۇستىندە
تاعى دا ايتالىق، «باۆاري حانىم» تۋىندىسىمەن اتىن ايگىلەگەن فرانتسۋز جازۋشىسى فلوبەردىڭ قاعازعا قويار تالابى مۇلدەم ەرەكشە. شىعارما جازاردا ول ون جولدىق قاعازدىڭ تەك ءبىرىنشى جولىن عانا قارىنداشپەن جازىپ، قالعان توعىز جولىن بوس تاستايدى ەكەن. سول جىلدارى شىعارماشىلىقتا فلوبەردەن ۇلگى الىپ، ودان ورنەك ىزدەگەن موپاسسان جازۋشىدان قاعازدى نەگە سونشاما وبالدى ەتەتىنىن بىلمەك بولادى. سوندا فلوبەر: «مەنىڭ ىلعي دا ۇستاناتىن ءبىر داعدىم بار: ءبىر قاعازدىڭ ءبىرىنشى جولىنا عانا جازىپ، قالعان توعىز جولىن تۇزەتۋگە قالدىرامىن»، - دەگەن ەكەن.
مۇنداي مىسالداردان تاعى ءبىرىن كەلتىرسەك، فرانتسۋزدىڭ رومانتيزم باعىتىندا قالام تەربەگەن جازۋشىسى ديۋما دا ءوزى جازاتىن قاعازىنا ەلدەن ەرەكشە كوزبەن قاراپتى. ول پروزالىق شىعارمالارىن كوك ءتۇستى قاعازعا، ولەڭدەرىن سارى تۇستىگە، ال ماقالالارىن كۇلگىن ءتۇستى قاعازعا جازعان ەكەن. بىردە ساپارلاپ جۇرگەنىندە كوك ءتۇستى قاعازى تاۋسىلىپ قالعاندىقتان، شىعارماسىن اقسارى تۇستەس قاعازعا جازىپتى. ناتيجەسىندە كەيىننەن سول اڭگىمەسىنىڭ اڭىسى تىم شىركىن- اي بولماعانعا ۇقسايدى. بۇل جايت ونىڭ قاعازعا دەگەن ءوز ۇستانىمىن بەكىتە ءتۇستى دەسەدى.
وعاش سەنىمدەر
كەي-كەيدە قالامگەرلەر قيسىنى جوق، وعاش ارەكەتتەردى جازۋشىلىق داعدىعا اينالدىرىپ جاتادى. وعان مىسالدى نەمىس ادەبيەتىنىڭ كورنەكتى وكىلى شيللەردەن تابۋعا بولادى.
ايگىلى جازۋشى شيللەر جايلى گەتە بىردە ونىڭ ۇيىنە بارعانىن، الايدا ول ۇيىنە ءالى كەلە قويماعاندىقتان جازۋشىنىڭ جازۋ بولمەسىندە ونى كۇتە تۇرماقشى بولعانىن ايتادى. ارادا بىرەر ساتتەن كەيىن گەتە جايسىزدانىپ، باسى اينالا باستاعانىن سەزىنەدى. سويتسە شيللەر شكاف سۋىرمالارىنىڭ بىرىندە شىرىگەن الما ساقتايدى ەكەن. شىرىگەن المانىڭ «ەرەكشە» ءيىسى ارقىلى ول وزىنە شىعارماشىلىق شىبىت السا كەرەك.
شيللەر سياقتى ۇشقارى داعدىسى بولماسا دا، جازۋشىلىقتا وزىندىك نانىم ۇستاناتىن قالامگەردىڭ ءبىرى - ترۋمەن كاپوتە. كوپتەگەن گولليۆۋدتىق فيلمدەردىڭ ستسەناريسى كاپوتەدە وزىندىك ۇستاناتىن ەرەجەلەر بار ەكەن. ول جۇما كۇنى ەشقاشان تۋىندىسىنىڭ جاڭا تاراۋىن باستامايتىن جانە اياقتامايتىن بولعان. سونداي-اق قوناق ۇيگە قونعاندا بەرىلگەن بولمەنىڭ نەمەسە تەلەفون ءنومىرىنىڭ قاي- قايسىسىندا 13 سيفرى كەزدەسەتىن بولسا، باسقا بولمەگە اۋىستىرادى ەكەن. وعان قوسا كۇلسالعىش ىشىندەگى تەمەكى تۇقىلىن 3 تەن اسىرمايتىن بولعان. الدا-جالدا اسا قالسا، وندا تۇقىلدى كيىم قالتاسىنا سالا سالۋدان تايىنبايدى ەكەن.
ىرىمشىل ترۋمەن كاپوتە
ەگەر ءسىز چارلز ديككەنستىڭ شىعارماشىلىق ادەتىن ەستىگەنىڭىزدە جوعارىداعى شىرىك المانىڭ ءيىسىن سەزبەي دە قالار ما ەدىڭىز. انگليانىڭ اتى ءماشھۇر ايگىلى جازۋشىسى بىلايعى ومىردە كىسى ءتۇسىنىپ بولمايتىن شىعارماشىلىق ادەتتەرگە يە دەسەدى. ونىڭ دا سەبەپتەرى جوق ەمەس ەكەن. جازۋشى مەيلى قايدا ۇيىقتاسىن توسەگىنىڭ باسىن سولتۇستىككە قاراتاتىن بولعان. ونداعىسى تەمىرقازىق باعىتىنا قاراۋى ونىڭ شابىتىن شالىقتاتا تۇسسە كەرەك. مەتسمەل گيپنوزىن قولدانعاندى جاقسى كورەدى ەكەن ءارى ونى دوس- جاراندارىنا ەكسپەريمەنت رەتىندە جاسايتىن دەسەدى. سونعان قوسا جازۋشى شاشتارىنىڭ ۇيپالانىپ قالعانىن جەك كورىپتى. سول ءۇشىن تاراعىن كوزىنەن تاسا، قولىنان جىراق قىلمايدى دەسەدى. مۇنىڭ بارىنەن دە قىزىعى قالامگەر نەكروفيلياعا بەيىم بولىپ، بەيىتتەرگە بارعىسى كەلىپ تۇرادى ەكەن. ءوزى ايتتى دەگەنگە يلانساق، پاريجدە بولعانىندا ءوزى بارۋدى ويلاماسا دا، كوزگە كورىنبەيتىن ءبىر تىلسىم كۇش ەرىكسىز بەيىت پەن مازارلارعا جەتەكتەيتىن كورىنەدى.
پورترەت، بيۋست جانە اينا نەمەسە ۇستازدار مەن باقتالاستار
اعىلشىن جازۋشىسى، جۋرناليست سەباستيان فولكس ءوزىنىڭ ءاربىر كىتابىنىڭ «قورعاۋشىسى» بار دەپ ەسەپتەيدى. ويتكەنى ول جازۋعا وتىرعاندا قارسى قابىرعادا تولستوي مەن چارلز ديككەنستىڭ بيۋستتەرى جانە دجوردج ءورۋەللدىڭ پورترەتى تۇرادى ەكەن. ول شىعارماشىلىقپەن وسى قالامگەرلەردىڭ «كوز الدىندا» شۇعىلدانۋدى ءجون ساناپتى.
سونداي- اق وسىعان تەكتەس ادەت اعىلشىن اقىنى، جازۋشى، دراماتۋرگ ديلان توماستا دا كەزدەسەدى. ونىڭ شىعارماشىلىق بولمەسىندە ۋولت ۋيتمەن، لۋيس ماكنيس جانە ۋيستەن ودەن قاتارلى اقىنداردىڭ فوتوسۋرەتتەرى ءىلىنىپ تۇراتىن بولعان.
جازۋشى توماس ديلاننىڭ كابينەتى
نورۆەگ دراماتۋرگى گەنريك يبسەن شۆەد دراماتۋرگى اۆگۋست ستريندبەرگتى ءوزىنىڭ ەڭ ۇلكەن باقتالاسى ساناپتى. جانە ەڭ قىزىعى گەنريك جازۋعا وتىرعاندا ۇستەلىنىڭ ۇستىنە وسى باقتالاسىنىڭ پورترەتىن قويىپ قويادى ەكەن. ول وسىلاي جازعاندا عانا تاماشا تۋىندى جاراتا الام دەپ سەنىپتى.
رومەن روللاننىڭ جازۋ ۇستەلىندە اينا تۇرادى ەكەن. ول وسى اينادان ءوزىنىڭ بەت الپەتىندەگى وزگەرىستەردى مۇقيات باقىلاي وتىرىپ، شىعارماشىلىقپەن اينالىسىپتى.
الدەبىر زاتتى كەرەكسىنۋ
اعىلشىننىڭ ايگىلى اقىن، رومانيست جازۋشىسى روبەرت گرەيۆس جازۋ كابينەتىنە تەك قولدان جاسالعان بۇيىمداردى عانا قوياتىن بولعان. ونىڭ پىكىرىنشە، جازۋ بولمەسىندە قولونەر بۇيىمدارىنان تىس وزگە جاساندى دۇنيەلەردىڭ بولۋى وڭاشادا ويعا شومىپ، شابىتتىڭ كەلۋىنە كەدەرگى كەلتىرەتىنگە ۇقسايدى.
مۇنداي ادەت نيكولاس موسليدان دا كەزدەسەدى. ونىڭ جازۋ ۇستەلىنەن الەمنىڭ ءار ەلىنەن جينالعان ۇلتتىق بۇيىمدار كوللەكتسياسى ورىن الىپتى. ال نوبەل سىيلىعىنىڭ لاۋرەاتى، امەريكالىق جازۋشى دجون ستەينبەكتىڭ جازۋ ۇستەلىندە ۇدايى وتكىر ۇشتالعان 12 قارىنداش تۇراتىن بولعان. جازۋمەن كوپ شۇعىلداناتىنى سونشالىق ونىمەن جۇمىس جاساۋشى اگەنتتىك رەداكتورى ساۋساعى مۇيىزگەكتەنىپ كەتپەس ءۇشىن وعان 6 ءبۇيىرلى قارىنداشتى ەمەس، دوڭگەلەك قارىنداشتى دايىنداپ بەرەدى ەكەن.
جازۋشى دجون ستەينبەك
جاتىپ جازعاننان جان راحاتىن تاپقان
يرلانديالىق اقىن ءارى جازۋشى دجەيمس دجويس سوڭعى كەزدەرىندە ەڭبەكتەرىن ۇستىنە اق جامىلعى جامىلىپ، توسەگىندە ەتپەتتەپ جاتىپ جازاتىن بولعان. سوڭعى رومانى «فيننەگاندى ەسكە الۋدى» («Finnegans Wakە» ) بالاۋىز قارىنداشپەن كارتونعا جازىپتى. ارينە، بۇل ونىڭ تاماشا تۋىندى جاراتۋداعى ويلاپ تاپقان توسىن ءتاسىلى ەمەس، كەرىسىنشە مۇقتاجدىعىنان جاسالعان امالسىز قادامى ەدى. نە جازىپ وتىرعانىن انىق كورۋ ءۇشىن جازۋشى ۇلكەن بالاۋىز قارىنداشپەن جازعان. سەبەبى قالامگەردىڭ كورۋ قابىلەتى ناشارلاپ كەتكەن-دى. ال اق جامىلعى قاراڭعى تۇندە جارىقتى جاقسى قايتارادى دەپ تۇيسىنگەن.
بۇل مەزەتتە ترۋمەن كاپوتەنى جۇمىس جاساپ جاتىر دەگەنىنە سەنۋ قيىن)
الدىندا اتاپ وتكەن جازۋشى ترۋمەن كاپوتەنىڭ تاعى ءبىر ەرەكشەلىگى - ول شىعارمالارىن جاتىپ جازعان. «مەن تەك جاتىپ جازعاندا عانا تىڭ ويلارىممەن قاۋىشامىن» دەگەن ول توسەكتە نە ديۆاندا جاتىپ قالام تەربەگەن. تەك تەمەكىسى مەن كوفەسى مىندەتتى تۇردە جانىنان تابىلۋى كەرەك.
پۋليتسەر سىيلىعىنىڭ يەگەرى، جازۋشى ەديت ۋورتون تە توسەگىندە جاتىپ جازعاندى جانى ءسۇيىپتى.
تۇرىپ جازۋعا داعدىلانعاندار
بريتانيا مودەرنيزم ادەبي باعىتىنىڭ كورنەكتى وكىلى، جازۋشى ۆيردجينيا ۆۋلف تۇرىپ جازعاندى جاقسى كورىپتى. ونىڭ ءۇش جارىم اعىلشىن ميلىندەي بيىك جازۋ ۇستەلى قازىرگىمەن سالىستىرساق بايانداما جاسايتىن تريبۋنا بيىكتىگىمەن شامالاس بولار ەدى. جازۋشى بۇل داعدىسىن ءوزىنىڭ ۆانەسسا اتتى اپكەسىنەن العان ەكەن. ويتكەنى اپكەسى سۋرەتشى بولعاندىقتان ونىڭ تۇرىپ سۋرەت سالاتىنىنا قىزىققان ۆيردجينيا دا شىعارماشىلىقپەن تۇرىپ اينالىساتىن ادەت قالىپتاستىرىپتى.
ەگەر جولىڭىز ءتۇسىپ ۋيليام ۆوردسۆورتتىڭ مۇراجاي ۇيىنە بارا قالساڭىز بۇل رومانتيك اقىننىڭ دا تۋىندىلارىن تۇرىپ جازۋشىلار قاتارىنان ەكەنىن بايقايسىز. سەبەبى ونىڭ ءۇيىنىڭ قاي بولمەسىنەن دە جازۋ ۇستەلىن كوزىڭىز شالمايدى. اقىن شىعارمالارىن كوبىنە تەرەزەنىڭ جاقتاۋىندا كەسۆيك وزەنىنە كوز تاستاپ تۇرىپ جازعان ەكەن.
ال تۇرىپ جازۋ ادەتى، سونىمەن بىرگە، الەمگە ايگىلى جازۋشى ەرنەست حەمينگۋەيگە دە ءتان. قالامگەر شكافىنىڭ ۇستىنە جازۋ ماشينكاسىن قويىپ، ءوزى تۇرىپ جازادى ەكەن. جازۋشى ءتىپتى جۇمساق توسەكتى جاقتىرمايدى ەكەن. جازۋشى تەك ماشينكامەن ەمەس، قارىنداشپەن دە جازاتىن بولعان. اسا ءونىمدى كۇندەرى جازۋشى 7 قارىنداشقا دەيىن تاۋىسقان ەكەن.
حەمينگۋەيدىڭ جۇمىس بولمەسىندە ورىندىق بولماعان دەسەدى
سونىمەن بىرگە امەريكانىڭ اتاقتى اقىنى ۋوللەس ستيۆەنس تە وسى قاتاردان تابىلادى. ول ولەڭدەرىن سەرۋەندەپ ءجۇرىپ شىعارادى ەكەن. ونىسىن دەرەۋ قاعازعا ءتۇسىرىپ، كەيىن حاتشىسىنا تەرۋگە بەرەتىن بولعان.
ۇيشىكتە قالام تەربەگەن
دجوردج بەرنارد شوۋ جازۋمەن الاڭسىز اينالىسۋ ءۇشىن حارتفوردشيرداعى ءۇيىنىڭ باقشاسىندا ارنايى اعاشتان ۇيشىك جاساتادى. «مەن ادامداردىڭ مەنى مازالاۋىنان مەزى بولىپ، ولاردان بويىمدى اۋلاققا سالعىم كەلگەندە وسى ۇيشىككە كەلەمىن» دەيدى قالامگەر. بۇل شاعىن جازۋ ورنىن ءوزى «لوندون» دەپ اتاپتى. سونىمەن ونى ىزدەپ كەلۋشىلەر قالامگەردى قايدا كەتتى دەپ سۇراعاندا «لوندونعا» كەتتى دەگەن جاۋاپ ادەمى تويتارىس بولع انى انىق.
بەرنارد شوۋدىڭ اتاقتى ۇيشىگى وسى
«چارلي جانە شوكولاد فابريكاسى» ەڭبەگىنىڭ اۆتورى روالد ءدالدىڭ دە ءۇيىنىڭ اۋلاسىندا جازۋمەن اينالىسۋعا ارنالعان ۇيشىگى بولىپتى. ونىڭ ىشىندە قالامگەر ءوزىنىڭ ءارتۇرلى جەكە كوللەكتسيالارىن ساقتاعان ەكەن. اعىلشىن جازۋشىسى ديلان توماس شىعارمالارىن گاراجدا وتىرىپ جازاىپتى. ونىڭ ويىنشا گاراج وعان شابىت سىيلاپ، تىڭ يدەيالار بەرەدى.
تۋىندىسىن قوناق ۇيدە جازعاندار
امەريكالىق جازۋشى مايا ەندجەلوۋ شىعارمالارىن قوناق ۇيدە جازعاندى ۇناتادى ەكەن. سونىمەن بىرگە اڭگىمە جانرىنىڭ الىبى توماس ۆۋلف، جازۋشى دجەك كەرۋاك، ارتۋر ميللەر قاتارلى جازۋشىلار دا نيۋ يوركتىڭ ايگىلى چەلسي قوناق ۇيىندە جازۋمەن شۇعىلدانىپتى.
ايگىلى Chelsea وتەلى. نيۋ- يورك
ۆاننادان شابىت ىزدەگەن
جازۋشى، سەناريست دالتون ترامبو كەشكى جۋىناتىن ۋاقىتتا شىعارما جازۋدى ۇناتقان ەكەن. اكتەر كيرك دۋگلاس سىيلاعان توتىقۇسىن الىپ، ۆاننادا جاتىپ، شىعارما جازعاندى جانى قالاپتى. سونداي- اق رود ماك- كيۋەن دە ۆاننادا جاتىپ انگە ءسوز جازعان. ەسىمى بۇدان وزگە دە جەردە اتالعان اگاتا كريستي دە وسى ۆاننادا شىعارماشىلىعىنىڭ كىلتىن تاپقاندار قاتارىندا. ونىڭ جۋىناتىن بولمەسىندەگى ۆاننا ۆيكتوريا ۇلگىسىندەگى ۇلكەن ەدى دەيدى كوز كورگەندەر.
قالىپتان تىس «نورمالار»
«وسكار» جۇلدەسىنىڭ 4 مارتە يەگەرى، جازۋشى ۆۋدي اللەن جاس كەزىندە شىعارمالارىن مەترودا جازسا، اعىلشىن اقىنى ەديت سيتۋەلل بەتى اشىق تابىتتا جاتىپ قالام تەربەپتى. ال ۆيكتور گيۋگو «پاريج قۇداي- انا سوبورى» شىعارماسىن جازعاندا دالاعا شىقپاۋ ءۇشىن كيىمدەرىن تىقتىرتىپ تاستاپ، تەك جەلبەگەي جامىلعىمەن قالىپ، ءوزىن ماجبۇرلەۋ ارقىلى جازعان ەكەن.
el.kz
