قازاقستان رەسەيلىك بەنزيندى يمپورتتاۋدى توقتاتادى

«قازاقستاندا مۇناي وڭدەۋ زاۋىتتارىن جاڭعىرتۋ جۇمىستارى اياقتالىپ كەلەدى. ناقتىراق ايتقاندا، پاۆلودار جانە اتىراۋ زاۋىتتارىندا جاڭعىرتۋ شارالارى جۇرگىزىلدى. سايكەسىنشە، ولار جوعارى ساپالى ءارى جوعارى وكتاندى وتىندى كوبىرەك وندىرە باستادى، ياعني ا ي-92، ا ي -95 بەنزينىنىڭ كولەمى ارتتى. تامىز جانە قىركۇيەكتە شىمكەنت مۇناي وڭدەۋ زاۋىتىنىڭ جاڭعىرتىلعان بولىگىن ىسكە قوسۋ جوسپارلانىپ وتىر. وسى ورايدا قازاقستاندا بەنزين ءوندىرۋ كولەمى تاعى دا ارتادى»، - دەدى ق. بوزىمبايەۆ.

ونىڭ سوزىنە قاراعاندا، بۇگىندە ەلىمىزدەگى ا ي-92 بەنزينىنىڭ جيناقتالعان قورى 350 مىڭ تونناعا جەتتى. بۇل ءوز كەزەگىندە نارىقتاعى قاجەتتىلىكتەن 1,5 ەسەگە ارتىق.

«ا ي-92 ماركالى بەنزيننىڭ يمپورتىنا ءۇش ايعا شەكتەۋ ەنگىزەمىز دەپ قاراستىرىپ وتىرمىز»، - دەدى ۆەدومستۆو باسشىسى.

وسى ورايدا بۇل شەكتەۋ ەل اۋماعىندا بەنزيننىڭ باعاسىنا اسەر ەتپەيتىنىن اتاپ ءوتتى.

«سەبەبى بىزدە بەنزيننىڭ پروفيتسيتى بايقالىپ تۇر. ەگەر دە ءبىز ەكسپورتتى اشۋ بويىنشا شارالاردى قابىلداماساق، سونداي- اق ءوزىمىزدىڭ نارىعىمىزدى قورعاماساق، وندا ەلدەگى زاۋاتتار ءونىمنىڭ شەكتەن تىس ارتىق بولۋىنان توقتاپ قالۋى مۇمكىن»، - دەدى مينيستر.

بۇدان بۇرىن حابارلانعانداي، جاقىندا قانات بوزىمبايەۆ قازاقستانعا سىرتتان بەنزين يمپورتتاۋدىڭ قاجەتى جوق ەكەنىن ايتقان بولاتىن. سونىمەن قاتار ول قازاقستان ورتالىق ازيا ەلدەرىنە بەنزين ەكسپورتىن اشاتىنىن ءمالىم ەتتى.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى