روبوت تەحنيكاسى - بولاشاق ماماندىعى - ماۋلەن اشىمبايەۆ
ول الدىمەن №56 -مەكتەپتەگى روبوت تەحنيكاسى سىنىبىنىڭ جۇمىسىمەن تانىستى، دەپ حابارلايدى قازاقپارات ءتىلشىسى.
«نۇر وتان» پارتياسىنىڭ IT سىنىپ جوباسى اياسىندا اقتوبە وبلىسىندا بيىل 20 سىنىپ كومپيۋتەرمەن جابدىقتالىپ، ارنايى باعدارلامالار قوندىرىلادى. سونىمەن قاتار، وقۋشىلاردىڭ روبوت تەحنيكاسىمەن جۇيەلى جۇمىس ىستەۋىنە جاعداي جاسالادى. وڭىرگە جۇمىس ساپارىمەن كەلگەن «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ №56 -ورتا مەكتەپتە اشىلعان سىنىپتىڭ جۇمىسىمەن تانىستى. مۇندا بالالار جاڭا عيمارتتاردىڭ ماكەتىن قۇراستىرىپ جاتىر.
« IT كلاستاعى جاڭا باعدارلاما ارقىلى ءبىز شاعىن مۋلتفيلم دايىنداي الامىز. ويىنداردى قۇراستىرۋعا دا مۇمكىندىك بەرىلەدى. بولاشاقتا وسى سالانىڭ مامانى بولىپ، مۋلتفيلمدەر شىعارعىم كەلەدى»، - دەدى الميرا بەكەنوۆا. ال IT سىنىپ وقۋشىسى سەرىك بازىلبەك كىتاپحانا عيماراتىنىڭ ديزاينىن باستادى. ەرەكشەلىگى كىتاپحانادا تەرەزە كوپ. وقىرمان ءۇشىن كۇن ساۋلەسى جارىق بەرىپ تۇرادى. مۇندا روبوت تەحنيكاسى كابينەتى دە بار.
«روبوت تەحنيكاسى - بولاشاق ماماندىعى. مەكتەپتە ۇيرەنسە، بولاشاقتا مىقتى IT مامان بولا الادى. جۇمىس تا تابىلادى. روبوت تەحنيكاسى مەن باعدارلامالاۋ كلاستارىنا شەتەلدىڭ ادىستەمەلەرىن قاراپ جاتىرمىز»، - دەدى «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ.
اقتوبە وبلىسى بويىنشا IT سىنىپقا قاجەتتى 21 مامان نازاربايەۆ زياتكەرلىك مەكتەبىندە وقىدى. الداعى ۋاقىتتا تاعى 35 مۇعالىم ءبىلىمىن جەتىلدىرەدى. وڭىردە 58 روبوت تەحنيكاسى كابينەتى جانە 44 ۇيىرمە جۇمىس ىستەيدى. بۇل ارقىلى بارلىعى 3 مىڭعا جۋىق بالا قامتىلىپ وتىر. نەگىزى 20 كابينەتتى جاساقتاۋعا 70 ميلليون تەڭگە ءبولىندى.
كەزدەسۋ كەزىندە اقتوبەلىك وقۋشىلار «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆقا جەيدەنى اۆتوماتتى تۇردە جينايتىن روبوتتىڭ جانە روبوت ءپىلدىڭ جۇمىسىمەن تانىستىردى. مەكتەپ وقۋشىسى داستان قاسىمجاننىڭ ايتۋىنشا، قازىر ءبىر تەتىكتى باسىپ، روبوتتاردى باسقارۋعا، ءتۇرلى جۇكتەمە بەرىپ، تاپسىرمانى ورىنداتۋعا مەكتەپ بالالارىنىڭ ءبىلىمى مەن بىلىگى جەتەدى.
