ءتورتىنشى مۇناي وڭدەۋ زاۋىت قۇرىلىسىنىڭ جارتىسىن قىتاي ينۆەستورلارى قارجىلاندىرماق

 بۇل تۋرالى قىتايعا مەملەكەتتىك ساپارىن قورىتىندىلاپ، قازاقستاندىق ب ا ق وكىلدەرىنە سۇقبات بەرگەن پرەزيدەنت نۇرسۇلتان نازاربايەۆ مالىمدەدى. مەملەكەت باسشىسىنىڭ سوزىنشە قازىر قولدانىستاعى مۇناي وڭدەۋ زاۋىتتارى الداعى 3-4 جىلدا ىشكى سۇرانىستى تولىعىمەن جابا المايدى. وسىلايشا تاعى دا جانارماي تاپشىلىعى تۋىنداۋى مۇمكىن.

 نۇرسۇلتان نازاربايەۆ، قازاقستان رەسپۋبليكاسىنىڭ پرەزيدەنتى: ءبىز قىتايلىق ينۆەستورلارمەن 50 پايىزدى ولار، 50 پايىزدى ءبىز الامىز دەپ كەلىستىك. زاۋىتتىڭ قۇنى 2 ميلليارد دوللاردى قۇرايدى. قازاقستاندا مۇنداي ينۆەستيتسيالاردى كىم قارجىلاندىرادى؟

 پرەزيدەنتتىڭ ايتۋىنشا، ۇلتتىق ۆاليۋتامەن ساۋدا- ساتتىق جۇرگىزۋدىڭ كەلەشەگى بار. قازىر دوللاردىڭ تۇراقسىزدىعىنان ساۋدا جاساۋدا قيىندىقتار بار. ال ۇلتتىق ۆاليۋتادا ءوزارا ەسەپ ايىرىسۋعا كوشۋ - ەكونوميكانىڭ قاۋىپسىزدىك اسپەكتىلەرىنىڭ ءبىرى رەتىندە ءتيىمدى بولماق دەدى.

نۇرسۇلتان نازاربايەۆ، قازاقستان رەسپۋبليكاسىنىڭ پرەزيدەنتى:

قىتاي مەن قازاقستان اراسىنداعى ساۋدانى تەڭگەمەن جانە يۋانمەن جۇرگىزسەك، بىزگە پايدالى بولار ەدى. بۇل تەك ءبىزدىڭ عانا ماسەلەمىز ەمەس. بۇكىل ءوڭىر، رەسەي بۇل جۇمىستاردى جۇرگىزىپ كەلەدى جانە ول وڭاي دا ەمەس. ولار بىزدەن تەڭگەمەن، ءبىز ولاردان يۋانمەن ساتىپ الامىز. ول ءۇشىن اتالعان قاراجاتتىڭ بازاسىن قۇرۋ قاجەت. بانكتەردە مۇنداي اقشا، قانداي دا ءبىر دەپوزيت بولۋى ءتيىس.

جالپى ش ى ۇ سامميتىندە مەملەكەت باسشىلارى لاڭكەستەردىڭ قاقتىعىس ايماعىنان ءوز ەلدەرىنە قايتىپ، تەررورلىق ارەكەتتەرىن جالعاستىرىپ جاتقاندارىنا الاڭداۋشىلىق ءبىلدىردى. ولار تاياۋ شىعىستاعى جاعداي شيەلەنىسىپ، شەتەلدىك تەررورشىلاردان كەلەتىن قاۋىپ ارتتى دەپ وتىر. سوندىقتان تاراپتار اقپارات الماسىپ، قاۋىپسىزدىكتى كۇشەيتۋ كەلىسىمىنە كەلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى