التىناي جورابايەۆا: ءتورت قىزىم دا ءانشى بولعىسى كەلەدى
الايدا ساحنا ساڭلاعى بولۋدى ارمانداعانىمەن، ءبىر ءۇيدىڭ ءتورت بىردەي گۇلى ەل الدىنا شىعۋعا اسىقپايدى ەكەن. ءتىپتى، انالارى قولداپ تۇرسا دا. قىزدارىنىڭ ونەرگە دەگەن قىزىعۋشىلىعى جايلى جورابايەۆانىڭ ءوزى بايانداپ بەردى.
بۇل تۋرالى 31- ارنانىڭ «ايتا بەرسىن» باعدارلاماسىنا سىلتەمە جاساپ Stan.kz اقپاراتتىق اگەنتتىگى حابارلايدى.
«قىزدارىمنىڭ بيگە قاتىسىپ جۇرگەنىنە ءبىراز بولدى. العاشقىدا عالامتوردان ۇيرەنىپ ءجۇردى، قازىر كاسىبي تۇردە دايىندالۋدا. سەمانۇر سپورتتىق بالدى ءبي ۇيىرمەسىنە بارادى. قوسىمشا اعىلشىنعا بارادى. مەن قاتتى جەلكەلەپ، قىزدارىما بىردەڭە ىستەتكىم كەلمەيدى. ويتكەنى بالانىڭ ءوزىنىڭ تالپىنىسى بولۋى كەرەك. «وسكەندە كىم بولعىلارىڭ كەلەدى؟» دەسەم ءتورت قىزىم دا: «ءانشى»، - دەيدى.
وندا ءانشى بولساڭدار، مەنىمەن بىرگە ءان ايتپايسىڭدار ما؟ - دەيمىن. ايتپايدى ەشقايسىسى. ءبىراق ءانشى بولعىلارى كەلەدى.
انالارىنىڭ ءومىرى، ءجۇرىس-تۇرىسى ۇناپ تۇر عوي ولارعا. حالىقتىڭ جاقسى كورگەنىن، سىيلاعانىن ۇناتادى. سوعان قاراعاندا ماقتان تۇتادى»، - دەگەن جورابايەۆا قىزدارىنىڭ ونەر جولىنا كەلۋىنە قارسى ەمەستىگىن ءبىلدىردى.
ال ايگۇل يمانبايەۆا ۇلى اسىلجاننىڭ اكە جولىن قۋعانىنا قۋانادى. بۇل ورايدا اسىلجاننىڭ پراگا قالاسىندا رەجيسسەر ماماندىعى بويىنشا ءبىلىم الىپ جاتقانىن ايتا كەتەيىك.
«ۇلىم قازىر قازاقستاندا. قۇداي قالاسا 2-كۋرستى اياقتايدى، ءارى قاراي وقۋىن امەريكادا جالعاستىرامىن دەگەن جوسپارى بار. ەكى جىلدىق ءبىلىم دەگەن تولىققاندى ءبىلىم. ويتكەنى ولاردا 15 كۇن تەوريا، ال قالعانى تاجىريبە رەتىندە، ءتۇسىرىلىم الاڭىندا وتەدى ەكەن. استانانىڭ 20 جىلدىعىنا بايلانىستى قىسقامەتراجدى فيلم الىپ، سونىڭ جۇمىسىمەن قازىر ەلورداعا كەتتى. ءوزىنىڭ كومانداسىن جاساقتاپ، اكتەرلارىن كاستينگتەن وتكىزىپ، جۇمىسىن اتقارىپ جاتىر.
بۇل ورايدا يمانبايەۆا بالالارىن ونەرگە باۋليتىن ارىپتەستەرىن قولدايتىنىن ايتتى. سەبەبى:
«ماسەلەن، روزا قۋانىش قىزىنىڭ بالاسى ءالي قانداي ۇلكەن تۇلعانىڭ ۇلى. مەن روزا قۋانىش قىزىمەن كوپ اڭگىمەلەسەمىن، سىرلاسامىن. ول بالاسىنا قولىنىڭ ۇشىن دا تيگىزگەن جوق. ءوزىنىڭ تالانتى، ءوزىنىڭ تالپىنىسى. سونداي ىزدەنىمپاز، ءوز الدىنا ءوزىن قالىپتاستىردى. ءبىراق ءبارىبىر «ماماسىنىڭ ارقاسى» دەپ ايتادى. سول سياقتى ونەرگە قادام باسقان ارتىستەردىڭ بالالارىنا سولاي ايتۋى مۇمكىن. ءبارىبىر ونەردەگى قىز-جىگىتتىڭ بالاسى ءوزىنىڭ ءىزىن قۋادى ەكەن عوي. ول - زاڭدىلىق. مەنىڭ بالام اكتەر، انشىلىكتى قۋماعانىمەن، اكەسىنىڭ ءىزىن قۋدى. سول سەبەپتى ءبارىبىر كەلەدى ەكەن. ءبىر شەتىنەن قۋاناسىڭ، ونەردە بالا جاماننان الاس جۇرەدى، ەنەرگەتيكاسى تازا»، - دەيدى يمانبايەۆا.
