قوسىلا الماي كەتكەن ەستاي مەن قورلاننىڭ ۇرپاعى ءبىر- ءبىرىن تاپتى
وتكەن جىلدىڭ تامىزىندا جۇمىس بابىمەن استاناعا اۋىستىم عوي. قازىر اbctv.kz بيزنەس پورتالىنىڭ قىزمەتكەرىمىن. رەداكسياعا كەلگەن العاشقى كۇندەرى ارىپتەستەرمەن ءجون بىلىسكەنىمىزبەن، ابدەن بوي ۇيرەنگەنشە اشىق اڭگىمەلەسە المايتىن ادەت بار. Dinaraمەندە (سۋرەتتەگى قىز) وڭاشا ديدارلاسىپ كورمەپپىن. ءبىراق، جەرلەسىم ەكەنىن، مەن وقىعان ۋنيۆەرسيتەتتى ءتامامداعانىن بىلەمىن. ءوزى ايتقان. ورتاق اڭگىمەمىز دە وسى»، - دەپ جازادى فارحات قايرات ۇلى جەلىدە.
«سارسەنبى كۇنى دينارا ەكەۋىمىز قانات اعام ايتپاقشى، قولتىقتاسىپ، سۋداي تاسىپ، الشاڭ باسىپ قازاقستان- سلوۆەنيا بيزنەس فورۋمىنا باردىق. شارادان سوڭ كولىك شاقىرتتىق. دينارا كوفە ىشەمىن دەدى. سودان ءوزىمىز وقىعان ۋنيۆەرسيتەت، وقىتۋشىلار تۋرالى اڭگىمەلەستىك. قاي جەردەن ەكەنىن، رۋىن سۇرادىم. رۋى قىپشاق ەكەنىن، تۋعان جەرى رەسەيدىڭ سلاۆگورود قالاسى ەكەنىن ايتتى. وسى قالانىڭ اۋماعىندا «كۋاتوۆكا» دەگەن اۋىل بار ەكەن. اتا- بابالارى سول جەردەن. اۋىلدىڭ نەگىزىن قالاعان دا دينارانىڭ اتالارى ەكەن. كولىك كەلدى. اڭگىمە دە ءۇزىلدى. جۇمىسقا قايتتىق.
كەشكە اۋىز اشىپ بولىپ، كىتاپ وقىپ جاتسام ەرنار باۋىرىم « ءاي، مىنانى وقىدىڭ با؟ » دەپ Kultoleu Mukash اعانىڭ «حورلان سۇلۋدىڭ ۇرپاقتارى» دەگەن جازباسىن كورسەتتى. وقىپ شىقتىم. بۇل دۇنيەنى ەرتەدە ءبىر وقىعان ەدىم. ءبىراق، كىم جازعانىن، قايدان وقىعانىم ەسىمدە جوق ەدى.
ءماتىندى وقىپ بولىپ، مىنا ءبىر جەرىنە قايتا ءۇڭىلدىم: «جات قولىنداعى قۇلىندى دالاسىنىڭ ءبىر پۇشپاعىن جايلاعان ايىپتىڭ اكەسى قۋات تا داۋلەتتى كىسى ەكەن. سول بايلىعىنىڭ ارقاسى بولار - ورىستار اۋىستىرامىز دەپ كەلگەندە قىرۋار مالىن شاشىپ، اۋىلىنىڭ اتىن ساقتاپ قالادى. بۇل مەكەن كۇنى قازىرگە دەيىن «سەلو كۋاتوۆكا» دەپ اتالاتىن كورىنەدى» . سودان «ءدال وسى «سەلو كۋاتوۆكا» تۋرالى قايدان ەستىدىم» دەپ ويعا باتتىم. ءبىراق، ەشتەڭە ەسكە تۇسپەدى.
ەرتەڭىندە دە وسى دۇنيە ويىمنان شىقپادى. قۇلتولەۋ اعانىڭ جازباسىن قايتا وقىپ شىقتىم. بۇل جۇمىس كۇنى اياقتالۋعا جاقىنداپ قالعان شاق ەدى. ەسىمە دينارا ءتۇستى. ونىڭ دا اتا- بابالارى «كۋاتوۆكا» اۋىلىنان ەكەنى، فاميلياسى دا قۋاتوۆا ەكەنى ويعا ورالدى. ورنىمنان اتىپ تۇرىپ، قارسىداعى كابينەتكە كىرىپ باردىم.
- دينارا، ەستاي مەن حورلان حيكاياسىن بىلەسىڭ بە؟ - دەدىم ۇستەلىنە تونە ءتۇسىپ.
- بىلەمىن، - دەپ تاڭىرقاي قارادى ول.
- قورلان مەنىڭ اجەم!
- مەن وندا ەستايدىڭ ۇرپاعىمىن!
ەكەۋىمىز دە قىزاراقتاپ بارىپ، اڭگىمەنى جالعادىق. قۇلتولەۋ اعانىڭ جازباسىنداعى حورلان ۇرپاقتارىنىڭ سۋرەتىن كورسەتتىم. «مەنىڭ تۋىستارىم!» دەپ بارلىعىن اتاپ شىقتى.
وسى كەزدە كابينەتتە وتىرعان وزگە قىزدار قىزىعۋشىلىق تانىتىپ، ءمان- جايدى سۇراي باستادى. جامان ورىسشام مەن قازاقشامدى ارالاستىرىپ، ەستاي مەن حورلان حيكاياسىن بايانداپ بەردىم. دينارا بۇل حيكايا تۋرالى ەسكە العىسى كەلمەيتىنىن، ءوزىنىڭ اتاسى مەن اجەسىن ەستايدان قىزعاناتىنىن ايتتى. ارينە، مۇنىڭ ءمورالدىق تۇرعىدان قيىن ەكەنىن تۇسىنەمىن. ءبىراق، تاريحتىڭ اتى تاريح...
سودان كابينەتتەگى قىزدارعا «ءبىزدى سۋرەتكە تۇسىرىڭدەر» دەدىم. دينارا قىزاراقتاپ بارىپ، زورعا كەلىستى.
كابينەتتەگىلەرگە قاراجار اۋىلىندا ەستايعا ەسكەرتكىش قويىلعانىن، ونىڭ اشىلۋىنا حورلاننىڭ ۇرپاقتارى كەلگەنىن ايتتىم. سول كەزدە حورلان ۇرپاقتارىنا «اتامىز بەن اجەمىز قوسىلا الماي كەتتى. ءبىراق، ەكەۋىنەن دە ۇرپاقتار بار. سوندىقتان سۇيەك جاڭعىرتايىق. ماعان بەرەر قىزدارىڭىز بولسا، ەستاي اتامنىڭ ارمانىن ورىنداۋعا ءازىرمىن» دەپ ايتقانىمدى جەتكىزدىم. دينارا ودان ءارى قىزاراقتاپ كەتتى. وتىرعاندار «ەندەشە ارمانىڭ ورىندالدى!» دەپ دۋ كۇلدى.
جاس جىگىت اتاسىنىڭ ورىندالماي كەتكەن ارمانىنا ءوزى جەتىپ، تاريح ءۇشىن بارىنە دايىن ەكەنىن ايتتى.
مىنە، استانانىڭ تورىندە ەستاي مەن حورلاننىڭ ۇرپاقتارى بىرگە جۇمىس ىستەپ ءجۇر. ءبىر سالادا، ءبىر رەداكسيادا. ولاردى كەزدەستىرگەن قۇدايدىڭ شەبەرلىگىنە قالايشا تاڭداي قاقپايسىڭ، ءا؟ !
ال مەنىڭ حورلان ۇرپاعىنان قىز السام دەگەن ارمانىم ورىندالاتىن سياقتى ما، قالاي ءوزى...
تاريح ءۇشىن بارىنە دايىنمىن!»، - دەيدى ول.
Stan.kz
