استانانىڭ قۇقىق قورعاۋشىلارى كۇشەيتىلگەن رەجىمگە كوشەدى

ق ر ءى ءى م مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋبايەۆتىڭ ايتۋىنشا، 27- ماۋسىم مەن 8- شىلدە ارالىعىندا استانالىق گارنيزون، سونداي-اق اقمولا، قاراعاندى جانە پاۆلودار وبلىستارىنىڭ جەكە قۇرامى كۇشەيتىلگەن رەجىمگە كوشىرىلەتىن بولادى. «ول كۇندەرى ەلوردا اۋماعىندا قوعامدىق ءتارتىپتى پوليتسيانىڭ كۇشەيتىلگەن جاساقتارى باقىلايدى. ال مەرەكەلىك شارالار وتەتىن جەرلەردە تاۋلىك بويى كەزەكشىلىك جۇرگىزىلەدى»، - دەدى ا. سادۋبايەۆ استانادا وتكەن باسپا ءسوز ءماسليحاتىندا.

ونىڭ ايتۋىنشا، جەدەل شتابتار دا قۇرىلادى. ال قالالىق، وبلىستىق جانە اۋداندىق بولىمشەلەردە قوسىمشا جەدەل تەرگەۋ توپتارى جاساقتالادى. نەگىزگى ماقسات - قىلمىستارعا قاتىستى شۇعىل ارەكەت جاساۋ. «جالپى، مەرەكە كۇندەرى قوعامدىق ءتارتىپتى قورعاۋ شارالارىنا 3,5 مىڭ پوليتسيا قىزمەتكەرى اتسالىسادى. ولاردىڭ ىشىندە 1,2 مىڭ ۇلتتىق ۇلاننىڭ ساربازى بار. بۇدان بولەك، قوسىمشا رەزەرۆ جاساقتالادى. مەملەكەتتىك ماڭىزى بار نىسانداردى كۇزەتۋ شارالارى كۇشەيتىلەدى. «بايتەرەكتى» دە ءبىز تاۋلىك بويى كۇزەتەمىز. استانانىڭ اينالما جولدارى دا باقىلاۋعا الىنادى. ول ءۇشىن قوسىمشا بەكەتتەر قويىلادى»، - دەپ اتاپ كورسەتتى ا. سادۋبايەۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى