نۇرسۇلتان نازاربايەۆ موڭعوليا پرەزيدەنتى حالتمااگيين باتتۋلگامەن كەزدەستى
مەملەكەت باسشىسى قازاقستان حالقىنىڭ جانە جەكە ءوزىنىڭ اتىنان حالتمااگيين باتتۋلگانى پرەزيدەنتتىك سايلاۋداعى جەڭىسىمەن قۇتتىقتاپ، قازاقستان تاراپىنىڭ بارلىق باعىت بويىنشا ىنتىماقتاستىقتى دامىتۋعا دايىن ەكەنىن ايتتى.
«بيىل قازاقستان رەسپۋبليكاسى مەن موڭعوليا اراسىنداعى دوستىق قارىم- قاتىناستار جانە ىنتىماقتاستىق جونىندەگى شارتقا قول قويىلعانىنا 25 جىل تولادى. بۇل قۇجات كوپ عاسىرلىق دوستىق جانە تاتۋ كورشىلىك ءداستۇرى بار ەلدەرىمىز اراسىنداعى ىنتىماقتاستىقتى دايەكتى دامىتۋ جولىندا ماڭىزدى ءرول اتقارادى»، - دەدى قازاقستان پرەزيدەنتى.
حالتمااگين باتتۋلگا ءوزىنىڭ مونعوليا پرەزيدەنتى بولىپ سايلانۋىمەن جانە تۋعان كۇنىمەن قۇتتىقتاعانى ءۇشىن نۇرسۇلتان نازاربايەۆقا ريزاشىلىق ءبىلدىردى.
«مەن ءسىزدىڭ جۇمىسىڭىزدى مۇقيات باقىلاپ وتىرامىن جانە جاڭا ەلوردا - استانا قالاسىن سالعانىڭىزدى بىلەمىن. مەن موڭعوليانىڭ قۇرىلىس ءمينيسترى بولعان كەزدە دە قازاقستان تاجىريبەسىن كوپ زەرتتەدىم. ءبىز دە ەلىمىزدىڭ استاناسى ۇلان باتور قالاسىنىڭ توڭىرەگىندە مايتار قالاسىن سالۋ مۇمكىندىگىن قاراستىرىپ جاتىرمىز»، - دەدى مونعوليا پرەزيدەنتى.
سوڭىندا مەملەكەت باسشىسى، ەڭ الدىمەن، ەكى ەل اراسىنداعى ىنتىماقتاستىقتى جاڭا دەڭگەيگە كوتەرۋ قاجەتتىگىنە توقتالىپ، قازاقستان موڭعوليانىڭ شانحاي ىنتىماقتاستىق ۇيىمىنىڭ جۇمىسىنا اتسالىسۋعا دەگەن ۇمتىلىسىن قولدايتىنىن ايتتى.
