اتاقتى كۇيشىنىڭ تونى توقسان جىلعا جۋىق ۋاقىت ساقتالعان
بەلگىلى كۇيشى الشەكەي بەكتىباي ۇلى 1847 -جىلى قازىرگى قىزىلوردا وبلىسى، جاڭاقورعان اۋدانىنداعى بەكتىباي سازى دەگەن جەردە دۇنيەگە كەلگەن. ول 50 دەن استام كۇي شىعارعان. 1932 -جىلى تاجىكستاننىڭ قورعانتوبە ايماعىندا دۇنيە سالعان.
دەرەك كوزدەرىنە سۇيەنسەك، بۇل تون تاجىكستان ەلىندە تىگىلگەن. وتىزىنشى جىلداردىڭ باسىندا وكىمەت كۇيشىنىڭ مال- مۇلىگىن الىپ، ءوزىن جەر اۋدارماقشى بولادى. جالپى، ول كىسى كۇيشىلىگىمەن قاتار تاقىمى مىقتى شاباندوز، كۇشى مىعىم پالۋان بولعان. وزىنە قيانات كورسەتكەلى جاتقانىن ەستىگەن الشەكەي جۇگىن بىرنەشە نارعا ارتىپ، وزبەكستانعا باعىت الادى. ودان كەيىن تاجىكستان جەرىندە تۇراق تابادى.
تاجىك توپىراعىندا جۇرگەندە ورتانشى ۇلى دانەبەكتىڭ ايەلى كۇلپات بىرنەشە قوي تەرىسىن يلەپ، وسى توندى تىگىپ شىعارادى. ونى سول جەردە كوپ وسەتىن اناردىڭ قابىعىن قايناتىپ، سودان شىققان بوياۋمەن بويايدى. بۇل 1931 -جىلدىڭ شاماسى. دەگەنمەن بۇل توندى ۇزاق كيۋ اتاقتى كۇيشىنىڭ ماڭدايىنا جازىلماعان ەكەن. ول كەلەسى جىلى جات جەردە 85 جاسىندا كوز جۇمادى.
اتاقتى كۇيشىنىڭ تەرى سىڭگەن توننىڭ ودان كەيىنگى جاعدايى بىلايشا ءوربيدى. كۇيشى قايتىس بولعاننان كەيىن تون ۇلكەن قىزى بەيسەنكۇلدىڭ كۇيەۋى نابيگە بەرىلەدى. قۇندى جادىگەر الپىس جىل بويى سول وتباسىندا ساقتالادى. 1992 -جىلى بەيسەنكۇل قايتىس بولادى. سودان كەيىن توندى نەمەرەسى مەيىربەك ءبىراز ۋاقىت كيىپ، 2010 -جىلى تاريحي جادىگەر رەتىندە ساقتاۋعا دانەبەكتىڭ جيدەباي ەسىمدى ۇلىنان تۋعان شوبەرەسى وڭعارعا تابىس ەتەدى.
«كونە دۇنيە ەمەس پە؟ تون ماعان جەتكەنگە دەيىن ءبىرشاما ەسكىرگەن ەكەن. ازداپ كىرلەگەن سەكىلدى. بەيسەنكۇل اپامىز قانشا جىل بويى اتامىزدىڭ تونىن كوزىنىڭ قاراشىعىنداي ساقتاپ كەلگەن. 2010 -جىلى حيميالىق تازالاۋعا بەردىم. 2012 -جىلى اۋدانداعى الشەكەي اتىنداعى ونەر مەكتەبىنىڭ ديرەكتورى قالدىباي قوشقارباي اتامىزدىڭ 165 جىلدىعىنا وراي كۇيشىلەر بايقاۋى وتەتىنىن جەتكىزدى. اقىلداسا كەلە بۇل توندى ونەر مەكتەبىنىڭ مۇراجايىنا تابىس ەتۋدى ءجون كوردىك»، - دەيدى وڭعار.
قانشاما جىلدىڭ ءجۇزى بولسا دا تاريحي قۇندىلىق رەتىندە ونەر مەكتەبىنىڭ مۇراجايىنىڭ تورىنەن ورىن العان تون كورگەن ادامدارعا ەرەكشە قىزىعۋشىلىق تۋعىزادى. ونەر مەكتەبىنىڭ ماماندارى وسىنداي جادىگەرلەر قاتارىن مولايتۋعا نازار اۋدارىپ كەلەدى.
ءادىلجان ۇمبەت
