قازاقستاندا ۇزدىك الەۋمەتتىك روليك انىقتالدى
بايقاۋدىڭ باس جۇلدەسىن الماتىلىق دميتري گالابير جەڭىپ الدى. وعان 1 ميلليون تەڭگە كولەمىندە سىياقى تابىستالدى. ال تانىمال رەجيسسەر اقان ساتايەۆ ونىڭ ستسەناريى بويىنشا بەينەروليك ءتۇسىرىپ شىقتى.
«سەناري بويىنشا كىشكەنتاي بالانىڭ ءوزىنىڭ ارمان- ماقساتى بولادى. ونىڭ اتا- انالارى بولسا، جۇمىستان بوساماي، بالاسىنا كوپ كوڭىل بولمەي جۇرەدى. ءبىراق ونى اتاسى ءبارىن بايقاپ جۇرەدى دە، نەمەرەسىنە ءبىر سىيلىق جاسايدى. ءبارى سودان باستالادى. ءدال سول سىيلىق ونىڭ بۇكىل ءومىرىن وزگەرتەدى. بەينەبايان بالا تاربيەسىنە ارنالىپ وتىر. نەگىزگى ويىمىز، بالانىڭ ارمان- قيالىن شەكتەۋ قويماۋ قاجەت. بالا كىم بولعىسى كەلەدى؟ ونى قالاي ىسكە اسىرادى؟ سوعان كوڭىل ءبولىپ، جاعداي جاساۋىمىز قاجەت. بالانىڭ جەكە تاڭداۋىنا توسقاۋىل بولماۋ كەرەك"، - دەيدى د. گالابير.
بۇگىن بايقاۋ قورىتىندىسىنا ارنالعان سالتاناتتى شارادا ق ر اقپارات جانە كوممۋنيكاتسيالار ءمينيسترى داۋرەن ابايەۆ ءبىرىنشى ورىن يەگەرىن قۇتتىقتاپ، ارنايى ديپلوم مەن اقشالاي سىيلىقتى تابىستادى «راسىندا، وتە ساپالى جۇمىس بولىپ شىقتى. سەبەبى ەكى- ءۇش مينۋتتىق الەۋمەتتىك روليككە تۇتاس ءبىر فيلمنىڭ مازمۇنىن سىيعىزۋ وڭاي ەمەس. ءبىز وسى سالاداعى جۇمىستى جالعاستىراتىن بولامىز»، - دەدى د. ابايەۆ. سونداي- اق، مينيستر ۇزدىك الەۋمەتتىك روليكتە باستى ءرولدى ويناعان شەرحان ەسىمدى بالانى ارنايى سىيلىقپەن ماراپاتتادى.
بايقاۋدىڭ قورىتىندىسى بويىنشا ەكىنشى ورىندى قۋانىش وماروۆ يەلەندى. وعان Apple MacBook تابىستالدى. ال ءۇشىنشى ورىننىڭ يەسى - رينات تۇرعانبەكوۆ Canon فوتوكامەراسىن ۇتىپ الدى. بۇدان بولەك، ۇزدىك سەناريلەردىڭ ءتورت اۆتورىنا ارنايى ديپلومدار مەن ىنتالاندىرۋ سىيلىقتارى تابىس ەتىلدى. ولاردىڭ سەناريلەرى بويىنشا بەينەروليكتەر ءالى تۇسىرىلگەن جوق.
جالپى، «نيەت» بايقاۋىنا 600 دەن استام بەينەروليكتىڭ سەناريلەرى كەلىپ ءتۇستى. وتكەن جىلى ق ر اقپارات جانە كوممۋنيكاتسيالار مينيسترلىگىنىڭ تاپسىرىسى بويىنشا 131 بەينەروليك تۇسىرىلگەن بولاتىن.
