ەرلان قوشانوۆ: ۇلىتاۋدى ەلىمىزگە عانا ەمەس، الەمگە تانىتقىمىز كەلەدى
«تاريحي تۇرعىدان مىناداي تۇسىنىك قالىپتاسىپ قالدى: قاراعاندى دەسە كوپ ادامنىڭ ويىنا اسىرەسە شاحتاسى، يندۋستريامەن بىرگە كارلاگ، رەپرەسسيا تۇسەدى. مىنە، وسى تۇسىنىكتى ءبىز بۇزساق دەيمىز. سەبەبى، قاراعاندى وبلىسى ۇلىتاۋدىڭ ارقاسىندا قازاق مەملەكەتتىلىگىنىڭ التىن بەسىگى دەگەن مارتەبەگە يە بولعانىن قالايمىز»، - دەيدى ەرلان قوشانوۆ.
ءوڭىر اكىمى ءوزىنىڭ جاستىق شاعى ۇلىتاۋ ايماعىندا وتكەنىن ەسكە الدى. ايتۋىنشا، جاس كەزىندە ۇلكەن اقساقالدار «ەگەر سولاقاي جۇيەنىڭ قولى جەتپەگەن ءبىر جەرى بولسا - ول قايماعى بۇزىلماي، قالپىندا قالعان ۇلىتاۋ» دەپ ايتىپ وتىرادى ەكەن.
«ۇلىتاۋ - ۇلىلار جولى، حاندار جولى، قازاق حالقىنىڭ تاعدىر جولى. ۇلىتاۋ قازاقتىڭ باسىن بىرىكتىرگەن قاسيەتتى مەكەن. ەلباسى بۇدان ءبىراز جىل بۇرىن ۇلىتاۋدىڭ باۋرايىندا بەرگەن سۇحباتىندا « ۇلىتاۋ قازاق ەلىنىڭ كونە زامانىنان بەرگى تاريحي جانە ساياسي كىندىگى» دەپ اتاپ كورسەتكەن بولاتىن. ءبىز ۇلىتاۋدى ەلىمىزگە عانا ەمەس، الەمگە تانىتۋدى جوسپارلاپ وتىرمىز. سەبەبى، ۇلىتاۋ - الەمدىك دەڭگەيدە بيىك ورىن الۋعا لايىقتى قازاقتىڭ ءىنجۋ مارجانى»، - دەيدى ەرلان قوشانوۆ.
وبلىس باسشىسىنىڭ ايتۋىنا قاراعاندا، ۇلىتاۋدى الەمگە تانىتۋعا قاراعاندىلىقتار عانا ەمەس، بارشا قازاقستاندىقتار اتسالىسۋى كەرەك. سەبەبى، ۇلىتاۋ - ەلگە كورسەتۋگە لايىقتى تاريحي مۇرالارى وتە كوپ ءوڭىر.
«ول ءۇشىن نە قاجەت؟ ارينە، وڭىرگە ەڭ الدىمەن، مىقتى، دامىعان ينفراقۇرىلىم كەرەك. ويتكەنى، ۇلىتاۋدىڭ باستى ماسەلەسى - جولدىڭ قاشىقتىعى جانە سول باراتىن جولدىڭ وتە قيىندىعى. سوندىقتان، ءبىز اۋەلى جۇمىستى اۆتوجولداردى جوندەۋدەن باستادىق. وسى ماقساتپەن 5 ميلليارد تەڭگە قارجىعا بىلتىر باستالعان قاراعاندى- جەزقازعان جولىن جوندەۋ جۇمىستارىن ءبىز بيىل تولىق اياقتايمىز. ەگەر بىلتىر وسى جولمەن ءجۇرىپ ءوتۋدىڭ ۋاقىتى - 7-8 ساعات بولسا، قازىر 4,5-5 ساعاتتىڭ ىشىندە ءجۇرىپ وتەسىز. سول سياقتى بيىل ءبىز الاشا حان، جوشى حان كەسەنەلەرىنە، حان ورداسى مەن التىن شوقى تاريحي ورىندارىنا اپاراتىن جالپى ۇزىندىعى 100 شاقىرىم جولدى جوندەۋ جۇمىستارىن باستادىق»، - دەيدى ءوڭىر اكىمى.
ونىڭ ايتۋىنشا، جولدىڭ قيىندىعىنا قاراماستان، بىلتىر ۇلىتاۋعا 11 مىڭعا جۋىق تۋريست بارعان.
«ال بۇل وڭىرگە جىلىنا كەم دەگەندە 50 مىڭعا جۋىق تۋريستى قابىلداۋعا مۇمكىندىك بار. ءبىزدىڭ ماقساتىمىز - تۋريستەردىڭ سانىن وسى مەجەگە جەتكىزۋ ءۇشىن بارلىق جاعدايلاردى جاساۋ»، - دەپ ءتۇيدى ەرلان قوشانوۆ.
اۆتور: ايان بەكەن ۇلى
