ءزاۋلىم ۇيلەردى سالىپ رۋحاني جاڭعىرمايمىز - ەرلان قوشانوۆ
«قارقارالى اۋدانىنىڭ تۋماسى، كاسىپكەر نۇرلان قالتايەۆ دەگەن ازاماتتى دا ايتقىم كەلەدى. ول ءوزىنىڭ تۋعان اۋىلى - قوياندىدا سپورت الاڭىن سالدى. ءوز قارجىسىنا العاشقى بولىپ اۋداندا وتباسىلىق بالالار ءۇيىن اشتى»، - دەيدى وبلىس باسشىسى.
ەرلان قوشانوۆتىڭ ايتۋىنشا، ءبىر كەزدەرى مەكتەپ ءبىتىرىپ كەتكەن جاستار قازىرگى تاڭدا تۋعان اۋىلىن كوتەرۋگە بىلەك سىبانا كىرىسكەن.
«تاعى ءبىر جاقسى مىسال كەلتىرۋگە بولادى. ماسەلەن، بۇرىنعى سىنىپتاستار - تۇلەكتەر مەكتەپ بىتىرگەنىمىزگە 10 جىل، 20 جىل بولدى دەپ، وزدەرى باس قوسىپ جاتادى. قازىر ءبىزدىڭ كوپتەگەن اۋىلداردا، ەلدىمەكەندەرىمىزدە ءبىر قۋانتارلىعى - ولار باياعىداي بانكەت جاساپ، اس ءىشىپ، اياق بوساتىپ ەمەس، بانكەتكە جۇمسايتىن قارجىلارىمەن مەكتەپتەرگە، اۋىلداعى الەۋمەتتىك نىساندارعا كومەكتەرىن كورسەتىپ، زاماناۋي قۇرىلعىلار الىپ بەرۋگە كۇش سالۋدا. بۇل البەتتە، قۋانتارلىق جاعداي. مەنىڭ ويىمشا، سانانىڭ جاڭعىرۋى دەگەن وسى»، - دەيدى ەرلان قوشانوۆ.
ءوڭىر اكىمىنىڭ ايتۋىنشا، جاستاردى ەشكىم دە كۇشتەمەگەن.
«وزدەرىنىڭ نيەتتەرىمەن اۋىلدارىنا دەگەن كومەگىن كورسەتىپ جاتىر. مەن بۇل ەلباسىمىزدىڭ «رۋحاني جاڭعىرۋ» باعدارلاماسىن جۇزەگە اسىرۋدىڭ ناقتى كورىنىسى دەپ ويلايمىن. ءزاۋلىم سارايلار نەمەسە قاراعاندىنىڭ ورتالىعىنان ۇلكەن ۇيلەر سالىپ ءبىز رۋحاني جاڭعىرمايمىز. وسىنداي ازعانتاي عانا بولسا دا ىسپەن، شىن جۇرەكتەن شىققان نيەتپەن ءبىزدىڭ حالقىمىز رۋحاني جاڭعىرادى»، - دەيدى ول.
اۆتور: ايان بەكەن ۇلى
