ەلباسى بەيجىڭدە حالىق باتىرلارى ەسكەرتكىشىنە گۇلدەستەسىن قويدى
حالىق باتىرلارى ەسكەرتكىشى قىتايدىڭ ۇلتتىق مونۋمەنتى سانالادى. ەسكەرتكىش ХІХ-ХХ عاسىرلاردا ءومىرىن قىتاي حالقىنىڭ ريەۆوليۋتسيالىق كۇرەسىنە ارناعان باتىرلاردى ماڭگى ەستە ساقتاۋ ماقساتىندا 1949 -جىلى 30 - قاراشادا قىتاي حالىقتىق ساياسي- كونسۋلتاتيۆتىك كەڭەسىنىڭ ءبىرىنشى جالپى وتىرىسىندا قابىلدانعان قارار نەگىزىندە سالىنعان. جوبا اۆتورى - ليان سىچەن. دەگەنمەن ەسكەرتكىشتىڭ كەيبىر ەلەمەنتتەرىن ونىڭ جۇبايى لين حۋەيين قوسقان. قۇرىلىس جۇمىستارى 1952 -جىلدىڭ تامىزىنان 1958 -جىلدىڭ مامىرىنا دەيىن جۇرگىزىلگەن.
مونۋمەنتتىڭ بيىكتىگى كەيبىر باعالاۋلارعا قاراعاندا شامامەن 37,94 مەتردى قۇرايدى. ال اۋماعى 3 مىڭ شارشى مەتردى الىپ جاتىر. 17 مىڭ ءمارمار جانە گرانيت بلوكتاردان تۇرعىزىلعان ەسكەرتكىشتىڭ سالماعى 10 مىڭ توننا.
ايتا كەتەيىك، ەلباسى نۇرسۇلتان نازاربايەۆ قىتايعا مەملەكەتتىك ساپارمەن كەلىپ، كەشە ق ح ر ءتوراعاسى شي جينپيڭمەن كەڭەيتىلگەن قۇرامدا كەلىسسوزدەر وتكىزدى.
ناتيجەسىندە بىرنەشە قۇجاتقا قول قويىلدى.
سونىمەن قاتار مەملەكەت باسشىسى ق ح ر مەملەكەتتىك كەڭەسىنىڭ پرەمەرى لي كىشياڭمەن جۇزدەستى.
بۇگىن، 7 - مامىر كۇنى ق ر پرەزيدەنتى بۇكىل قىتايلىق حالىق وكىلدەرى جينالىسى تۇراقتى كوميتەتىنىڭ ءتوراعاسى لي جانشۋمەن كەزدەستى.
ال 10 - ماۋسىم كۇنى ق ر پرەزيدەنتى چيڭداو قالاسىندا وتەتىن شاڭحاي ىنتىماقتاستىق ۇيىمىنا مۇشە مەملەكەتتەر باسشىلارىنىڭ كەڭەسىنە قاتىسادى دەپ كۇتىلۋدە.
اۆتور: مارلان جيەمباي
