قوبىز جاسايتىن نەمىس
«بۇل ءوزى ۇمىتىلىپ بارا جاتقان ونەر عوي. قوبىزدى جانىن سالىپ جاسايتىنداردىڭ قاراسى از. بۇل اسپاپتىڭ قىر- سىرى قانداي تەرەڭ ءارى بۇيىعى بولسا، ونى قاستەرلەيتىن جاندار دا قاساڭ تىرلىكتەن ارناسى بولەك ءومىر كەشۋگە قۇشتار. اعاشتار - تىرشىلىك يەسى. ولاردىڭ ءتىلىن تابۋ كەرەك. تۇسىنە ءبىلۋ قاجەت. ءار اعاشپەن جۇمىس ىستەۋدىڭ ءجون- جوسىعى بولادى. سونى بىلەتىندەر ازايدى. اعاشتى شاپقاننىڭ ءجونى وسى دەپ، قارا دۇرسىنگە سالۋعا كەلمەيدى. سانعا جۇمىس ىستەپ، اشكوزدىكپەن بىلعاۋعا بولمايدى ونەردى. ونداي شەبەرسىماقتار ۇزاماي شىعارماشىلىق بەدەۋلىككە ۇشىرايدى، سەنىڭىز!»، - دەدى ول.
كوڭىلى سۇيگەن كونتراباستا ويناپ، قامسىز عانا جۇرگەن پەتردى قولونەرگە الىپ كەلگەن ەۆگەني سابكو ەكەن. ۇستاز بەن شاكىرتتىڭ تانىستىعى ونەر ۋچيليشەسىندە باستالعان. ەۆگەني شاكىرتىنىڭ كوڭىلىن جىقپاي، شەبەرلىك ونەردىڭ قىر- سىرىنا باۋليدى. زەردەلى پەتر ۋاقىت وتە سكريپكا جاساۋدى مەڭگەرەدى. ءوزىنىڭ ايتۋىنشا، ول وسى جەردە ونەرگە دەگەن قۇرمەتتى تۇڭعىش سەزىنگەن. ەلىمىزدىڭ وزگە دە وڭىرلەرىندەگى ورەلى شەبەرلەردەن كوپ ساباق السا دا، اعاش ونەرىنە ادالدىقتى العاشقى ۇستازى بويىنا سىڭىرگەنىن ايتادى.
پەتر سكريپكانىڭ سىرىنا وسكەمەندە قانىقتى. ال قوبىزعا دەگەن قىزىعۋشىلىعى ونەردىڭ ۇلكەن ورتاسىنا بارعاندا تۋسا كەرەك.
«ەلورداداعى «شابىت» ونەر ۋنيۆەرسيتەتىنە ءبىلىمىمدى شىڭداۋعا باردىم. ونەردىڭ الىپ ورداسىندا كىل مىقتىلاردىڭ جينالاتىنى انىق قوي. مەنىڭ توبىم دا سونداي تالانتتارعا تولى ەدى. ءوزىم ءۇشىن ءومىردىڭ جاڭا پاراقتارىن اشقانداي بولعام سول ساتتە. مەن تانىپ- بىلمەگەن سان اسپاپتىڭ سىرى بار ەكەن- اۋ دەدىم. قاتارلاستارىمنىڭ ىشىندە قوبىزدىڭ قۇلاعىندا وينايتىن قاس شەبەرلەر بولدى. ولار مىقتى مۋزىكانتتار ەدى. دوستارىمنىڭ ارقاسىندا قوبىزدىڭ قۇدىرەتىن ءتۇسىندىم»، - دەيدى ول.
سكريپكا جاساۋدى ابدەن مەڭگەرگەن پەتر ەندىگى جەردە بەينە ءبىر قوبىز بەن سكريپكانىڭ قوسىندىسىنداي بولعان پريما- قوبىزدى جاساۋدى ويعا الادى. وقۋىن ءتامامداپ، وڭىرگە ورالعان بەتتەگى بىلەك سىبانىپ كىرىسكەن شارۋاسى وسى. وسكەمەندەگى مادەنيەت ءۇيىنىڭ ىشىنەن شاعىن شەبەرحاناسىن اشادى. ايتۋىنشا، ابدەن زەرتتەپ- زەردەلەۋىنە، كوكەيىندەگى تۋىندىسىن جوبالاۋعا بەس جىلداي ۋاقىت جۇمساعان. وسى ۋاقىت ارالىعىندا جالپى قوبىزدىڭ شىعۋ تەگىمەن، كۇي ونەرىمەن جانە قازاقتىڭ بەلگىلى قوبىزشىلارىمەن تانىسقان. جاقسى قوبىز جاساۋ ءۇشىن قوبىزشىنىڭ جانىن ءتۇسىنۋىڭ كەرەك دەپ سانايدى. ءوزى دە مۋزىكامەن ەتەنە جاقىن عوي.
«قوبىزعا جانىن بەرىپ وينايتىندار دا، قوبىزدى جانىن سالىپ جاسايتىندار دا ساۋساقپەن سانارلىق. سول سەبەپتى ءبىر- ءبىرىمىزدى توبەمىز كورىنگەن جەردەن تانىپ، سىيلاسىپ جاتامىز. الىستان تىلەۋلەس بوپ جۇرەمىز»، - دەيدى ول.
ال كيەلى اسپاپتىڭ ارعى- بەرگى تاريحىن سۋداي اعىزعاندا، ايىزىڭ قانادى- اق. سوڭعى بەس جىل كولەمىندە عانا پريما- قوبىزدىڭ قىر سوڭىنا شىنداپ تۇسكەن. اعاشتاردىڭ بار قاسيەتىن تۇسىنگەندە عانا جاساپ شىققان اسپابىڭ سويلەيدى دەيدى. قولىمەن جاساعان دۇنيەسىنە قۇدىرەت قونباي، ءتىل بىتپەي قالسا، شەبەر ءۇشىن ۇلكەن قاسىرەت كورىنەدى. ونداي ساتتەردى پەتر باستان كەشكەن. ءوز بالاسىنداي تۋىندىسىن ەرىكسىز وتقا تاستاعان كەزى بولعان ەكەن.
مۇندايدا ول: «مەن اسپاپتى ەمەس، ءوزىمدى وتقا سالامىن. كيەلى اسپاپ ءتىلسىز بولمايدى. ول سويلەپ كەتۋى كەرەك. سويلەمەسە، ول - مەنىڭ ءمىنىم. جۇمىس بارىسىندا الدەنەدەن قاتەلەسۋىم مۇمكىن»، - دەيدى.
پەتردىڭ جاساپ جۇرگەنى، البەتتە، قورقىتتىڭ كونە قوبىزى ەمەس. الايدا پريما- قوبىزدىڭ بابىن تابۋ دا وڭاي بولماي شىقتى. وعان قاجەتتى ماتەريالدى جاس شەبەر سان تاراپتان الدىرادى. ماسەلەن، ءمىنسىز پريما- قوبىزعا قاجەتتى ۇيەڭكى ۋكراينا جەرىنەن جەتكىزىلەدى. شىعىس سىبىردەگى انگارانى بويلاي وسكەن شىرشالاردى دا اتتاي قالاپ الدىرادى. ال ىسقىسى مەن قۇلاعىنا جارايتىن اعاشتار وڭتۇستىك شىعىس ازيا ايماعىنان اكەلىنەدى. وسىنىڭ ءبارى از قاراجاتتى قاجەت ەتپەيتىنىن ايتپاسا دا، ءتۇسىنىپ وتىرسىز. وسى جاراقتار ءوز جەرىمىزدە دە بار ەكەنىنە ءشۇبامىز جوق. شەبەردىڭ ايتۋىنشا، جوڭعار الاتاۋى مەن مەدەۋ القابىنداعى شىرشالار الەمدە تەڭدەسسىز دەپ تانىلعان. الايدا ول جەردىڭ ءبارى قورىققا اينالدى عوي.
پەتر كرۋچكە پريما- قوبىز جاساتۋعا كەزەككە تۇرعانداردىڭ قاراسى كوپ بۇل كۇندە. ولاردىڭ ىشىندە قىلقوبىز جاساپ بەر دەپ قولقا سالعاندار دا بار دەيدى. شەبەر كەرەكتى قىلعا قول جەتكىزگەنىمەن، مىقتى تەرى تاپپاي ءجۇر. الداعى ۋاقىتتا قورجىنىن قوبىزدىڭ تاعى ءبىر تۇرىمەن تولتىرۋعا مۇددەلى. بۇدان بولەك كەزەگىن كۇتكەندەردىڭ اراسىندا ەلگە تانىمال تۇلعالار دا بار ەكەنىن ايتىپ قالدى. ولاردىڭ اتىن اتامادى شەبەر. «سەبەبى، ول كىسىلەردىڭ تاپسىرىسىن ءالى جاسامادىم، ويداعىداي شىعا ما، ول دا بەيمالىم. ازىرگە جۇرتقا ايگىلەپ قايتەم» دەپ ىرىم ەتتى.
