ۇلىتاۋداعى «جەز كيىك» فەستيۆالىنە ەۋروپا، ازيا جانە لاتىن امەريكاسىنان تانىمال انشىلەر كەلەدى

الداعى اۋقىمدى مادەني فورۋمنىڭ باعدارلاماسى تۋرالى تولىعىراق قاراعاندى وبلىسىنىڭ مادەنيەت، مۇراعاتتار جانە قۇجاتتار باسقارماسىنىڭ جەتەكشىسى ەركەبۇلان اعىمبايەۆ ايماقتىق تەلەكوممۋنيكاتسيالار قىزمەتىندە وتكەن بريفينگ بارىسىندا ايتىپ بەردى.

 - «جەز كيىك» 1 - حالىقارالىق فولكلورلىق ۇجىمدار فەستيۆالى «رۋحاني جاڭعىرۋ» باعدارلاماسى بويىنشا ۇيىمداستىرىلعان. بۇگىندە باعدارلامانىڭ تۇجىرىمداماسى مەن باعدارلاماسى جاساقتالدى. 13 - شىلدەدە « ۇلىتاۋ» ەتنو- روك- توبىنىڭ جەكە كونسەرتى وتەدى، - دەپ ءمالىم ەتتى ەركەبۇلان اعىمبايەۆ. - فەستيۆالگە مەكسيكا، پەرۋ، پولشا، رەسەي، تۇركيا، تاجىكستان، فرانسيا، شوتلانديا، جاپونيانىڭ

 11 كاسىبي ۇجىمدارى، سونداي- اق قازاقستاننان ەكى ۇجىم: «ارقا سازى» فولكلورلىق ءانسامبلى (قاراعاندى) جانە «قوبىز سارىنى» قوبىزشىلار ءانسامبلى (تالدىقورعان) قاتىسادى.

  ۇلىتاۋ اۋدانىنىڭ بولاتساي مەكەنىندە ەتنواۋىل قۇرىلادى. وندا 18 كيىز ءۇي، ساحنا، ويىن الاڭدارى، التىباقان، ساۋدا شاتىرلارى، قولونەر شەبەرلەرىنە ارنالعان دۇڭگىرشەكتەر، شاعىن ساۋلەت مۇسىندەرى ورناتىلادى.

 ءبىرىنشى كۇنى كونسەرت فينالىندا بارلىق قاتىسۋشىلار مەن قوناقتار «قارا جورعا» ءبيىن بيلەيدى.

فەستيۆالدىڭ ماقساتى - ۇلىتاۋ اۋدانىندا تۋريزمدى دامىتۋ، سونداي- اق فولكلورلىق ونەردى العا جىلجىتۋ. شارا شەڭبەرىندە سونىمەن قاتار تۋريستىك اگەنتتىكتەر فورۋمى وتەدى.

 14 - شىلدەدە فەستيۆال جەزقازعان قالاسىنداعى كەڭگىر سۋ قويماسىنىڭ جاعالاۋىندا جالعاساتىن بولادى.

 - جەزقازعاندا فەستيۆالعا قاتىسۋشىلاردىڭ شەرۋى جانە كلاسسيكالىق مۋزىكا كەشى وتەدى. وعان 21 ءانشى قاتىسادى. كلاسسيكالىق مۋزىكا كەشىن اتاقتى ءانشى بيبىگۇل تولەگەنوۆا اشادى، - دەدى بايانداماشى.

 كورەرمەندەر الدىندا ءوزىنىڭ ونەرلەرىن ءتۇرلى ەلدەردەن كەلگەن كلاسسيكالىق مۋزىكا شەبەرلەرى كورسەتەدى: شەنول جانە گيۋلچوحرا تالىنلى (تۇركيا)، اننا ريان (اۆستريا)، ماركو بوەني (يتاليا)، اسميك لەوليان (ارمەنيا)، جەڭىسبەك پيازوۆ (وزبەكستان)، يگور پودگورنۋ (مولداۆيا)، ۆلاديمير موروز (رەسەي)، يلحام نازاروۆ (ازەربايجان)، ايمان مۇساقوجايەۆا جانە نۇرجامال ۇسەنبايەۆا (قازاقستان) جانە تاعى باسقالارى.

فەستيۆال فولكلورلىق جانە كلاسسيكالىق مۋزىكا گالا- كونسەرتىمەن اياقتالادى. سوڭىندا مەرەكەلىك وتشاشۋ بولادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى