ەلباسى قورىنىڭ «التىن توبىلعى» ادەبي بايقاۋىنىڭ شارتتارى مەن ەرەجەلەرى ءتۇسىندىرىلدى

ءتورتىنشى رەت وتكىزىلىپ وتىرعان بۇل بايقاۋدىڭ نەگىزگى ماقساتى - قازىرگى زامانعى قازاقستاندىق ادەبيەتتى دامىتۋ، ناسيحاتتاۋ، سول ارقىلى كاسىبي قالامگەرلەردىڭ جاڭا بۋىنىن، جاڭا ەسىمدەردى قالىپتاستىرۋ.

«بۇل بايقاۋ ەلىمىزدىڭ جاس اقىن- جازۋشىلارىنىڭ اتىن شىعارىپ، ولاردى قارجىلاي قولداۋ ارقىلى شىعارماشىلىقتارىن شىڭداۋعا زور ستيمۋل بەرەدى دەگەن سەنىمدەمىن. ادەتتەگىشە، بيىل دا ۇسىنىلعان تۋىندىلار مازمۇنى مەن يدەيا ەرەكشەلىگىنە، بىرەگەيلىگىنە، كوركەمدىك قۇرىلىمىنا بايلانىستى باعالانادى. قابىلدانعان جۇمىستاردى ەلىمىزگە تانىمال مادەنيەت قايراتكەرلەرى مەن اقىن- جازۋشىلاردان قۇرالعان قازىلار القاسى ساراپتايتىن بولادى. شىعارما لاقاپ اتپەن قابىلدانادى. باعالاۋ كەزىندە قازىلار القاسى تۋىندى اۆتورىنىڭ ەسىمىن بىلمەيتىندىكتەن، بايقاۋ بارىنشا ءادىل وتەدى»، - دەدى ەلباسى قورى اتقارۋشى ديرەكتورىنىڭ ورىنباسارى سۇلتان ايتجانوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

 بايقاۋعا 18-35 جاس ارالىعىنداعى ازاماتتار قاتىسا الادى. ۇسىنىلعان تۋىندىلار بۇعان دەيىن ەش جەردە جاريالانباعان بولۋى ءتيىس.

«التىن توبىلعى» سىيلىعى «ۇزدىك پروزا»، «ۇزدىك پوەزيا»، «ۇزدىك دراماتۋرگيا»، «بالالارعا ارنالعان ۇزدىك شىعارما» سياقتى ءتورت اتالىم بويىنشا تاعايىندالادى. ءاربىر نوميناتسيا جەڭىمپازىنا 1 ميلليون تەڭگەدەن سىياقى بەرىلەدى. سونىمەن قاتار، «استانانىڭ 20 جىلدىعىنا ارنالعان ۇزدىك شىعارما» اتتى ارنايى تاقىرىپتىق نوميناتسيا بويىنشا سىياقى كولەمى 1,5 ميلليون تەڭگەنى قۇرايدى.

بايقاۋعا العاشقى جىلى 120 جۇمىس جىبەرىلسە، 2016 -جىلى - 110، 2017 -جىلى - 132 ءوتىنىم كەلىپ تۇسكەن. بىلتىر ەڭ ۇزدىك لاۋرەاتتاردىڭ شىعارمالارى ارنايى باسىلىممەن كىتاپ بولىپ شىقتى.

وتىنىمدەر 2018 -جىلعى 1 - شىلدە مەن 1- قاراشا ارالىعىندا قابىلدانادى. جەڭىمپازدار ەسىمى 2018 -جىلى جەلتوقسان ايىندا جاريالانادى. تولىق اقپاراتپەن تۇڭعىش پرەزيدەنت قورىنىڭ رەسمي سايتىنان تانىسۋعا بولادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى