ءتۇرلى ۇلت وكىلدەرىنەن قۇرالعان اسكەريلەر قازاق ءتىلىن بىلۋدەن سايىسقا ءتۇستى
ۇلتتىق ۇلاننىڭ «وڭتۇستىك» وڭىرلىك قولباسشىلىعىنىڭ باسپا ءسوزىنىڭ مالىمدەۋىنشە، اسكەري قۇرىلىمعا قاراستى شىمكەنت، تاراز، قىزىلوردا قالالارى مەن الماتى وبلىسىنىڭ ۇزىناعاش اۋلىنان شاقىرىلعان ۇلاندىق سايىسكەرلەر شاراعا ۇلكەن دايىندىقپەن كەلگەن. سايىسقا جەتى ۇمىتكەر قاتىسىپ، ءوز بولىمدەرىنىڭ نامىسىن قورعاعان.
«ماقال- ماتەل ايتۋدان جارىسقا تۇسكەن اسكەريلەر اراسىندا سەرجانت الەكساندر شەلوكوۆ قاتارلاستارىنان وق بويى وزىپ شىقتى. ول ءوزىن تانىستىرۋدا دا دومبىرانى ايتىستىڭ ماقامىمەن شەرتىپ، كورەرمەندى بىردەن باۋراپ العان ەدى. شىمكەنتتەن كەلگەن ازەربايجان ۇلتىنىڭ وكىلى سەرجانت نۇراددين مۇستافايەۆ قازاقتىڭ سالت- ءداستۇرىن تەرەڭ ويلى سوزدەرمەن جەتكىزىپ، پاراساتتى قازاق ەر- ازاماتىنىڭ تۇلعاسىن كورسەتە الدى. ال سايىسكەرلەر ىشىندەگى ەڭ جاسى قاتارداعى الەكساندر مامىكينگە توتەپ بەرەر قارسىلاس بولمادى. الەكساندردىڭ ءسوز ساپتاۋى، وي قورىتۋى، تانىم- تۇيسىگى مەن ءبىلىمى ارتىمىزدا كەلە جاتقان جاس تولقىن ۇرپاقتىڭ شىعار بيىگىن كورسەتكەندەي. ول وسى شارانىڭ وزىنە جاڭا ۇلگى الىپ كەلدى. كۇنى كەشە، وتان قورعاۋشى كۇنى جاۋىنگەرلىك پارادتا شىرقالعان «مەن قازاقپىن» ءانىن رۋحتانىپ، ارقالانىپ ايتتى»، - دەلىنگەن باسپا ءسوز قىزمەتى تاراتقان اقپاراتتا.
بايقاۋ قورىتىندىسى بويىنشا 6698-اسكەري بولىمىنەن كەلگەن سەرجانت نۇراددين مۇستافايەۆ 3-ورىندى، 7552-اسكەري بولىمىنەن قاتىسقان سەرجانت الەكساندر شەلوكوۆ 2-ورىندى، ال 28237 اسكەري بولىمىنەن سايىسقا تۇسكەن قاتارداعى الەكساندر مامىكين 1-ورىندى يەلەندى.
ارايلىم جولداسباي
