ەلباسى: قىتايمەن قارىم- قاتىناسىمىز ءوزارا ءتيىمدى ىنتىماقتاستىقتىڭ ۇلگىسى بولۋى ءتيىس
«ءسىزدى مەملەكەتتىك كەڭەس پرەمەرى لاۋازىمىنا قايتا سايلانۋىڭىزبەن تاعى دا قۇتتىقتاعىم كەلەدى. بۇل ءبىزدى قۋانتادى ءارى جۇمىستارىمىزدى ودان ارى جالعاستىرۋعا مۇمكىندىك بەرەدى»، - دەپ اتاپ ءوتتى قازاقستان پرەزيدەنتى.
سونىمەن قاتار ەلباسى لي كىشياڭنىڭ جەتەكشىلىگىمەن قىتاي كوممۋنيستىك پارتياسىنىڭ 19-سيەزىندە جانە بۇكىل قىتايلىق حالىق وكىلدەرى جينالىسى سەسسياسىندا جۇكتەلگەن مىندەتتەر تابىستى ورىندالارىنا سەنىم ءبىلدىردى.
«قىتايدىڭ الدىندا ۇلكەن مىندەت تۇر جانە ءبىز دوستاس كورشى، قايىرىمدى دوس رەتىندە سىزدەردىڭ باستامالارىڭىزعا قولداۋ كورسەتىپ، كومەك بەرەتىن بولامىز. ەلدەرىمىز اراسىنداعى ساياسي جانە ەكونوميكالىق سەرىكتەستىك جاڭا دەڭگەيگە كوتەرىلىپ كەلەدى. ءبىزدىڭ قارىم- قاتىناسىمىز ءوزارا ءتيىمدى ىنتىماقتاستىقتىڭ ۇلگىسى بولۋى ءتيىس»، - دەدى مەملەكەت باسشىسى.
ءوز كەزەگىندە لي كىشياڭ قازاقستان پرەزيدەنتىنىڭ بۇل جولعى ساپارى جەمىستى بولارىنا سەنىمدى ەكەندىگىن باسا ايتتى.
«بۇل ساپارىڭىز جانە چيڭداۋدا وتەتىن ش ى ۇ سامميتىنە قاتىسۋىڭىز قىتايلىق- قازاقستاندىق قارىم- قاتىناستى جاڭا بيىككە كوتەرەتىندىگى ءسوزسىز»، - دەدى ول.
اۆتور: مارلان جيەمباي
