نازاربايەۆ ۋنيۆەرسيتەتىنە جۇمىسقا قابىلداۋ شارتتارى قانداي

ۋنيۆەرسيتەت پروۆوستى، پروفەسسور يلەسانمي ادەسيدانىڭ ايتۋىنشا، باستى تالاپ ول - كاسىبي دايىندىق. ۇمىتكەردىڭ ۇلتى مەن ءناسىلى ەسكەرىلمەيدى. «ارينە، ءبىز الەمنىڭ تۇكپىر- تۇكپىرىندە جۇمىس ىستەپ جۇرگەن قازاقستاندىقتاردىڭ ءوز ەلىنە قايتقانىن قالايمىز. ولار شەتەلدە پروفەسسور بولىپ ءجۇرىپ، اتالعان دارەجەنىڭ مۇمكىندىكتەرىن تولىق پايدالانا الماسا، بىزگە كەلىپ، تولىققاندى پروفەسسور بولا الادى. ءبىز بىلەمىز، بۇگىندە قازاقستاننىڭ التى ازاماتى يزرايلدىڭ بەن- گۋريون اتىنداعى ۋنيۆەرسيتەتتە گەنەتيكامەن اينالىسادى. ونداي ازاماتتار كوپ. ولار قازاقستانعا كەلىپ، ءبىزدىڭ باعدارلامالارىمىزعا قاتىسادى دەگەن ءۇمىت بار»، - دەيدى ي. ادەسيدا.

ال جوعارى ءبىلىم بەرۋ مەكتەبىنىڭ دەكانى ايدا ساعىنتايەۆانىڭ سوزىنە قاراعاندا، نازاربايەۆ ۋنيۆەرسيتەتىنە «بولاشاق» باعدارلاماسىنىڭ تۇلەكتەرى ءجيى كەلەدى. ولاردى جۇمىسقا الماسا، قاتتى رەنجيدى. «ءيا، ولاردى جۇمىسقا الماسا، كەي كەزدە رەنجىپ كەتەدى. ارينە، مەن ءوزىم قازاقستان ازاماتى بولعاننان كەيىن جەرلەستەرىمدى كەرى قايتارعان وڭاي ەمەس. ءبىراق مەن ىلعي ايتامىن، بىزگە كاسىبي ماماندار قاجەت. ال ولاردىڭ قاي ەلدەن كەلگەنى ماڭىزدى ەمەس. سوندىقتان «وسى جەردىڭ ازاماتىمىن» دەگەندى ساۋداعا سالۋدىڭ قاجەتى جوق. ويتكەنى باسەكەلەستىك كەزىندە ادامنىڭ ۇلتتىق ەرەكشەلىكتەرى ەمەس، جەكە قارىم- قابىلەتتەرى باعالانادى. سوندىقتان ءبىز جەرگىلىكتى ۇمىتكەرلەر ءۇشىن ەرەكشە جاعداي جاساماۋعا كەلىستىك. بارلىعىنا بىردەي تالاپتار بار. سونى ورىنداي ءبىلۋ كەرەك»، - دەپ اتاپ كورسەتتى ا. ساعىنتايەۆا.

ايتا كەتەيىك، بۇگىن نازاربايەۆ ۋنيۆەرسيتەتىندە جوعارى ءبىلىم بەرۋ كوشباسشىلارىنىڭ VII ەۋرازيالىق فورۋمى (EHELF) باستالدى. بيىلعى فورۋم جوعارى ءبىلىم بەرۋ سالاسىنداعى يننوۆاتسيالارعا ارنالىپ وتىر. حالىقارالىق شاراعا وتاندىق جانە شەتەلدىك ۋنيۆەرسيتەتتەردىڭ عالىمدارى، توپ- مەنەدجەرلەر مەن ستراتەگ ماماندار جينالدى. ولاردىڭ ىشىندە رەسەي، رۋمىنيا، اقش، قىرعىزستان، قىتاي، اۆستراليا جانە تاعى باسقا جوعارى وقۋ ورىندارىنىڭ وكىلدەرى بار. ەكى كۇندىك ءماجىلىس كەزىندە فورۋم قاتىسۋشىلارى وزىق تەحنولوگيالار ارقىلى ءبىلىم بەرۋ سالاسىن جاڭعىرتۋ ماسەلەلەرىن تالقىلايدى.

 العاشقى سەسسيادا حالىقارالىق ساراپشى دجاميل سالمي جوعارى ءبىلىم بەرۋ سالاسىنىڭ قالايشا وزگەرەتىنىنە بولجام جاسادى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى