بوكس: ەركەجاندى جەڭگەن ۆەتنام «قىزى» ەركەك بولىپ شىقتى
ءوز سالماعىنىڭ ۇزدىگى اتانۋمەن قاتار، جاسوسپىرىمدەر وليمپيادا ويىندارىنا جولداما يەلەنۋ ءۇشىن باق سىناستى. اتاپ وتەرلىك جايت، ەلىمىز بىلعارى قولعاپ باسەكەسىندە ازيا قۇرلىعىندا تەڭدەسسىز ەكەندىگىن تاعى ءبىر دالەلدەدى. 10 التىن، 4 كۇمىس جانە 4 قولا جۇلدەمەن جالپى كوماندالىق ەسەپتە العاشقى ورىننان كورىندى.
Аltaynews.kz سايتىنىڭ جازۋىنشا، سايىس بارىسىندا تاڭعالارلىق جاعداي ورىن العان. ماسەلەن، شىعىس قازاقستاندىق ەركەجان داۋلەتجان قىزى 57 كەلىگە دەيىنگى سالماقتا التىن مەدال يەلەنۋ ءۇشىن شارشى الاڭعا شىققان. وعان دەيىن بۇرىمدى بوكسشىمىز يندونەزيا، موڭعوليا، جاپونيا ەلدەرىنەن كەلگەن سپورتشىلاردى تاس- تالقان ەتىپ جەڭگەن. فينالدا ۆەتنام ەلىنىڭ وكىلىمەن كەزدەسىپ، تورەشىلەر جەڭىستى سوعان بەرەدى. ال ارتىنان ونىڭ جىنىسىن اۋىستىرعان ەر بالا ەكەنى انىقتالدى.
ەركەجاننىڭ جاتتىقتىرۋشىسى ارمان تىنىبايەۆتىڭ ايتۋىنشا، ۆەتنامدىق بوكسشى وتكەن جىلدىڭ قاراشا ايىندا ءۇندىستانداعى الەم چەمپيوناتىندا توپ جارعان. سول جەردە ول جاسوسپىرىمدەر اراسىنداعى وليمپيادا ويىندارىنا جولداما يەلەنەدى.
«ونىڭ قيمىلى، كۇلگەنى، جۇدىرىقتاسۋ مانەرى ەر بالاعا قاتتى ۇقسادى. ازيا چەمپيوناتى كەزىندە ول وزىنە كوپ نازار اۋدارتتى. سايىس مارەسىنە جەتكەن سوڭ، AIBA حالىقارالىق بوكس قاۋىمداستىعى سەكەمدەنىپ، ودان د ن ك سىناماسىن العان. وسىلايشا شىندىقتىڭ بەتى اشىلىپتى»، - دەيدى ارمان تىنىبايەۆ.
باپكەردىڭ ايتۋىنشا، جارىس بىتكەن سوڭ، ەكى اپتا ۋاقىت ىشىندە اياق استى قۋانىشتى حابار جەتكەن. مۇنى ەلىمىزدىڭ قىزدار قۇراماسىنىڭ اعا جاتتىقتىرۋشىسى الماز قۋاتبەكوۆ ايتقان ەكەن. ەندى جاقىن ارادا ەركەجانعا ازيا ويىندارىنىڭ «التىنى» مەن جاسوسپىرىمدەر اراسىنداعى وليمپيادا ويىندارىنا جولداما تاپسىرىلاتىن بولادى.
