بولاشاقتا ۋنيۆەرسيتەتتەر قالاي وزگەرەدى
«بولاشاقتا ءاربىر ءۇش جىل سايىن وقۋ باعدارلاماسىن قايتا قاراۋعا تۋرا كەلەدى. سەبەبى ساباقتاردىڭ ءبارى 10 مينۋتتان اسپايدى. بارلىعى ونلاين رەجيمدە وتەدى. ۋنيۆەرسيتەتتى قۇرۋ دا قيىنعا تۇسپەيدى. ويتكەنى وقۋلىقتار، كىتاپحانالار، ءتىپتى زەرتحانالار ەلەكتروندى فورماتتا جۇمىس ىستەيدى. ستۋدەنتتەرگە سيفرلىق جۇيەمەن باعا قويىلادى. كوپ نارسە بلوكچەينگە نەگىزدەلەدى. سوسىن كەلەشەكتە ۋنيۆەرسيتەتتى بىتىرگەن جاس مامان التى ايدىڭ ىشىندە جۇمىس تاپپاسا، جوعارى وقۋ ورنى ونىڭ وقۋعا جۇمساعان اقشاسىن قايتارۋعا ءماجبۇر بولادى»، - دەدى د. سالمي جوعارى ءبىلىم بەرۋ كوشباسشىلارىنىڭ فورۋمىندا.
ساراپشىنىڭ ويىنشا، مەملەكەتتىك ۋنيۆەرسيتەتتەردى بيۋدجەت تاراپىنان قارجىلاندىرۋ كولەمى ازايۋى ابدەن مۇمكىن. الايدا وسى ساناتتاعى جوعارى وقۋ ورىندارى جەكە مەنشىك قاراجاتتى كوپتەپ تارتاتىن بولادى. سونىڭ ارقاسىندا رەكتورلار مەن عالىمداردىڭ جالاقىسى وسەدى.
«دەگەنمەن، قارجىنىڭ كولەمى دە، جالاقىنىڭ مولشەرى دە رەيتينگكە بايلانىستى بولادى. تۇلەكتەردىڭ جۇمىسقا تۇرۋ كورسەتكىشى جوعارى بولسا، ابيتۋريەنتتەر دە كوپ كەلەدى. دەمەك، اقشا دا تۇسەدى. سوندا ۇزدىك پروفەسسورلار پرەمەر- مينيستردەن دە ارتىق اقشا الۋى ابدەن مۇمكىن. سوسىن مۆا ءبىلىمنىڭ ساپاسىن انىقتايتىن دارەجەدەن ايىرىلادى. بارلىعى كرەاتيۆتى ويلاۋ قابىلەتىنە بايلانىستى بولادى. قازىرگى ۋنيۆەرسيتەتتەر وعان دايىن با؟ وسىنى ويلاۋىمىز قاجەت»، - دەپ اتاپ كورسەتتى د. سالمي.
ايتا كەتەيىك، بۇگىن نازاربايەۆ ۋنيۆەرسيتەتىندە جوعارى ءبىلىم بەرۋ كوشباسشىلارىنىڭ VII ەۋرازيالىق فورۋمى (EHELF) باستالدى. بيىلعى فورۋم جوعارى ءبىلىم بەرۋ سالاسىنداعى يننوۆاتسيالارعا ارنالىپ وتىر. حالىقارالىق شاراعا وتاندىق جانە شەتەلدىك ۋنيۆەرسيتەتتەردىڭ عالىمدارى، توپ- مەنەدجەرلەر مەن ستراتەگ ماماندار جينالدى. ولاردىڭ ىشىندە رەسەي، رۋمىنيا، اقش، قىرعىزستان، قىتاي، اۆستراليا جانە تاعى باسقا جوعارى وقۋ ورىندارىنىڭ وكىلدەرى بار. ەكى كۇندىك ءماجىلىس كەزىندە فورۋم قاتىسۋشىلارى وزىق تەحنولوگيالار ارقىلى ءبىلىم بەرۋ سالاسىن جاڭعىرتۋ ماسەلەلەرىن تالقىلايدى.
