ماعجاننىڭ جاينامازى - جادىگەر
وسى شاراعا اتسالىسقان ۇجىمداردىڭ ءبىرى - سولتۇستىك قازاقستان وبلىستىق مۋزەيلەر بىرلەستىگى وزدەرىنىڭ جەرلەسى ءھام قازاقتىڭ دارىندى اقىنى ماعجان جۇمابايەۆتىڭ ءومىر تاريحى مەن شىعارماشىلىعىنا قاتىستى 90 عا جۋىق ەكسپونات جيىنتىعىن اكەلىپتى. وسىلاردىڭ ىشىنەن كوزىمىزگە وتتاي باسىلعان بۇيىم - ماعجاننىڭ جاينامازى. جاينامازدىڭ كولەمى ادەتتەگىدەي شاعىن. شامامەن 1,50 * 0,50 مەتر. ۇزاق جىل ۇزدىكسىز پايدالانىلعاندىقتان تەسىلىپ، ءۇش جەرىنە ماتادان جاماۋ جاپسىرىلعان. جادىگەردىڭ ساجدەگە ماڭداي تيەر تۇسىندا ىستانبۇل قالاسىنداعى ەڭ كونە عيمارات - ايا سوفيا مەشىتىنىڭ ⅩⅨعاسىرداعى بەينەسى سالىنعان. سوعان قاراعاندا بۇل تۇرىك باۋىرلارىمىز جاساعان بۇيىم بولۋى ابدەن مۇمكىن. سونداي- اق قوس قاپتالى ءساندى ويۋمەن كومكەرىلگەن. ويۋ- ورنەك ءستيلىن بىلەتىندەر بۇل وسمانلى تۇركىلىك داۋىرىنە ءتان ساندىك بەينەلەۋ ونەرى دەيدى. ويتكەنى جوعارىداعى ايا سوفيا عيماراتىنىڭ ىشكى كوركەم بەزەندىرۋ ۇلگىسى ءدال وسىعان ۇقساس. جاينامازدىڭ ەكىنشى اياق پەن تىزە تيەتىن اۋماعى عيبادات ءۇيىنىڭ ميحرابىن بەينەلەيتىن سۋرەتتى ويۋلارمەن كومكەرىلىپتى.
سولتۇستىك قازاقستان وبلىستىق مۋزەيلەر بىرلەستىگى عىلىمي ادىستەمەلىكپەن قامتاماسىز ەتۋ ءبولىمىنىڭ مەڭگەرۋشىسى گۇلجاۋھار ءسادۋاقاسوۆا بۇل بۇيىم شامامەن ⅩⅩعاسىردىڭ باسىندا جاسالعان دەگەن بولجام ايتادى. جاينامازدى سارى مايداي ساقتاپ، جوعالتپاي بۇگىنگە جەتكىزگەن ادام - ماعجانىڭ تۋعان ءىنىسى ءسالىمجاننىڭ بالاسى تاسبولات ءسالىمجان ۇلى بەكەنوۆ. بۇل كىسى 2003 -جىلى ماعجاننىڭ تۋعانىنا 110 جىل تولعان مەرەيتويى ۇستىندە ءوز قولىمەن اكەلىپ مۋزەيگە تاپسىرعان.
بەكەن قايرات ۇلى، «ەگەمەن قازاقستان»
سۋرەتتى تۇسىرگەن ورىنباي بالمۇرات
