ۆاسيلي جيروۆ دانيار ەلەۋسىنوۆتىڭ قارسىلاسىن نەگە نوكاۋتقا تۇسىرمەگەندىگىن ايتتى
«ادەتتە، قارسىلاسىڭدى نوكاۋتقا جىبەرەمىن دەپ الدىڭا ماقسات قويىپ، تەك سول تۋرالى ويلاساڭ ول بولماي قالادى. ويتكەنى قارسىلاسىڭ سەنىڭ ۇمتىلىسىڭدى كورىپ، بارىنشا قورعانۋعا تىرىسادى. سوندىقتان نوكاۋتتى دايىنداۋ كەرەك، قارسىلاسڭدى الداپ بارىپ، مىقتى سوققىنى ول كۇتپەگەن جەردەن جاساۋ كەرەك. ونىڭ ۇستىنە ورتا سالماقتا نوكاۋت وتە سيرەك كەزدەسەدى. دانيارعا جانە بارلىق بوكسشىلارعا جەكپە-جەكتە ساتتىلىك پەن توزىمدىلىك تىلەيمىن!»، - دەدى جيروۆ.
ەسكە سالا كەتەيىك، 6 -ماۋسىمنان 7 -ماۋسىمعا قاراعان ءتۇنى ريو-2016 وليمپياداسىنىڭ چەمپيونى دانيار ەلەۋسىنوۆ ماجارلىق زولتان شابوعا قارسى لوندوندىق York Hall-دا كاسىبي رينگتە ەكىنشى جەكپە-جەگىن وتكىزدى.
بارلىعى 6 راۋند بولدى. سولاردىڭ ناتيجەسى بويىنشا جەڭىسكە قازاقستاندىق بوكسشى جەتكەن. ءدال وسى كەزدەسۋدەن كەيىن ەلەۋسىنوۆتىڭ پروديۋسەرى جەرلەسىمىزدىڭ كەلەسى كەزدەسۋىنىڭ وتەتىن ورنى مەن ۋاقىتىن اتاپ كەتتى. دانيار جانكۇيەرلەرىنە قولداۋ تانىتقاندارى ءۇشىن العىس ءبىلدىردى.
