قاسكەلەڭ جۇقپالى اۋرۋلار اۋرۋحاناسى جابىلادى - مينيستر ءبىرتانوۆ

مينيستر قاسكەلەڭ اۋرۋحاناسىنىڭ جاعدايىن ناشار دەپ باعالادى.

«قاسكەلەڭ قالاسىنداعى اۋرۋحانانىڭ جاعدايى ناشار. مەن قازىر قۇزىرلى ورگاندارعا قاسكەلەڭ جۇقپالى اۋرۋلار اۋرۋحاناسىن جاۋىپ، قاسكەلەڭ ورتالىق اۋرۋحاناسىنا قوسۋ تۋرالى ارنايى تاپسىرما بەرىپ جاتىرمىن. ورتالىق اۋرۋحانادا ارنايى قوسىمشا عيمارات بار. عيمارات جاڭا. وتە اۋىر ناۋقاستار الماتىعا نەمەسە تالدىقورعانعا تاسىمالداناتىن بولادى»، - دەدى مينيستر ەلجان ءبىرتانوۆ.

بۇگىن مينيستر باستاعان دەلەگاتسيا الماتى مەن الماتى وبلىسىنداعى جۇقپالى اۋرۋلار اۋرۋحاناسىن ارالاعان بولاتىن. مينيستر ءار مەكەمەنىڭ جۇمىسىن باعالاپ، ماتەريالدى-تەحنيكالىق احۋالىن تەكسەردى.

ايتا كەتۋ كەرەك، قاسكەلەڭ جۇقپالى اۋرۋلار اۋرۋحاناسىنىڭ مۇشكىل جاعدايى تۋرالى پاتسيەنتتەر الەۋمەتتىك جەلىدە جاريالاعان بولاتىن.

ولار سىرى ءتۇسىپ قالعان قابىرعالار، تاسى سىنعان ەدەندەردىڭ سۋرەتىن كورسەتكەن بولاتىن.

ءمينيستردىڭ ايتۋىنشا، بۇگىنگى تاڭدا رەسپۋبليكا بويىنشا 59 ادام مەنينگوكوكك جۇقپاسىن جۇقتىرعان.

رەسپۋبليكا بويىنشا مەنينگوكوكك جۇقپاسىنان 13 ادام كوز جۇمعان.

الماتىدا 5 ادام كوز جۇمدى. ولاردىڭ 2 ەۋى - 5 جاسقا دەيىنگى بالالار. ەكى بالانىڭ اناسى اۋرۋدىڭ العاشقى بەلگىلەرى باستالعاندا جەكەمەنشىك ەمحاناداعى وزدەرىنىڭ جەكە دارىگەرلەرىنەن كەڭەس العانى بەلگىلى بولدى.

سىرقاتتانعانداردىڭ ءبىرى - 27 جاستاعى ءورت ءسوندىرۋشى ولجاس سۇلەيمەنوۆتىڭ اۋرۋى نەبارى 12 ساعاتتىڭ ىشىندە اسقىنىپ، كەنەتتەن كوز جۇمعان.

جالپى، الماتى وبلىسىندا 4 ادام كوز جۇمدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى