وڭتۇستىكتە «مەن قازاقپىن» حالىقارالىق جوباسىنىڭ ۇزدىكتەرى انىقتالدى
ءدۇبىرلى دودادا ءار اۋداننان ۇزدىك شىققان 73 ونەرپاز قاتىسىپ، تەرمە، كۇي، ءداستۇرلى ءان جانرى بويىنشا ونەرلەرىن ورتاعا سالدى، دەپ حابارلايدى قازاقپارات ءتىلشىسى.
17-29 -مامىر كۇندەرى قالا- اۋدانداردا وتكەن جوبادا قازىلار القاسى ونەرپازداردىڭ كاسىبيلىگىنە، بىلىكتىلىگىنە، ءجۇرىس-تۇرىسى مەن كيىم ۇلگىسىنە ءمان بەردى. بايقاۋ قورىتىندىسى بويىنشا وڭتۇستىكتەن ۇزدىك دەپ ءۇش ونەرپاز ىرىكتەلىپ، حالىقارالىق مەگا-جوبادا ءوڭىردىڭ نامىسىن قورعايتىن بولدى.
ولاردىڭ قاتارىندا ءداستۇرلى ءان ونەرى بويىنشا سوزاقتىق ورازءالى جاڭابايەۆ، تەرمە جانرى بويىنشا وتىرارلىق رۋسلان اقىمبەكوۆ، كۇي جانرى بويىنشا ماقتارالدىق شىڭعىس يسايەۆ ونەرسۇيەر قاۋىمنىڭ قوشەمەتىنە بولەندى. وبلىستان ىرىكتەلىپ شىققان ءۇش ونەرپاز الداعى ۋاقىتتا «Qazaqstan» تەلەارناسىنداعى «Men Qazaqpin» جوباسىنا قاتىسادى دەپ كۇتىلۋدە.
رەسپۋبليكالىق اينالىمدا جەڭىسكە جەتكەن جەڭىمپازدار «جىلدىڭ ەڭ ۇزدىك ءداستۇرلى ءانشىسى»، «جىلدىڭ ەڭ ۇزدىك تەرمەشىسى» جانە «جىلدىڭ ەڭ ۇزدىك كۇيشىسى» اتالىمدارى بويىنشا ماراپاتتالاتىن بولادى.
