جىل سوڭىنا دەيىن ەلورداداعى بارلىق جەدەل جاردەم كولىكتەرى سارى تۇسكە بويالادى
استانا قالاسى مەديتسينالىق جەدەل جاردەم ستانساسىنىڭ باس دارىگەرى تيمۋر مۇراتوۆ تىلشىلەرگە جەدەل جاردەم قىزمەتىنە قاتىستى ەنگىزىلگەن جاڭا ستاندارتتارمەن تانىستىرىپ، سانيتارلى كولىكتى جارىق شاعىلىستىراتىن كۇلگىن ەلەمەنتتەرى بار سارى تۇسكە بوياۋدىڭ سەبەپتەرىن ءتۇسىندىردى.
«ءبىزدىڭ ەلدىڭ ماماندارى حالىقارالىق تاجىريبەنى زەرتتەدى. ساراپتاما دامىعان ەلدەردە قانىق سارى تۇسكە بويالعان جەدەل جاردەم كولىگىنىڭ كوپتەگەن كولىكتەر اعىمىندا كوزگە بىردەن تۇسەدى. سول سەبەپتى دە ول وقيعا ورنىنا تەز ارادا جەتەدى. قازىرگى تاڭدا ەلىمىزدىڭ بارلىق قالالارىندا جەدەل جاردەم كولىكتەرى سارى تۇسكە بويالىپ جاتىر. جىل سوڭىنا دەيىن جەدەل مەديتسينالىق جاردەم ستانساسىنىڭ اۆتوپاركىندەگى كولىكتەردىڭ بارلىعى وسىنداي بولادى»، - دەدى تيمۋر مۇراتوۆ.
سونداي-اق، ول كولىكتەردىڭ قاي ۋاقىتتا جانە قانداي جاعدايدا ارنايى دىبىستى سيگنالدى قوساتىنى تۋرالى ايتىپ بەردى.
«جەدەل جاردەم كولىگىنىڭ ارنايى دابىلدى قۇرىلعىسى تاڭعى 8:00-دەن 23:00-كە دەيىن قوسىلاتىن بولادى. ونى تەك قانا ناۋقاستى تاسىمالداعان كەزدە، ناۋقاسقا بارا جاتقان كەزدە قوسۋعا بولادى. باسقا ۋاقىتتا ەگەر بريگادا جۇمىسىن ءبىتىرىپ، بازاعا قايتىپ بارا جاتسا، وندا بارلىق سيگنالدار ءوشىرىلىپ تۇرادى. ساعات 23 تەن كەيىن ارنايى دابىلى ەمەس، ونىڭ تەك جارىق شاعىلىستىرۋشى قۇرىلعىسى عانا قوسىلادى»، - دەپ مالىمدەدى تيمۋر مۇراتوۆ.
ەستەرىڭىزگە سالا كەتەيىك، ق ر دەنساۋلىق ساقتاۋ مينيسترلىگىنىڭ بۇيرىعىنا سايكەس 2018 -جىلدان باستاپ بارلىق جەدەل جاردەم كولىكتەرى ءبىرىڭعاي ستاندارتتارعا ساي سارى تۇسكە بويالۋى ءتيىس.
