قازاقستان مەكتەپتەرى قانشا ءپاندى اعىلشىن تىلىندە وقىتاتىنىن وزدەرى تاڭدايدى
ق ر پارلامەنتى ءماجىلىسىنىڭ پلەنارلىق وتىرىسىندا دەپۋتات ءجاميلا نۇرمامبەتوۆا ءتورت ءپاندى اعىلشىن تىلىندە وقىتۋ ءۇشىن شامامەن 32 مىڭ مۇعالىمنىڭ قاجەتتىگىن ايتتى. ال بۇگىندە ارنايى دايىندىقتان 11,5 مىڭ مۇعالىم عانا وتكەن.
«ۇكىمەت ەسەبىندەگى دەرەكتەرگە سايكەس، اعىلشىن تىلىندە وقىتقانى ءۇشىن تەك 725 مۇعالىم عانا ءتيىستى ۇستەمەاقى الادى. دەمەك، 725 مۇعالىم عانا تولىققاندى اعىلشىن تىلىندە جۇرگىزە الادى، بۇل جالپى قاجەتتىلىكتىڭ % 2 قۇرايدى. ارنايى وقىتىلعان مۇعالىمدەردىڭ 1370- ءى تەرميندەردى عانا ۇيرەتە الادى، قالعاندارى مۇلدەم ساباق بەرمەيدى. مۇنداي قارقىنمەن ءبىر جىل ەمەس، ەكى نەمەسە ءۇش جىل قاجەت بولادى. سونىمەن بىرگە، پرەزيدەنت جولداۋىندا 2019 -جىلدان باستاپ، 10-11 - سىنىپتاردا كەيبىر پاندەر اعىلشىن تىلىندە بەرىلەدى دەپ جازىلعان. وسىعان بايلانىستى، مەملەكەت باسشىسى قويعان تاپسىرمانى قالاي جۇزەگە اسىراتىنىڭىزدى بىلگىم كەلەدى»، - دەپ سۇراق قويدى ءجاميلا نۇرمامبەتوۆا ءبىلىم جانە عىلىم مينيسترىنە.
ءوز كەزەگىندە ەرلان ساعاديەۆ مينيسترلىك بۇل ماسەلەدە ءوز ۇستانىمىن وزگەرتكەنىن ءمالىم ەتتى. ماسەلەن، مەكتەپتەر اعىلشىن تىلىندە قانشا ءپاندى وقىتقىسى كەلەتىنىن وزدەرى تاڭدايتىن بولادى.
«قازىر مينيسترلىكتىڭ ستراتەگياسى وزگەردى، مەكتەپتە سىنىپ پەن ولاردىڭ اتا- انالارىنىڭ تىلەكتەرىنە بايلانىستى 1-دەن 4-كە دەيىنگى پاندەردى اعىلشىن تىلىندە وقىتۋعا تاڭداۋ قۇقىعى بەرىلەدى. بۇل وقىتۋشىلارمەن عانا ەمەس، حالىقتىڭ دا تاڭداۋ قۇقىعىن سۇراۋىمەن تىكەلەي بايلانىستى»، - دەدى مينيستر.
ونىڭ ايتۋىنشا، بيىل العاشقى 12 مىڭعا جۋىق مۇعالىم اعىلشىن تىلىندە ساباق بەرۋ كۋرسىنان وتكەن. ەرلان ساعادييەۆ ەكى مىڭ مۇعالىمنىڭ ساباق بەرۋگە كىرىسىپ كەتكەنىن، ءبىراق ۇستەمەاقىنىڭ بارىنە تولەنبەگەنىن اتاپ ءوتتى. بۇل ماسەلەنىڭ ءمان- جايى انىقتالىپ جاتىر.
«قىركۇيەك ايىنان باستاپ، تاعى 2 مىڭ مۇعالىم اعىلشىن تىلىندە ساباق بەرۋگە نيەت ءبىلدىردى. 8300 مۇعالىم ب2 دەڭگەيىنە جەتۋ ءۇشىن وقۋدى جالعاستىرادى. بۇل دەڭگەيگە جەتپەيىنشە، مۇعالىمدى ساباق بەرۋگە جىبەرە المايمىز. قوسىمشا، پەداگوگيكالىق فاكۋلتەتتەردىڭ 6 مىڭ تۇلەگى باكالاۆريات جانە جانە ماگيستراتۋرا دەڭگەيىندە اعىلشىن تىلىندە ساباق بەرۋدى ۇيرەنىپ ءجۇر. سوندىقتان، ەكى جىلدا بۇل تاپسىرمانى ورىندايمىز دەپ ايتا المايمىن. 3-4 جىلدان كەيىن بارلىق مەكتەپتەر ەڭ كەمى - ءبىر ءپاندى نەمەسە 4 ءپاندى اعىلشىن تىلىندە وقىتۋعا كوشە الادى»، - دەپ تۇيىندەدى ءسوزىن مينيستر.
اۆتور: ايجان سەرىكجان قىزى
