شەتەلدىك كەڭەسشىلەردى تارتۋدى قىسقارتۋ كەرەك - ەسەپ كوميتەتى
«مەم ورگاندار مەن ۇلتتىق كومپانيالار حالىقارالىق كەڭەسشىلەردى تارتۋعا قوماقتى قارجىنى جۇمساۋدى جالعاستىرىپ كەلەدى. ولاردىڭ ەڭبەكاقاسى جەرگىلىكتى مامانداردان 3-4 ەسە اسىپ تۇسەدى. سونىمەن بىرگە ولاردىڭ ەڭبەكاقىسىن رەتتەۋ بويىنشا نورماتيۆتىك- قۇقىقتىق بازا جوق. وسى ورايدا ساراپشىلاردى تارتۋ بويىنشا ءبىرىڭعاي ورتالىقتى قۇرۋ جولىمەن حالىقارالىق كەڭەسشىلەر قىزمەتتەرىنە شىعىستاردى وڭتايلاندىرۋ ءجون بولار ەدى»، - دەدى ن. گودۋنوۆا ءماجىلىستىڭ جالپى وتىرسىندا.
ونىڭ اتاپ وتۋىنشە، ەسەپ كوميتەتى زەرتتەۋ جۇرگىزۋ مەن حالىقارالىق كەڭەسشىلەردى تارتۋعا بيۋدجەت قارجىسىن پايدالانۋعا تالداۋ جۇرگىزدى. بۇل تۇرعىدا زەرتتەۋلەر جۇرگىزۋگە شىعىستار كولەمىندە ەلەۋلى ايىرماشىلىق انىقتالدى.
ن. گودۋنوۆانىڭ پايىمىنشا، زەرتتەۋلەردى جوسپارلاۋ مەن قابىلداۋ كەزىندە «جالعىز تەرەزە» قاعيداسىن ەنگىزۋ قاجەت. بۇل ءوز كەزەگىندە باعىتتالاتىن قارجىنىڭ تيىمدىلىگىن ارتتىرادى.
اۆتور: رۋسلان عابباسوۆ
