قازاقستاندا تەمەكى شەگەتىندەر كوپ پە

«ءبىزدىڭ مالىمەتىمىزگە سايكەس، قازاقستاندا تەمەكى شەگەتىندەردىڭ سانى 8 پروتسەنتكە تومەندەدى. ەندى، تاعى حالىقارالىق مالىمەتتەر دە بار. وندا 4 پروتسەنت دەپ كورسەتەدى. دەگەنمەن، ەڭ باستىسى، وڭ تەندەنسيا بايقالىپ وتىر. بۇگىندە قازاقستاندا ورتاشا ەسەپپەن 4 ميلليون ادام تەمەكى شەگەدى»، - دەيدى تەمەكىگە قارسى كواليتسيانىڭ مۇشەسى ءجاميليا سادىقوۆا.

ونىڭ ايتۋىنشا، تەمەكى شەگەتىندەردىڭ سانى ازايعاننان كەيىن وسى سالاداعى ءوندىرىستىڭ كولەمى 20 پروتسەتكە قىسقاردى. «نەگىزى، بۇنىڭ بارلىعى اكسيزدىڭ اسەرى عانا ەمەس. قوعامدىق جەرلەردى تەمەكى شەگۋگە تىيىم سالۋ، تەمەكى پاشكەلەرىنە قورقىنىشتى سۋرەتتەردى سالۋ جانە تاعى باسقا شارالار دا وڭ ناتيجەسىن بەردى. دەگەنمەن، اكتسيزدى ارتتىرۋ، ياعني سالىقتى كوبەيتۋدىڭ اسەرى قاتتى. سەبەبى تەمەكىنىڭ باعاسى كوتەرىلەدى»، - دەپ اتاپ كورسەتتى ج. سادىقوۆا.

 ايتا كەتەيىك، وتكەن جىلى قازاقستاندا تەمەكى اكسيزدەرى 1000 داناعا 6,2 مىڭ تەڭگەگە دەيىن كوتەرىلگەن بولاتىن. بيىل تاعى 7,5 مىڭ تەڭگەگە دەيىن ءوستى. كەلەسى جىلى اتالعان سالىق 8,7 مىڭ تەڭگەگە جەتۋى ءتيىس. الداعى ۋاقىتتا تەمەكى اكسيزدەرىنىڭ قۇنىن كورشى رەسەيدىڭ دەڭگەيىنە دەيىن كوتەرۋ كوزدەلىپ وتىر. ال سالىقتىڭ مولشەرى ارتسا، باعا دا كوتەرىلەدى. قازاقپارات تىلشىسىنە سۇحبات بەرگەن ساراپشىلار تەمەكى باعاسىنىڭ قالايشا وزگەرەتىنىن ايتىپ بەردى. بۇدان بولەك، دۇكەن سورەلەرىنەن تەمەكى ونىمدەرىن مۇلدەم الىپ تاستاۋى مۇمكىن.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى