مەنينگوكوكك جۇقپاسىنان كوز جۇمعان الماتىلىقتاردىڭ ەكەۋىنىڭ اۋزى بەرىك بولعان

«27 جاستاعى سۇلەيمەنوۆ ولجاس قابىلداۋ بولىمىنە كەلگەندە اۋزىم بەرىك دەپ تاعايىنداعان ءدارىنى قابىلداماعان. سوسىن اۋرۋحاناعا جاتۋدان باس تارتىپ، ۇيىنە كەتكەن. كەشكە دەيىن سۋ، ءدارى، تاماق ىشپەي، جاتىپ قالعان. جاقىندارى ول ۇيىقتاپ جاتىر دەپ كوڭىل اۋدارماعان. ءبىراز ۋاقىتتان سوڭ بارىپ ول اۋرۋحاناعا اۋىر جاعدايدا كەلدى. وكىنىشكە وراي، مەنينگوكوكك جۇقپاسىنىڭ ەپيدەميولوگيالىق ناۋقانى رامازان ايىمەن تۇسپا- تۇس كەلدى. ورازانى ساۋ ادام ۇستاۋ كەرەك. جاعدايى ناشارلاسا، قىزۋ كوتەرىلسە، ورازانى توقتاتىپ، ءدارى قابىلداۋ كەرەك. قايتىس بولعان 2 ادامنىڭ اۋزى بەرىك بولعانى انىقتالدى»، - دەدى الماگۇل دۇيسەنوۆا.

سونىمەن قاتار، قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ مارقۇم بولعان ولجاستىڭ اۋرۋحاناعا جاتۋدان باس تارتقانىن ايتتى.

«ول جۇقپالى اۋرۋحانالار اۋرۋحاناسىنا تۇسكەندە دارىگەرلەر انتيباكتەريالدىق تەراپيا تاعايىنداعان. ءبىراق ول ءوزى ءدارى قابىلداۋدان دا، اۋرۋحاناعا جاتۋدان دا باس تارتقان. وكىنىشكە وراي بىرنەشە ساعاتتان سوڭ ول اۋرۋحاناعا وتە اۋىر جاعدايدا جەتكىزىلدى. ونىڭ ءومىرىن اراشالاپ قالۋ مۇمكىن بولمادى»، - دەدى سەرىكبول مۋسينوۆ.

مۇنىڭ الدىندا الماتى ورتالىق مەشىتىنىڭ باس يمامى ەركىنبەك شوقايەۆ ناۋقاستانعان جاعدايدا اۋىز اشۋعا شاريعات رۇقسات بەرەتىنىن حابارلاعان بولاتىن.

قالالىق قوعامدىق دەنساۋلىقتى ساقتاۋ دەپارتامەنتىنىڭ مالىمەتىنشە، بۇگىندە الماتىدا 48 ادام مەنينگوكوكك جۇقپاسىنا كۇدىك تۋىنداعان سوڭ دارىگەرلەرگە جۇگىنگەن. ونىڭ ىشىندە 32 ادامدا مەنيگوكوكك جۇقپاسى بار ەكەنى زەرتحانالىق تۇردە راستالدى.

الماتىدا 5 ادام كوز جۇمدى. ولاردىڭ 2-ەۋى - 5 جاسقا دەيىنگى بالالار. ەكى بالانىڭ اناسى اۋرۋدىڭ العاشقى بەلگىلەرى باستالعاندا جەكەمەنشىك ەمحاناداعى وزدەرىنىڭ جەكە دارىگەرلەرىنەن كەڭەس العانى بەلگىلى بولدى.

سىرقاتتانعانداردىڭ ءبىرى - 27 جاستاعى ءورت ءسوندىرۋشى ولجاس سۇلەيمەنوۆتىڭ اۋرۋى نەبارى 12 ساعاتتىڭ ىشىندە اسقىنىپ، كەنەتتەن كوز جۇمعان. جالپى، الماتى وبلىسىندا 4 ادام كوز جۇمدى.

ال تالدىقورعاندا مەنينگيتتەن قايتىس بولعان ستۋدەنت بالا دا ورازا ۇستاعان. بۇل جونىندە مەديتسينالىق كوللەدجدىڭ ديرەكتورى سەرىك جانسەڭگىروۆ ءمالىم ەتتى، دەپ حابارلايدى قازاقپارات ءتىلشىسى.

كوللەدج ديرەكتورىنىڭ ايتۋىنشا، قايتىس بولعان راسۋل اسلان- وگلى مامەد ۇلى ەسىمدى ستۋدەنت جۇما كۇنى مەشىتكە بارعان. مەنينگوكوكك جۇقپاسىنان كوز جۇمعان ول مەديتسينالىق كوللەدجدىڭ جاتاقحاناسىندا تۇرعان ەكەن. قازىر راسۋلدىڭ جانىندا بولعان ستۋدەنت تە ينفەكسيالىق اۋرۋحاناعا جاتقىزىلعان، دارىگەرلەردىڭ باقىلاۋىندا.

«جالپى قايتىس بولعان ستۋدەنت اۋرۋحاناعا جەكسەنبى كۇنى تۇسكەن. ال دۇيسەنبى كۇنى ياعني، ماۋسىم ايىنىڭ 4- كۇنى كوز جۇمعان. قازىر اتالعان وقۋ ورنىنىڭ جاتاقحاناسىندا 96 ستۋدەنت تۇرادى. ولاردىڭ بارلىعىنا تەكسەرۋ جۇرگىزىلگەن» ، - دەدى كوللەدج ديرەكتورى. ال، جالپى، مەديتسينالىق كوللەدجدە 1054 ستۋدەنت وقيدى.

مەنينگوكوكك باكتەريالار قوزدىراتىن ءجىتى جۇقپالى اۋرۋ. ينفەكسيا جوتەلگەندە، تۇشكىرگەندە جانە سويلەگەندە جۇعادى. العاشقى بەلگىلەرى:

 - باستىڭ قاتتى اۋرۋى؛ - شولدەۋ، قۇسۋ؛

- تەمپەراتۋرانىڭ كوتەرىلۋى، قالتىراۋ؛

- بوزارۋ؛

- تابەتتىڭ تومەندەۋى؛

 - بورتپە؛

 - السىزدىك؛

- ارقا جانە اياق قولدىڭ اۋىرۋى؛

اۋرۋدىڭ الدىن الۋ - اۋرۋدىڭ العاشقى بەلگىلەرى (تاماقتىڭ قىزارۋى، السىزدىك، تەمپەراتۋرانىڭ كوتەرىلۋى، باس اۋرۋى) پايدا بولعان كەزدە دارىگەرگە كورىنۋ كەرەك، ونىڭ ايتقان نۇسقاۋلىعىن ورىنداۋ قاجەت؛

 - ءتۇرلى مادەني بۇقارالىق ءىس- شارالارعا قاتىسۋدى، ءجۇزۋ باسسەيندەرىنە بارۋدى، ويىن الاڭدارىندا ويناۋدى شەكتەۋ جانە جەكە تازالىقتى ساقتاۋ؛

 - عيماراتتاردى ءجيى جەلدەتىپ، كۇن سايىن ىلعالدى تازالاۋ؛

 - سوزىلمالى ينفەكتسيا وشاقتارى لور اعزالارىن تازالاۋ؛

- تەك قايناعان نەمەسە بوتەلكەدەگى سۋدى ءىشۋ؛

 - مۇزداۋ، اشىعۋ، ۇيقى قانباۋ، كۇيزەلۋ جانە ت. ب. اۋلاق بولۋ؛ اۋرۋدى ەمدەگەننەن الدىن العان جەڭىل ەكەندىگىن ءارقاشان ەستە ۇستاعان ابزال!

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى