دەنساۋلىق ساقتاۋ ءمينيسترى توقايەۆتىڭ مەنينگيتكە قاتىستى سىنىنا جاۋاپ بەردى
ەسكە سالا كەتسەك، سەنات ءتوراعاسى دەنساۋلىق ساقتاۋ مينيسترلىگىن «مەنينگيتپەن كۇرەستە سىلبىرلىق تانىتتى» دەپ ايىپتاعان بولاتىن.
«مەنينگيتپەن كۇرەستە، حالىققا اقپاراتتىق-ءتۇسىندىرۋ جۇمىستارىن جۇرگىزۋدە قانداي دا ءبىر كەمشىلىكتەردىڭ بولعانىن مويىندايمىز. سەبەبى، قوعاممەن ءوزارا بايلانىس فورماتى ايتارلىقتاي وزگەردى. ءبىز الەۋمەتتىك جەلىدە جۇمىس ىستەۋدى ۇيرەنىپ جاتىرمىز، بۇل تۇرعىدا بارلىق رەسۋرستى قولدانبادىق. بۇل سىنمەن كەلىسەمىز»، - دەدى ءبىرتانوۆ ۇكىمەتتە جۋرناليستەرگە بەرگەن سۇحباتىندا.
«ال ەپيدەمياعا قارسى شارالارعا كەلسەك، ولار دەنساۋلىق ساقتاۋ مينيسترلىگىنىڭ ستاندارتتارى مەن حاتتامالارىنا، حالىقارالىق ستاندارتتارعا سايكەس جۇرگىزىلىپ كەلەدى جانە جۇرگىزىلەدى. مەديتسينالىق كومەكتى ۇيىمداستىرۋدا، ءيا، سىن-ەسكەرتپەلەر بار، ونىمەن كەلىسەمىز. بۇل تۇرعىدا جۇمىس ىستەيمىز جانە كەمشىلىكتەردى جويامىز»، - دەپ ءوز ءسوزىن تولىقتىردى ول.
سونىمەن بىرگە، مينيستر بۇگىن الماتى وبلىسى مەن الماتى قالاسىنا ىسساپارمەن باراتىنىن ەسكە سالدى.
«ەڭ الدىمەن، رەسپۋبليكالىق شتاب جوسپارلاعان جانە بەلگىلەگەن شارالاردى اتقارۋدىڭ تيىمدىلىگىن باعالاپ كورگىمىز كەلەدى. بۇل دەنساۋلىق ساقتاۋ مينيسترلىگى قوعامدىق دەنساۋلىقتى ساقتاۋ كوميتەتى جۇرگىزەتىن الدىن الۋ جانە ەپيدەمياعا قارسى شارالار. ولاردىڭ قانشالىقتى ءتيىمدى جۇرگىزىلىپ جاتقانى تەكسەرىلەدى. اۋرۋدان كوز جۇمعان ناۋقاستاردىڭ تۋىستارى مەن جاقىندارىنا كوڭىل ايتامىز جانە مۇمكىندىگىنشە ولارمەن كەزدەسۋگە تىرىسامىز»، - دەدى ەلجان ءبىرتانوۆ.
