مينيستر بوزىمبايەۆ ءوزىنىڭ ورىنباسارىنىڭ ۇستالۋىنا قاتىستى پىكىر ءبىلدىردى
ايتا كەتەيىك، ۆيتسە-مينيستر جاقساليەۆ شۋچينسك- بۋراباي كۋرورتتىق ايماعىنداعى كولدى تازارتۋ جۇمىستارىن قابىلداۋدا زاڭعا قايشى ارەكەتتەرگە باردى دەپ ايىپتالدى جانە ءۇيقاماققا الىندى.
مينيستر جاقساليەۆتىڭ شۋچە- بۋراباي ايماعىنداعى كولدەردى تازارتۋعا قاتىستى ءىس بويىنشا ءۇيقاماققا الىنعانىن، بۇل جۇمىستىڭ 2013 -جىلى باستالعانىن اتاپ ءوتتى.
«مەردىگەر ۇيىممەن كەلىسىمشارت 2013 -جىلى قورشاعان ورتانى قورعاۋ بويىنشا وزگە ۆەدومستۆودا بەكىتىلگەن جانە جىلدار بويى جالعاسىپ كەلگەن. كۇدىك تۋدىرعان ەپيزود 2015 -جىلعا قاتىستى. ول كەزدە مەن مۇلدەم باسقا جەردە جۇمىس ىستەپ جۇرگەنمىن. سوندىقتان، بۇل ماسەلە بويىنشا پىكىر بەرە المايمىن. ونىڭ ۇستىنە قۇجاتتاردى ۇلتتىق بيۋرو الىپ كەتتى، تەرگەۋ ءجۇرىپ جاتىر»، - دەپ جاۋاپ بەردى مينيستر ۇكىمەت ۇيىندەگى جۋرناليستەر سۇراعىنا.
سونداي-اق، مينيستر باقىتجان جاقساليەۆتىڭ وتە بىلىكتى مامان ەكەنىن جەتكىزدى.
«ءوز تاراپىمنان وكىنىش پەن اياۋشىلىق قانا بىلدىرە الامىن. ءالى دە جاڭساقتىق ورىن الدى دەپ ۇمىتتەنەمىن. سەبەبى، ءبىزدىڭ ۇجىم، ەنەرگەتيكا مينيسترلىگى، تۇتاس رەسپۋبليكاداعى ەنەرگەتيكتەر باقىتجان مۇحامبەتقالي ۇلىن بىلىكتى جانە كاسىبي ەنەرگەتيك، ارىپتەس دەپ بىلەدى. جانە بۇل ءىستىڭ تەرگەۋ جۇمىستارى مينيسترلىك جۇمىسىنا، ونداعى مىندەتتەمەلەرىمىزدى اتقارۋعا ەش ىقپالىن تيگىزبەيتىنىنە ۇمىتتەنەمىن»، - دەپ ءوز ءسوزىن تۇيىندەدى قانات بوزىمبايەۆ.
