مەنينگيتكە قارسى جاپپاي انتيبيوتيك الۋ تۋرالى قاۋەسەتكە سەنبەۋ كەرەك - الماتى دارىگەرلەرى

بۇل تۋرالى قالالىق قوعامدىق دەنساۋلىق ساقتاۋ دەپارتامەنتىنىڭ باسشىسى ايزات مولداقاسىموۆا وڭىرلىك كوممۋنكياتسيالار قىزمەتىندە ايتتى.

«قۇزىرلى ورگان باسشىسى رەتىندە مەن الەۋمەتتىك جەلىدە تارالىپ جاتقان ءتۇرلى اقپاراتقا سەنبەۋدى سۇرايمىن. انتيبيوتيك دارىلەرى تەك ناۋقاسپەن بايلانىستا بولعان ادامدارعا عانا جازىلادى. بۇل پروتسەسس دارىگەرلەردىڭ باقىلاۋىندا بولۋ كەرەك. حالىق تەك رەسمي ورگانداردىڭ ايتقان مالىمدەمەسىنە عانا سەنۋى ءتيىس»، - دەدى ايزات مولداقاسىموۆا.

دەپارتامەنتتىڭ مالىمەتىنشە، بۇگىندە الماتىدا 48 ادام دارىگەر كومەگىنە جۇگىنگەن. ونىڭ ىشىندە 32 ادامدا مەنيگوكوكك جۇقپاسى بار ەكەنى زەرتحانالىق تۇردە راستالدى.

ايتا كەتۋ كەرەك، ق ر دەنساۋلىق ساقتاۋ ءمينيسترى ەلجان ءبىرتانوۆتىڭ مالىمدەۋىنشە، قاۋىپتى جۇقپادان جىل باسىنان بەرى قازاقستاندا 12 ادام كوز جۇمعان.

«جىل باسىنان بەرى قازاقستاندا مەنينگيت ينفەكسياسىن جۇقتىرعان 58 ناۋقاس تىركەلدى. ولاردىڭ 18 ى 14 جاسقا دەيىنگى بالالار. جىل باسىنان بەرى اتالعان دەرتتەن 12 ادام كوز جۇمدى، سونىڭ ىشىندە بەسەۋى 14 جاسقا دەيىنگى جەتكىنشەكتەر»، - دەدى مينيستر ورتالىق كوممۋنيكاتسيالار قىزمەتىندە.

الماتىدا 5 ادام كوز جۇمدى. ولاردىڭ 2 ەۋى - 5 جاسقا دەيىنگى بالالار.

الماتى وبلىسىندا بۇل دەرتتەن 4 ادام كوز جۇمدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى