جىرتىلعان، داقتارى بار تۋلار ءۇشىن جاۋاپقا تارتۋ تەتىكتەرى ازىرلەنەدى
استانادا مەملەكەتتىك رامىزدەر مەن ۆەدومستۆوارالىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى. ونىڭ بارىسىندا مەملەكەتتىك رامىزدەردىڭ دۇرىس ورنالاسۋىن قاداعالاۋ ماسەلەسى بويىنشا استانا قالاسى اكىمىنىڭ ورىنباسارى ەرمەك امانشايەۆ بايانداما جاسادى.
«استانا قالاسىنىڭ اكىمدىگى ەلوردا اۋماعىندا مەملەكەتتىك رامىزدەردىڭ پايدالانۋىن باقىلاۋ جۇمىستارىن جۇزەگە اسىرادى. قالالىق اكىمدىكتىڭ ماماندارى زاڭنامانىڭ تالاپتارىنا سايكەس تۇراقتى تۇردە تالداۋ جانە مونيتورينگ جۇمىستارىن جۇرگىزۋدە. ناتيجەسىندە، مەملەكەتتىك تۋدىڭ ماتەريالىنىڭ ەسكىرۋى، مەملەكەتتىك ەلتاڭبانىڭ ءتۇسىنىڭ وزگەرۋى سەكىلدى جاعدايلار انىقتالدى. الدىمدا سويلەگەن ارىپتەستەرىم ايتىپ وتكەندەي، استانا قالاسىندا دا جاقىندا مەملەكەتتىك كوميسسيا تاراپىنان تەكسەرۋ جۇمىستارى ءوتتى. ول بويىنشا 75 مەكەمە قارالدى. وسى تەكسەرىستىڭ ناتيجەسىندە دايىندالعان اقپاراتقا بايلانىستى، مىسالى تۋدىڭ لاستانۋى، كەيبىر جەرلەرىنىڭ جىرتىلۋى، تۇستەرىنىڭ كەتۋى سەكىلدى فاكتىلەر بار. ولاردىڭ بارلىعى 1 جۇمىس كۇنىندە تۇگەلدەي قايتا وزگەرتىلدى»، - دەدى ەرمەك امانشايەۆ.
قالا اكىمىنىڭ ورىنباسارى مەملەكەتتىك رامىزدەردىڭ دۇرىس ورنالاستىرىلۋىنا بايلانىستى ۇسىنىستارىن اتاپ ءوتتى.
«تۇنگى ۋاقىتتا مەملەكەتتىك رامىزدەردى جارىقتاندىرۋ دەگەن ماسەلە بار. سوعان بايلانىستى عيماراتتاردىڭ، ارحيتەكتۋرالىق نىسانداردىڭ ەرەكشەلىگىنە بايلانىستى، ولاردا قولدانىلعان قۇرىلىس ماتەريالدارىنا وراي جارىقتاندىرۋ ماسەلەسىندە ءبىر ستاندارتتاۋ نەمەسە الگوريتمدەر كەرەك سەكىلدى. بەكىتىلگەنى دۇرىس. بۇنىڭ ءبارىن ماماندارمەن بىرلەسە قاراستىرعان ءجون شىعار. مەملەكەتتىك رامىزدەردى ورنالاستىرۋ قاعيدالارىنا سايكەس، بارلىق مەملەكەتتىك زاڭدى تۇلعالار، ۇلتتىق كومپانيالار، حولدينگتەر، اق- لار مەن ج ش س- لار مەملەكەتتىك نىشاندارعا ارنالعان ەكسپوزيتسيا ورناتۋى ءتيىس. ءىس جۇزىندە بۇل نورمالاردى قاداعالاۋ ءۇشىن زاڭدى قۇقىق جەتىسە بەرمەيدى»، - دەيدى ول.
سول سەبەپتى ەرمەك امانشايەۆ اكىمدىك ايىپپۇل سالا الۋ ءۇشىن زاڭنامالىق قولداۋ كەرەكتىگىن اتاپ ءوتتى.
«جالپى، استانا قالاسى اكىمدىگى مەملەكەتتىك رامىزدەردى قولدانۋشىلاردى اكىمشىلىك جاۋاپكەرشىلىككە تارتۋ ءۇشىن ءدال قازىر مونيتورينگ جۇرگىزۋمەن شەكتەلىپ وتىرمىز. ەگەر بۇل ماسەلەلەر قولداۋ تاۋىپ جاتسا، قولىمىزدا ءبىر جاقسى تەتىك بولار ەدى»، - دەدى ەرمەك امانشايەۆ.
ءوز كەزەگىندە ق ر مەملەكەتتىك حاتشىسى گۇلشارا ءابدىقالىقوۆا وڭىرلەر مەن استانا بيلىگىنەن ءتۇسىپ جاتقان ۇسىنىستاردى مادەنيەت جانە سپورت مينيسترلىگى قولداپ، قاراۋ كەرەكتىگىن اتاپ ءوتتى.
«استانا وزگەلەر ءۇشىن ءاردايىم ۇلگى بولا ءبىلۋى ءتيىس. قازىر كىر داقتارى بار تۋلار ورناتىلعان. كەي جەردە تۋلار ءتىپتى جىرتىلىپ جاتىر. ستاندارتتاردىڭ بۇزۋشىلىعى كورىنەدى. وسىنىڭ ءبارىن استانا قالاسى بويىنشا جوندەۋ كەرەك. ويتكەنى، ەڭ الدىمەن قوناقتار، حالىقارالىق ۇيىمدار، باسقا دا ۇلكەن فورۋمعا كەلەتىندەر استانانى كورەدى. يسەكەشيەۆ مىرزاعا بايانداڭىز. بۇل ماسەلەگە جاي قاراۋعا بولمايدى»، - دەدى گۇلشارا ءابدىقالىقوۆا.
اۆتور: ايان بەكەن ۇلى
