فۋتبولدان قازاقستان «قۇراماسى» گەرمانيا مەن تۇركيانى ويسىراتا جەڭدى
ال كەشە تۇرىك اعايىنداردى 2-1 ەسەبىمەن ۇتقان ءبىزدىڭ جۇلدىزدار ەلگە ابىرويمەن قايتتى، دەپ حابارلايدى قازاقپارات ءتىلشىسى ق ر مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.
«Art-Football» اۋەندى فۋتبول فەستيۆالى الەمدەگى ايتۋلى قايىرىمدىلىق ءىس-شارالاردىڭ ءبىرى. اتالعان تۋرنير رەسەي فەدەراتسياسى سپورت مينيسترلىگىنىڭ ۇيىمداستىرۋىمەن «يگىلىك تۋى استىنداعى» قايىرىمدىلىق اكسياسى اياسىندا جىل سايىن ءداستۇرلى تۇردە وتكىزىلەدى. ۇيىمداستىرۋشىلاردىڭ ايتۋىنشا، جينالعان قاراجات ناۋقاس سابيلەردىڭ ەمىنە جۇمسالادى.
«جۇلدىزدار بۇل تۋرنيردە سپورت الاڭىندا كەزدەسىپ قانا قويماي، مۋزىكالىق شەبەرلىكتەرىن كورسەتەدى، تاجىريبە الماسادى. الەم چەمپيوناتىنا قاتىسۋعا قولداۋ كورسەتكەن ق ر مادەنيەت جانە سپورت ءمينيسترى ارىستانبەك مۇحامەدي ۇلىنا زور العىس بىلدىرە وتىرىپ، بۇگىنگى جەڭىسىمىزدى ەلوردامىزدىڭ 20-جىلدىق مەرەيتويىنا ارنايمىز»، - دەدى قازاقستاندىق پروديۋسەر الماس التىنبەكوۆ.
بيىلعى فەستيۆالعا قازاقستان، رەسەي، ارگەنتينا، پەرۋ، يتاليا، سەربيا، ۇلى بريتانيا، بەلارۋس، سلوۆەنيا، سلوۆاكيا، كورەيا، تۇركيا، رۋمىنيا، گەرمانيا، پاراگۆاي، جاپونيا مەملەكەتتەرىنەن كەلگەن 16 فۋتبول كومانداسى قاتىسۋدا. قازاقستان فۋتبول قۇراما ساپىندا ويناعان انشىلەر: كوماندا كاپيتانى مۇقاسان شاحزادايەۆ، نۇرجان كەرمەنبايەۆ، عادىلبەك جاناي، ابدۋلكارىم كارىموۆ، مەلس ساعات ۇلى، رىسبەك اتاش، ەربول ناريمان ۇلى، ازامات سىزدىقوۆ، رايىم ۋايس، جۇبانىش جەكسەن ۇلى، ايان بىربايەۆ، ءادىلجان ۋماروۆ، ارمان قوڭىربايەۆ، كۇنتۋعان سولتان، اڭسات ءدىلداباي بولسا، ەل نامىسىن اكتەرلەردەن تاۋەكەل ءمۇسىلىم، ءادىل احمەتوۆ، قۋانىش كەرىمقۇلوۆ، شىڭعىس تولەگەن، مارسەلەن كاماتە، رەجيسسەرلەردەن اقىلبەك دوسجانوۆ، ءانۋار ماتجانوۆ جانە پروديۋسەرلەر عالىمجان ارىستانبەك ۇلى، الماس التىنبەكوۆ، اباي جانساربايەۆ قورعادى.
ايتا كەتەيىك، بۇعان دەيىن وتاندىق شوۋ- بيزنەس وكىلدەرى چەمپيوناتقا 5 رەت قاتىسىپ، بىلتىرعى ءتۋرنيردىڭ فينالىندا ۇلى بريتانيا قۇراماسىن 2-1 ەسەبىمەن جەڭىپ، الەم چەمپيونى اتانعان ەدى.
